Manaomia maketi i fafo falaoamata ‘ulu a Samoa

Ua iai nei se fesootaiga tāua i le va o le Faalapotopotoga o Gaosi Oloa ma le au faatau oloa i fafo, le SAME ma le Iunivesite o Hawaii – e unai le faatau atu o le falaoamata ua gaosi i le ‘ulu i Samoa mo le maketi i fafo.

O se fonotaga na faailoa ai lenei fesootaiga i le vaiaso na tea nei ona o le manaoga e faamautu se tasi o maketi ua manatu Samoa nei aemaise foi o le au asiasi mai i Hawaii, o le a tele le tupe o le a maua ai e Samoa pe a faamalosia.

O le lelei o le atinae lenei ona o le itu lea, o lea ua gaosi le falaoamata e maua mai i le fua o le ‘ulu i Samoa, ma ua savali nei i le tolu tausaga talu ona amata lea galuega.

E lē gata i lea o loo maua le ‘ulu i Samoa e ui o lea e fua fuata ma e moomia le fuafuaga ina ia mautinoa e solo atoa le maua o lea fua o faaeleeleaga i le tausaga mo le faaauau ona gaosi ai le falaoamata.

O le susuga Papalii Dr. Tusi Avegalio ma Polofesa Alvin Huang o le Iunivesite Aoao a Hawaii lea na i Samoa mo ni fonotaga ma ni feiloaiga ma sui o le Asosi o Faioloa faatau atu i fafo ma le au Gaosi oloa le SAME e faamalamalama atili le tāua o le maketi e tatala mo le falaoamata ua gaosi i Samoa mai i le ‘ulu atoa ai ma oloa e gaosi mai ai ma le tele o le tupe e maua pe a lelei ona faatau atu i fafo.

Faaalia e Papalii o le taimi lenei i le maketi atoa lava o oloa ua gaosi i le falaoamata o le ‘ulu, ua oo atu i le $30 piliona tala Amerika ae e lei aofia ai le falaoamata lava ia, ma e lua lava maketi ua maua mai ai lea tupe tele a atunuu o le lalolagi o Amerika faapea ai ma Iapani.

Ona pau le tulaga ua vaavaai nei i ai le asosi i Samoa nei o le faamautu loa o i latou o le a faatau atu ai oloa nei i fafo. Faaalia e Tilafono David Hunter o le ofisa sili o le Faalapotopotoga o Suesuega faa-Saienisi a Samoa le SROS, o le taimi lenei o lea ua sauni oloa nei e gaosi i le falaoamata o le ‘ulu mo maketi i fafo, ae o le vaavaai agai i luma ina ia mafai ona tali atu Samoa i le siisii i luga o le manaoga mai i maketi nei i atunuu mamao, o lona uiga ia lava le ‘ulu e gaosi ai le falaoamata auā e fua fuata lea fua o faaeleeleaga ma ia faaauau le gaosi o le falaoamata.

O le tasi lenei o oloa ua iai kamupani i totonu o Samoa ua faapea ona tapa le SROS e tuu atu ia i latou e mafai ai ona faalautele le gaosiga o le falaoamata ma ia mafai ai ona tali atu i manaoga nei ina ia faaauau ai ona avatu i fafo le falaoamata lenei.

O le eseesega o le falaoamata ua gaosi i le fua o le ‘ulu ma falaoamata ia e faatau mai i fafo, o le falaoamata lenei e lē o maua ai le porotini lea ua ta‘ua e afaina ai le soifua maloloina o le gluten.

O le mafuaaga lea ua ta‘ua e Papalii ma Polofesa Huang e mautinoa ai lava e taugata atu lenei oloa pe a avatu i Samoa nei.

Papalii Dr. Tusi Avegalio (fai le matatioata) ma Polofesa Alvin Huang  (tulimanu i tua) Sui o le SAME ma le aumalaga mai Hawaii