Manao SUNGO, aveese faipule mai Komiti Faafoe faalapotopotoga tumaoti

O se finagalo lea ua faalauiloa nei i se pepa o faamatalaga a le Faamalu o Faalapotopotoga Tumaoti i Samoa le SUNGO. O le finagalo o le SUNGO o se tasi lenei o tulafono taufaaofi ua manino ai le tele o le lagolago a sui o lea faamalu ma o se faiga ua manino ai le unai a le Malo ina ia faia ni galuega agai i faigamalo manino aemaise le saoloto ai o faiga filifiliga e aunoa ma le masalomia o le fesootaiga a le Malo ma pulega o Matagaluega ma Faalapotopotoga a le Malo aemaise foi i Faalapotopotoga tumaoti.
Faaalia e le Ofisa Sili o le SUNGO o Roina Vavatau, ua unai e le tulafono taufaaofi lenei le tafiesea o faiga piopio e ono tulai mai i totonu o soo se faalapotopotoga o loo maua mai fesoasoani e faatautaia ai a latou galuega ma o latou tiute i tupe a le atunuu.
Ina ua faatalatalanoa lenei tulafono taufaaofi ma sui uma o Faalapotopotoga Tumaoti i Samoa na manino ai le lagolagoina e nei faalapotopotoga o taumafaiga nei a le Malo. Ae o loo iai fautuaga ua faapea ona momoli nei e le SUNGO i le Komiti faapalemene o loo iloiloina lenei tulafono taufaaofi, lea ua mae’a lona faitauga faatolu i totonu o le Palemene.
O ni fautuaga na ta’ua e le tamaitai ofisa Sili o le a fesoasoani e faamalosi atili ai le tulafono taufaaofi lenei. O le mataupu o loo laualuga ai le finagalo faaalia o le SUNGO o le tatau lea ona aveese sui a faipule o loo tofia i totonu o Komiti Faafoe o Faalapotopotoga Tumaoti.
O lea ua mautu le aveese o Minisita o le kapeneta poo isi sui a faipule mai i Faalapotopotoga ma Matagaluega a le Malo e ala lea i tofi o sui o Komiti Faafoe, ae o loo faaauau ona tofia nisi i totonu o Faalapotopotoga Tumaoti, ma na ta’ua e le Peresitene o le SUNGO Vaasilifiti Moelagi Jackson, o le iai o faipule poo minisita o le Malo i totonu o nei faalapotopotoga e faigata ai lava ona saili fofo i faafitauli e fesiligia ai le faamaoni o le Malo i le taitaiga o nei ofisa eseese.
O le aveese la o minisita o le a mafai ona saoloto ai le vaavaai i suiga e tatau ona faia mo soo se faalapotopotoga e alia’e mai ai ni faiga lē talafeagai ma le piopio “…auā e lē mafai ona fai se suiga pe a solomua i sui nei o le Malo le saofafai mai ai ma ua avea foi i latou ma tagata ua aafia ai i faiga piopio”.
O le isi popolega na faaali e le SUNGO i le talanoaina o lenei tulafono taufaaofi, o le itu lea e faigata tele ona talia le fai mai o faaiuga e faatatau i Faalapotopotoga tumaoti e nisi ua tofia o sui o le Malo. O se Komiti Faafoe o loo iai foi sui o le Malo e faafaigata ai ona amanaia le leo tutoatasi o Faalapotopotoga Tumaoti.
Faaalia e Vavatau, e iai lava le manatu o faalapotopotoga tumaoti o le latou matafaioi o le tetee i le Malo, ae o le galuega a faalapotopotoga nei o le unai faatasi ma le malo o atina’e o tagata soifua o soo se atunuu ma o le tiute lea e tele ina ave sese ma e iai taimi e molimauina ai le lagalaga mai e faalapotopotoga tumaoti o itu o loo manatu ua lape ai le faatinoga o galuega a le Malo, ae e lē tatau foi ona faagaloina, e tele foi galuega lelei o loo faia e le malo ma o loo tasi lava le taulai, ia manuia tagatānuu o Samoa. O le faailoga foi lea e pei ona ta’ua e Vavatau, o se faigamalo e temokarasi lona taitaiga.