Yes man, yes woman, e lē o ni tagata lelei…Tuilaepa

O uiga ma amioga a tagata faigaluega e mafua ai ona tupu le vevesi ma fefulituaa‘i ai tagata faigaluega ae afaina ai le tautua i le atunuu, na saunoa tuusa‘o i ai le taitai o le Malo le afioga i le Palemia susuga Tuilaepa L Sailele Malielegaoi, ina ua ia tatala se mafutaga soalaupule i le va o sui sinia o matagaluega a le Malo.
Sa autu lea mafutaga i le talanoaina o sauaga e aafia ai tagata faigaluega o se manulauti na filifilia e le faalapotopotoga faavaomalo mo tagata faigaluega poo le International Labour Organisation le ILO.

E lei ‘alo le Palemia i lona fofola manino a o faafofoga sui ofisa sinia o matagaluega eseese i mafuaaga o le tulai mai o fevesiaiga i le va o nisi tagata faigaluega a le Malo.
“E tele ma anoanoai tusi e oo atu ia te au mai nisi o mataupu ua tutupu, ae o le tele o nei mataupu e mafua mai ona ua sosopo le tagata e i lalo ifo lona tulaga, i le tagata faigaluega o loo sinia”.

“E iai mea e tutupu i totonu o matagaluega mai lea taimi i lea taimi, i le taumafai o le isi tagata i se auala ‘alu‘alua e a‘ea‘e ai e fai le galuega la e fai e le isi, ona aliali mai ai lea ua sopo tuaoi, ma o le sopo tuaoi e aliali mai ai le femisaa‘i o tagata faigaluega i nisi taimi”.
Na saunoa le Palemia a faataoto taiala e sosolo ai galuega e tatau lava ona usitaia peitai e sopo tuaoi loa se tasi i le taiala ona ua fia a‘ea‘e atu lea e i lalo i le galuega a lea o loo i luga ona tutupu ai loa lea o fevesiaiga.

E le gata i lea tulaga ae afai o lē o loo i lalo e fai si atamai ona taumafai lea o le tagata o loo i luga e saili se mea e tea ai, ona ua threatened poo ua faamata‘uina lona tulaga i le tagata lea.
“E faapena foi i mea nei o malaga, ou te matau pea e malaga lava le pule, malaga le pule, ae ā pe a tuu se avanoa e malaga ai le number two ma le number three, o le alu a oe, alu a oe, e lē gata ina e maua ai pea alauni ma maua ai le poto mai fafo.

Poo le teine poo le tamaloa e lē tāua lena ia te au, auā o le tele o isi mea e lē faapitoa e lē o le tulaga e mafua i le va o le tama i le teine poo le teine i le tama ae tutupu i le va o le teine i le teine ma le tamaloa i le tamaloa.

O le anoano o tusitusiga e oo atu ia te au, ae ou tilotilo atu foi e tele lava le faaletonu lea e tupu, o le poto o le isi e tuuai le leaga i le isi, ae lē tilotilo ia te ia. A tupu misa ia ma tulai mai ai le fetuia‘i, o ai e palasi i ai le faaletonu, o le atunuu la e tapuai mai o loo manaomia le auaunaga a le Malo”.

O le mau foi a le Palemia ia taumafai faauluuluga o matagaluega a le Malo e tapa ni fautuaga mai isi, ae aua le manatu o ia ua atoatoa lona poto, ona e leai se isi e atoatoa sona poto. “E iai le mea foi lele e ta‘ua o le yes man ma le yes woman, e yes a i taimi uma ma le manatu o se mea lelei, e lē o se mea lelei. O le taitai e tu a‘e i ou luga ma fesili mai ia te oe poo le ā lava se mea, ae e tu a‘e i luga e say yes i ai, o iina e aliali mai ai e lē o oe o se tagata lelei. A e iloa se mea faaletonu fai lau fautuaga”.

O le aotelega o le finagalo o le taitai o le Malo ia tautuana ma le aufaigaluega a le Malo e maua le loto e tasi e faatino ai le latou tautua i le atunuu, auā a lelei o le manuia foi lea o le atunuu ae sili ona tauleleia ai le Malo.
Le afioga i le Palemia a o saunoa tuusa‘o i ofisa sinia o matagaluega a le Malo i le mafutaga soalaupule sa tautalagia ai fevesiaiga i totonu o le lotoiofale o tagata faigaluega