O le faakalenaina o le masina o Novema e le EFKS aoao mo ana faigataulaga masani i totonu o Pulega taitasi, lea la pei ona ofaga potopoto ai le Pulega motu i Saute i Kalaiesetete i le latou fale sefulu amata mai Nelson seia oo i Invercargill mo aso e tolu, 25 – 27 Novema 2011.
Na ulufale le pulega i le afiafi o le aso faraile ma amatalia ai le tofiga a faifeau ma ao’ao fesoasoani, ma sosoo ai ma le tofiga tele lea ua aofia ai faifeau ma faletua, aoao fesoasoani ma tiakono, faapea le faauuina o tiakono fou ua pale mai i le galuega.
O le aso foi lea o le sauniga faapitoa a le mafutaga a Tina EFKS o le pulega na taitaia e le faletua o Tumanu Paiaaua (Timaru), o le lauga na saunia e le faletua tiakono Mulipola Omai (Shirley).
Na faaiuina lea aso tele i le tausala a le mafutaga a tina, o le faamoemoe mo se fesoasoani i le faletua o le Toeaina, Elisapeta Vili lea ua tofia e avea ma Peresitene o le Tagata Puapuagatia (TPT), mo le fono tele i Malua 2012.
Na faatumulia le sauniga lotu tele i le aso sapati, 27 Novema i le malumalu EFKS i Woolston, aso ua taualuga i ai mo le faigataulaga o lenei tausaga 2011, e le gata i taulaga tupe, taulaga pese, taulaga upu ma taulaga fofoga taumafa, o mea uma ua foai e osiosi ai le taulaga i le Atua.
Na taitaia le sauniga e le susuga i le Toeaina Tumama Vili, o le tatalo saunia e Rev Pelenato Fonoti ( Wainoni), o le lauga faapitoa sa fofogaina e le susuga Menu Puni (Blenheim), ma ia faamamafaina le alofa i le Atua ia faatino i le foai, e lē faitaulaga se tagata oti ua na o le tagata ola, o le tagata ua faaolaina.
O le komiti o tupe, susuga Falepauga Alai (Dunedin) sa fofogaina ma faamaopoopo le taulaga tuufaatasia a le Pulega, tulai mai le soifua faitaulaga o le pulega e le faaitiitia, maua foi se faasiliga o le foai mai le tausaga 2010.
O le susuga i le Toeaina na tatalo faapitoa mo le faapaiaina o le taulaga ua sasaoina, faaalia foi lona agaga faafetai ma le faamaualalo i luma o le Atua, aemaise o le faafetaia o galuega tauosiosi i totonu o aulotu taitasi, ia maua se viiga o le Atua e ala i le soifua galue.
E ui ina lulu mafui‘e, ae o loo faapena ona lulu mai ai ma tupe, o le matafelefele o faafitauli na afatia ai le folauga, ae lē o taofia ai le alofa o le Atua i le pulega.
Matagofie le tapenaina o viiga o le Atua e aulotu taitasi, siufofoga mālie aemaise le taimi pese mālie (Shirley) o le alii malaga mai Melepone (Iulai Lavea – Saleimoa), faapea le fuataimi tamaitai talavou o Britta mai Timaru, o si aulotu to‘agaogao ae maini.
Na alo atu le pulega i le taumafataga o le toonai ma faagasolo ai polokalame faaiu, faafetaia foi le milosia ma le lufilufilima lelei o le tausiga o le mafutaga e le falefa i Kalaiesetete pei ona iai aso e tolu.
Sa faaiuina loa i saunoaga ma fetalaiga masani ai aso faapenei ma faapea ona faaalia le agaga fiafia ma le faitaulaga pei ona saunia ai nai meaalofa teutusi mo le mamalu o le aufaigaluega aemaise le ofisa o le au fai-Me.
O le ofisa tutotonu o le Pulega, o loo taitaia e le Toeaina Tumama Vili (Kalaiesetete), Rev Posala Tioa (failautusi – Dunedin) ma le susuga Rev Pelenato Fonoti (teu tupe – Wainoni).
