Manao le Pulega, e faasolitulafono faiga faatalitane i luga o auala

Ua faagasolo nei talanoaga ma fuafuaga ina ia toe soloia ai ma faamauina faasolitulafono faiga faatalitane nei o loo faia ma ua sasao faaafi i totonu o le aai o Manukau.
O se vaega o loo aofia ai le pulenuu, le sui pulenuu, o faufautua e toaono, o nisi mai le ofisa o le pulega faapea taitai i totonu o le komiuniti, ua latou auaufaatasi ina ia toe taumafai i latou e saili ni auala e toe teuteu ai le tulafono le ua faataga ai nei le faatinoina o nei ituaiga o faiga, aemaise o lea ua matua faatino o se auala e saili ai tupe poo ni galuega mautu foi a nisi.
Taua e le alii o loo taitaia lenei vaega, Councillor Dick Quax, ua avea nei amioga, le faia o le talitane o se atugaluega tele i totonu o Manukau, pe a fua atu i se lipoti lea o loo taua ai, i le tausaga e 2005, e tusa ma le 423 le aofaiga atoa o i latou sa galulue ai i lenei matata (sex workers) i totonu lava ia o Manukau, ae o le 150 o i latou na, sa galulue i luga o auala tetele. O le manaoga la lea e agai i ai talanoaga a le vaega o loo faatautaia galuega a le Pulega, ina ia taofia ma faasolitulafono uma soo se faiga faatalitane e toe faatinoina, sei vagana ai lava i latou o loo galulue i totonu o fale ua faatulaga lelei mo lenei galuega (brothels).
Taua e Mr Quax, o lenei amioga o faiga faatalitane i luga o auala ua autasaga o faatino a o lei oo ina faatagaina faaletulafono lenei galuega o le talitane, lona uiga o le a iai lava nisi o i latou nei e le mafai pe le mananao foi e talia e o latou mafaufau le suiga lenei o le a faia ina ia faatino uma ai a latou faiga i totonu o fale nai lo le toe feoai solo i luga o auala. Fai mai la Quax, pau lava la le afu o le faafaigata lena, o le faatulaga loa o ni aiaiga faaletulafono.
Taua foi Mr Quax, o nei taumafaiga uma e ono faaaofia ai ma le toe faaleleia atili o isi vaega ia e mafai ona fesoasoani mai i le nei toe faaleleia o le tulafono, e pei o le toe faalelei o meapueata a le CCTV, ia uunaia atili galuega faamama i luga o magaala eseese o le aai, ma ia faasaina ona toe agai atu i nofoaga e pei o paka o taavale. O le a taumafai foi le matagaluega o faamasinoga e fai ma faaoo mai ni manatu faaalia o nisi e tusa ai lava o lenei mataupu, i le vaega o loo faatinoina lenei galuega.
Fai mai Mr Quax, i le tausaga e 2006, na teena ai e le vaega sa iai i le pulega o le malo i lena vaitau, le Labour, le manatu na faatu atu e le pulega ina ia talia faaletulafono le faatinoina o faiga faatalitane i luga o auala i Manukau, e ui lava sa finau mai nisi sui o le vaega faaupufai a le National sa iai i se komiti filifilia, e tatau ona tuuina atu i le faiga malo laititi le malosiaga poo le paoa e latou te faatulaga ai ni aiaiga mo nei faiga faatalitane i luga o auala