Fai mai Luteru, ole tele o taimi e sese ai tagata i lona atunuu moni. E toatele i totonu o Niu Sila e lē iloa o ia ole Samoa. E ui na fanau o ia i Niu Sila (NZ), ma ola mai o ia i lenei atunuu ae e tāua tele ia te ia lona pito Samoa. E manao Luteru e iloa e tagata uma o ia ole Samoa. Ae e lē o faamamafaina lea tulaga e tagata faasalalau i taimi e taalo ai o ia mo le Black Caps a NZ.
O lona talitonuga e tatau ile NZ Cricket Council ona amanaia o ia ole Samoa. E tāua tele lea mo le silafia o tagata lautele, ae lē aveesea ai lona ia tulaga ole tagata taalo mo le NZCC. Na ta’ua e Ross, ose avanoa lelei foi lea mo le NZCC e faatosina mai ai tupulaga pasefika ile taaloga kilikiti, aua e toatele tamaiti pasefika e fiafia e taaalo ile kilikiti palagi.
Ae e iai le talitonuga o Luteru e fetaui lelei le taaloga lea mo tamaiti Samoa ma le pasefika. Aua e lelei le vaai o tamaiti Pasefika ose taleni faalenatura foi a tamaiti Pasefika ole ta ole polo e pei ole kilikiti.
Fai mai a ia e toatele o tamaiti e lelei ile taaloga ma mananao e taalo ai, peitai e lē o faatauaina e tamaiti pasefika lea lagona. Ole manatu o tamaiti ole taaloga e na’o mo papalagi ma Initia.
Ae lei taalo Taylor, o Murphy Su’a na mua i malae e taalo mo le Black Caps ile 1992. Oloo iai nei Su’a i totonu ole Laulau-a-fono ale Auckland Cricket Board (ACB). Ole avanoa lelei lea e faailoa ai le taaloga mo tamaiti Samoa ma le Pasefika, pe a faaaogā tatau ele NZCC laua ma Su’a.
Ole isi faigata mo le taaloga i totonu o NZ ona ole talenia o tamaiti pasefika i soo se taaloga. Ole tele o tamaiti oloo taalo lakapi ae matautia foi le latou taalo ile kilikiliti, peitai ua filifilia e latou le lakapi ona e le o lava le galuega ale NZCC oloo fai e faatosina ai tamaiti Pasefika ile taaloga kilikiti.
Fai mai Luteru, e lē o tuleia le taaloga i totonu o a oga mo tamaiti Pasefika. E talitonu o ia, ana iai se Asosi a tamaiti pasefika e faatosina mai ai le le tupulaga ile taaloga ua lelei tele lea, ile taimi nei ole toatele lava o tamaiti pasefika oloo agai e taalo i isi taaloga.
O lona ia foi talitonuga, ana faapea e faailoa ma faataua e le NZCC lona pito Samoa ole a avea lea ma faatosina i tamaiti Pasefika e taalo kilikiliti. Ae e lē o faaaogāina ele NZCC lea avanoa tāua.
O lona talitonuga ole taaloga sa’o lea mo tamaiti ole Pasefika aua e le maimau ai le tino ile tu’i e pei o isi taaloga e iai le lakapi. E le gata ilea, e umi le taimi e taalo ai le tagata ile kilikiti, e pei o ia, o lea ua ova ma le 100 ana taaloga mo le Black Caps a Niu Sila.
