E oo mai i le faaiuga o le 2014 ma mavae atu, ae ua uma ona faataatia le tofa mamao i le komiti o le aiga o le afioga ia Toomata Lauititi ma le tina ia Sesila Toomata Lauititi i Aukilani, o le a faia se aso e mafuta ai alo ma fanau o augatupulaga o le aiga ua iai nei ma le mau tauave, “O aiga ia faatāua.”
Na amata tapena lenei faamoemoe mai i le masina o Oketopa ma le lagona e tatau lava ausia le tofa mamao ua malilie ma ioeina e sui uma. O le faanaunauga lava o lenei tofa mamao ina ia mafuta, faamasani ma faailoa atili e ala i le malamalama o le isi tamaitiiti i le isi tamaitiiti aemaise ina ia faamasani i le iloa ona tausi le fealofani i totonu o mafutaga faaleaiga i mātua ma fanau.
O le faamoemoe lenei sa faataunuuina i le Aso Toonai i le nofoaga o Long Bay ma sa lagona le fiafia ma le faagaeetia i mātua ona o lenei mafutaga ua lē gata ina vaaia ma maitauina le fiafia tele o fanau o le tupulaga 4, ae na faapena foi ona atili faamautu ai ma le mafutaga a le augatupulaga lona 3 ma ua ao ai ona faafoi le viiga ma faia le faafetai tele i le Atua ona o lea aso na ia faia e olioli ma fiafia ai lenei aiga.
O lagona foi ma le faanaunauga lava ina ia faamasani pea alo ma fanau e faamafuta auā le faamoemoe mo le family reunion i le lumanai. O le tina ia Amituana‘i Laasga Faamausili, o le afioga ia Saveasoi Piki Tafiti ma lona faletua ia Vineta Tafiti o sui ia o le augatupulaga 2 sa mafai ona auai e molimauina lea aso matagofie o le fanau.
Na mafai foi ona auai mai le tamaitai o Vaalele Jr Koria mai Ausetalia ona o le fia mafuta ma feiloai ma tausoga ma aiga i Aoteroa nei. Na vaaia le fiafia tele o le fanau i le tele o galuega faatino ma taaloga sa saunia lelei aemaise foi o le taimi o taelega ma le mafuta pea i le faigaa‘i.
O le viiga sili lava lea o le Atua Soifua ina ua mafai ona faataunuuina lenei mafutaga i lona alofa tunoa. Ia manuia fuafuaga uma ma faamoemoega mo le lumanai auā le tapueina o olaga o alo ma fanau ina ia malamalama pea i le tupuaga mai o aiga e lē gata i Samoa ae faapena foi i atunuu i fafo e pei foi o Niu Sila nei.
