Minisita o Atinae ma Alamanuia, Tialavea Tionisio Hunt

Minisita o Atinae ma Alamanuia, Tialavea Tionisio Hunt

Ole faamasinmoga i Mulinuu e maua uma ai le autu o soligatulafono ma mafuaaga. Ole tele o solitulafono nei e aofia ai sauaga matagā i fanau teine ma le itupa o tamaitai, ma solitulafono ole faamisa ma faatupu vevesi e iloa ane ile taimi e suesue ai molimau poo le talaaga ose solitulafono faapea sa aafia ai le ‘avamalosi. Oloo iai atugaluga o nisi ilo tatou atunuu ile faaopoopo o pisinisi e gaosia le ‘avamalosi e pei ole pia, ma fagumalosi ma ua faaopoopo ai foi ma le maualuga ole alcohol poo le ‘avamalosi oi totonu o ia oloa. O atugaluga sa folasia ele toatele ua tatau ile Malo ona toe silasila ile tulafono o ‘avamalosi ma toe faia nisi aiaiga ina ia mafai ai ona faatonutonu le gaosiga ole oloa.

Ua faaalia ele Minisita o Tupe Maua ole taitaifono ole Komiti e pulea le ‘avamalosi le afioga Tialavea Tionisio Hunt, ua iai nei le fuafuaga e siitia le lafoga o ‘avamalosi ae ole a fuafua foi le lafoga ile malosi ole ‘avamalosi poo le alcohol ile pia, ma le fagumalosi.

Ua faailoa foi ele Minisita ua taatia atu nei ile Loia Sili e faataoto se ata ole tulafono fou ole a aiaia ma le malosi ole ‘avamalosi ile pia poo le fagumalosi. Ole fagumalosi ole Maso oloo gaosia i Samoa oloo faatau ile fagu e fitu lita ma ua faaalia e Tialavea tasi lea fagumalosi e fai si maualuga tele ole pasene ole ‘avamalosi oloo iai e mafai ona onana ai ni tagata se toafa.

O lona uiga ole faataitaiga tonu lea ole fuafuaga ole a faatino ole sii o lafoga ole ‘avamalosi e fua ile pasene ole ‘avamalosi oloo i totonu. Ole fagumalosi ole Maso ile fagu 7 lita e nao le sefulu tala ma e toatele le au inu ‘avamalosi aemaise ole tupulaga oloo faatauina, ma ole isi lea popolega ole atunuu ua taugofie ma faigofie ai ona tagofia e tupulaga le ‘avamalosi.

Faaalia ele Minisita o Tialavea ole suesuega sa faia ua iloa ai ole tele o pisinisi tau ‘avamalosi ile atunuu e le o mulimulitaia le tulafono ole gaosiga ole ‘avamalosi ma ole isi mafuaaga ole faaiuga e tusia ni teuteuga fou mo le saga faamalosia ole malosi ole pasene ole malosi e tatau ona faaaogā e ia pisinisi.

Ole ofisa mo le toe fuataina o tulafono a Samoa le Samoa Law Reform office sa gafa ma le sailiiliga ma latou fautuaina ai le faia oni suiga ile tulafono autu o ‘avamalosi. Atonu o manatua e nisi aso o aumai fagu malosi mai Tutuila lea sa iloa ole faguomo sa faatau e faleoloa laiti ile $15 tala.

Na sili ona toatele na faatauina ma inu auā e lava ma totoe, ma ole mafuaaga foi lea na ninimo atu le faguomo ina ua suia le tulafono ma tuu i luga lona tau.

O ia taimi na sili ona sefe tupe ale au inu ‘avamalosi ile faguomo nai lo le faatau ole fagupia.

Comments

comments