Manao le Malo toe tapuni ofisa o moliaga solitulafono

Le ofisa ole Loia Sili ale Malo ole a toe ave iai galuega tau moliaga faasolitulafono pe a pasia le teuteuga ole faavae e toe tapuni ai faitotoa ole Ofisa o Moliaga Faasolitulafono le National Prosecution Office
Le ofisa ole Loia Sili ale Malo ole a toe ave iai galuega tau moliaga faasolitulafono pe a pasia le teuteuga ole faavae e toe tapuni ai faitotoa ole Ofisa o Moliaga Faasolitulafono le National Prosecution Office

O lea ua i luma nei ole Fono Aoao Faitulafono ale atunuu le teuteuga ole Faavae oloo fuafua ai le Malo e toe ave uma galuega tau moliaga faasolitulafono poo le prosecution, ile tulaga sa iai i tausaga e tele ua mavae lea sa ile ofisa ole Loia Sili ale Malo.

Ose fuafuaga ole a toe talepe ai le tulafono na pasia ele Palemene ile tausaga e 2015 na faatu ai le Ofisa o Moliaga tau solitulafono ma vavae ese ai galuega nei mai galuega ma isi tiute faaletulafono oloo tauave ele Loia Sili.

E lē natia lenei fuafuaga ua faia ona o feteenaiga na tulai mai ile va ole Loia Sili ale Malo ma le Faatonu ole Ofisa o moliaga faasolitulafono lea na molia ai le Komesina o Leoleo, ma molia le Faatonu o lea ofisa ini solitulafono tau taavale afi.

Oloo faamalolo lē tumau uma ile taimi nei le Komesina le afioga Fuiavailili Egon Keil ma le tamaitai faatonu le susuga Mauga Precious Chang. Ua faamalolo lē tumau ai foi ma le loia sinia o lea ofisa ole sui Faatonu o Miruel Lui.

Faaalia ele Palemia susuga Tuilaepa Sailele Malielegaoi ina ua faataatia le teuteuga ile fono aoao a‘o lei malolo mo le Kerisimasi ma le Tausaga Fou, e iai le agaga lelei na faia ai le faaiuga e faatu lea ofisa peitai e iai foi uiga faaletagata ua lotolotoi ile faatinoga o tiute o lea ofisa ma tautua fou ua mafua ai ona toe finagalo le Malo e aveese ae toe foi ile Loia Sili galuega uma.

E lei manino mai ile finagalo ole Palemia poo ā uiga faaletagata ma uiga lē lelei ua matauina ele Malo ua mafua ai le faaiuga. Ua manino mai ile finagalo ole Malo, ole lumanai ole Faatonu ma le sui Faatonu ole ofisa oloo faamalolo lē tumau pea e ui ina ua lē mafai e leoleo ona faamaonia moliaga o Mauga Precious Chang, ua faamuta.

Ole soloia o ia moliaga ele faamasinoga faaitumalo ua faaalia ai ele Loia Sili le afioga Lemalu Herman Retzlaff ole a toe apili le faaiuga. E lei iloa se aso o lenei tausaga fou e fofogaina ai le apili ile faamasinoga maualuga.

O lea foi ua taoto se isi teuteuga ole faavae mo se finagalo ole Palemene. Ole teuteuga lea ole a umia ai ele Kapeneta le malosiaga faaletulafono i lalo ole Tulafono o Galuega tau Leoleo e faamuta ai le taimi galue ose Komesina pe faamalolo lē tumau.

O lea faaiuga e faatino pe afai ua iai ni molimau e lagolago ai ni tuua‘iga oni faiga lē amiotonu ile faatinoga o tiute ole Komesina o Leoleo. Ole malosiaga foi lea ole a ave ile kapeneta e faamalolo lē tumau pe faamuta ai foi le taimi galue ole Sui Komesina e faavae mai foi ini tuua‘iga ma ni gaioiga ua atagia ai ua soli ona tiute faaleoleo i lalo ole tulafono o galuega tau leoleo.

E lē o toe po se silafia ole atunuu i faaletonu na aliali mai ile Matagaluega o Leoleo i lena tausaga ua mavae ma ole mafuaaga lea ole teuteuga.

O ia foi faaletonu ua suia ai le Minisita ole Matagaluega lea ua i lalo nei ole afioga ile Palemia.