Ole tausaga e 1954 na faavae ai le aoga tulagalua a Vailima ma Vaoala ma ua 62 nei tausaga talu ona faatu lea aoga ile li‘o ole taulaga o Apia. O aso ia e pei ona faaalia ese tasi o tina ole nuu o Vailima le afioga Tavu‘i Annie Laumea, sa na‘o Tanugamanono lava le nuu sa iai le aoga tulagalua e ese mai aoga i Malifa.
“O lo‘u tina ose tasi sa lotolotoi ile komiti ma oloo ia te au faamaumauga uma a lo‘u tina ile taimi na faatoa tapena ai le fausia o se aoga tulagalua i lenei itu ole atunuu male itumalo ole Vaimauga”.
Na faamatala Tavui e tele mea mālie ma faaletonu oloo ta‘ua i faamaumauga a lona tina ae sa ia lē mafai ona faailoa mai ile tusitala. Na ia faaalia foi o ia faamaumauga oloo matilatila ai se fuafuaga na finagalo malie ai le susuga ile Tapaau Faasisina le Susuga Malietoa Tanumafili II na avea ma Ao ole Malo, e siitia atu le aoga e faatu i totonu ose vaega ole fanua oloo iai nei le falemataaga ole tusitala Sikotilani o Lopati Lui Sitivinisone. Peitai na alu a‘i tausaga ma faasolosolo mai lava ina tutoatasi le atunuu ua galoma atu lea fuafuaga ae faaauau pea ona faatino le aoga tulagalua ile nofoaga oloo iai nei.
Ile tele o tausaga o iai lenei aoga ua faaalia ese tasi ole komiti ua faaletonu lava le tino atoa male faavae ole faleaoga ma ua lamatia ai le saogalemu o fanau. “Ole mafuaaga lea na matou savalia ai alo ma fanau a Vailima Vaoala o aumau ma alala i Aukilani Niu Sila mo se fesoasoani tau seleni e toe fausia ai se faleaoga fou”.
E lei teena le savali ae na liliu le mafutaga a Vailima ma Vaoala i Aukilani ma tali ile manao ole komiti. Ole sailiga tupe na maua ai le $72,000 tala Samoa ma ole saunoaga a se tasi ole mafutaga le susuga Papalii Puasegisegi Lafulafu Peo, e fitusefulu afe na manao iai le komiti ae faatino ane le faamoemoe ua maua le fitusefulu lua afe tala.
“Ole auala lena o lo matou malaga mai ma nisi o sui ole matou komiti sa gafa male faamoemoe e tauaao le seleni ile komiti o faiaoga ma mātua faapea fanau a le aoga tulagalua a Vailima”, na saunoa ai Papalii.
Ole Aso Toonai ua mavae na faatino ai loa le faamoemoe ole komiti ale mafutaga a tamafanau a Vaoala ma Vailima ile tauaao atu ole seleni. Oloo iai le fuafuaga ale komiti ale aoga tulagalua e toe sailiili pea nisi seleni ina ia mautu se seleni lelei e faavae ai le galuega ma e lē o tuua ai foi le savalia o nisi o Malo e pei o Iapani pe faaono maua ai se isi laveai.
Ole aoga tulagalua a Vailima e lē gata oloo aooga iai fanau a nei afioaga e lua ae e faapea foi i nisi o fanau oloo tau savali mamao mai Afiamalu ma Tiavi.
