O se tasi o moemitiga ma se manaoga o le faalapotopotoga ua tuufaatasi i ai le autusitala ma le aufaasalalau a le Pasefika i Niu Sila, le PIMA, o le tatau lea ona maua se alāata i luga o televise mo tagata Pasefika lava latou.
O se miti o loo agai nei i ai talanoaga ma fonotaga a sui o le PIMA, ina ia mafai ona vave vaai i se ata ma le tino mai o lea manaoga tāua.
O le mae‘a ai o le fonotaga tele a le PIMA i le tausaga talu ai, sa talanoaina ai lea mataupu ma sa mafuli uma i ai finagalo o sui auai o lea fonotaga.
Sa laga e le susuga ia Aaron Taouma, o se tasi o alo o Samoa o loo galue i le tuufaatasia o nisi o polokalame i luga o televise, ma sa ia ta‘ua ai, ua tatau ona see agai i luma le vaa o le PIMA, ma vaai i auala e manaomia e saga faalelei atili ai le tino ma le galuega a le aufaasalalau ma le autusitala a le Pasefka mo le tautuaina o tagata Pasefika.
O le iai o se televise mo tagata Pasefika lava latou, o se tasi o auala e manatu o le a agai ai pea i luma tomai ma le faatinoina o galuega, aemaise ai o le a fesoasaoni tele e fai ma puna mo ni galuega a le toatele.
E lē gata i lea, ae o le a mafai ai foi ona faatino nisi o manaoga mo le atina‘e ma le manuia ai o tagata lautele, i ni polokalame saunia, aemaise ai o le faalauiloaina pea o tu ma aganuu a atunuu uma o le Pasefika.
O le Aso Lulu na tea nei, aso 15 o Iuni, na toe usuia ai se fonotaga a sui o le PIMA, ina ia tulituliloa pea le manaoga ma se‘i tagai i se faataatiaga ma se fuafuaga tau lalata mai o lea faamoemoe.
O le fonotaga sa faia, sa faatasi mai ai le sui o le Matagaluega o Tagata Atumotu o le Pasefika (Ministry of Pacific Island Affairs), le susuga ia Heker Robertson, o ia o se tasi o faufautua sinia.
O ia foi lea sa faatautaia le fonotaga ma folasia nisi o auala ma faatatauga e tapena ai le manaoga tuufaatasi ma le PIMA, ma o le lagolagoina foi lea e le Matagaluega mo le mataupu.
E lē taugofie le faatupeina o se alāata mo tagata Pasefika, pe afai e mafai ma maua se avanoa. A fuafua i le televise a tagata Maori, e tusa ma le $65 miliona o loo faatupe ai e le malo i tausaga taitasi. O lona uiga o se vaega tupe foi faapea e vaavaai agai i ai pe afai ae talia e le malo lea manaoga.
Sa auai foi le sui o le SMG, Radio Samoa ma le Samoa Times i lea fonotaga. Sa saunoa manino foi le susuga ia Heker i lea fonotaga, e selau pasene le lagolagoina e le latou Matagaluega o le mataupu mo se televise a tagata Pasefika.
O le tamaitai taitaifono o le PIMA, Iulia Leilua sa fai ma fofoga o le fonotaga, peitai sa tatala lava le avanoa mo sui uma sa auai i le fonotaga, ina ia faailoa o latou finagalo e saili ai pe faapefea, ae o le ā foi le isi sitepu o le a laasia.
Na solosolo lelei le tulaga sa oo i ai le talanoaga, ma sa mafuli sui na auai i le saga faamausaliina o le manaoga.
Sa lagolago finagalo uma, faatasi ai ma le ofoina o latou taimi, tomai ma agavaa e fausia ai se tino mo le moemitiga e pei ona tulituliloa.
E lei iai se finagalo na auese i le mataupu, ae na tele manatu sa faaalia e agai i auala ina ia vave ona faataunuu.
E ui ina sa naunau sui na auai i lea fonotaga ina ia faasavali ma agai pea i luma fuafuaga e aunoa ma le toe faatalia, peitai sa manumalo pea le vaai mamao mo se isi fonotaga, ina ia mafai e le toatele sa faanoi ane ona auai ma talanoaina faatasi le mataupu ma sona lelei manuia.
E to‘a sefululua sui sa auai i le fonotaga, ma ua malilie faatasi uma ina ia toe valaauina le isi fonotaga i le masina o Iulai, ma e tatau ona auai uma sui e tatau ona iai i le fonotaga lea, ma o le a lē toe taofia ai foi le talanoaina ma agai loa i luma fuafuaga ma faaiuga o le fono o le a iai.
Ua faapea foi ona toe tatala ai ma le avanoa mo sui auai, ina ia tatau ona oo atu i le isi fonotaga, ua oo uma ane a latou faamatalaga ma finagalo mo le faaleleia ma le fausia o le faavae, faatasi ai ma vaega uma ina ia tuufaatasia ai se talosaga aloaia e tuuina i le malo, e tauala i le Matagluega o Tagata Atumotu o le Pasefika.
