O le taamilosaga taga polo a le All Samoans Annual Golf Tournament sa faataunuuina i Aukilani i le vaiaso ua mavae, sa avea lea o se avanoa lelei ua toe maua e alii taaalo e mafuta ma feiloai ai.
E ui i le eseese o atunuu o loo aumau ai ae ua tauasa mamao mai lava ona o le fia mafuta ma fia feiloai i le uso i totonu o le taaloga. E taaalo lava tama o le uso, ua militino faatasi ai lagona ma manatu faatama taalo i le faatinoina o le taaloga.
O le po o le Aso Lua na amata ai lenei faamoemoe i le Dinner faafeiloai, mo ‘au uma sa auai ma o le faatamā o le Aute Samoa ia Rev Iosefa Rimoni sa taitaia le polokalame i le tatalo, faatasi ai ma le fono a peresetene ma kapeteni o ‘au taitasi.
E 10 ‘au sa finauina lenei taamilosaga, e 5 ‘au na malaga mai Samoa e aofia ai le Maugafolau, Vaiotausala, Fagalii Golf, Agape ma le Brothers and Sisters. E 2 ‘au mai Ausetalia, 1 mai Sini o le Latasi faatasi ai ma le Talofaalii mai Brisbane. E 3 ‘au i Niu Sila nei, 1 mai Ueligitone o le Wellingtons Game ma le 2 i Aukilani o le Penina ma le Aute Samoa.
E ui sa tau faaletonu le tau, ae sa maua lava le laolao ma le laofie mai le lagi e faataunuuina ai taaloga. E tolu aso sa faagasolo ai le taamilosaga, na amata i le Aso Lulu ae faamae‘a i le Aso Faraile, ma o lenei taaloga sa faia i le malae o le Aviation Golf Club i Magele e latalata i le malaevaalele.
O le maualuga ma le matagofie o lenei taamilosaga o le taufai tausinio o ‘au uma i aso taitasi ae lē gata i lea o susuga i faafeagaiga sa auai sa iloga foi lo latou sao i ‘au sa taaalo ai, faapea foi ma isi tagata o isi atunuu sa fefiloi ai ‘au taitasi.
Na vaevaeina lenei taaloga i vaega taitasi (Division) o ‘au a alii ma ‘au a tamaitai, ma e eseese foi vaega na ta ai le tagata. E mae‘a aso e lua o lenei taamilosaga, o loo mamao i luga ai a le Aute Samoa, ae o le Aso Faraile o le toe aso lea o le taaloga na faateia ai ‘au i le finau mai o le Viotausala ma le Brothers & Sisters i le tulaga muamua ma le lua ae see mai le Aute i le tulaga tolu.
E ui i lea suiga ae sa tumau lava le tulaga muamua i le Aute Samoa i le taamilosaga ona sa tele ona ai sa manumalo ai i aso e lua muamua o le tauvaga.
O le po o le Aso Faraile sa faia ai le laugatogi i le Nafanua Hall i Avondale, ma sa auai uma tama taaalo o le taamilosaga, faapea peresetene ma kapereni o ‘au taitasi aemaise ai o aiga uo ma ē masani sa agai atu e molimauina lea faamoemoe.
O le susuga ia Tavai Meni o le Peresetene o le Aute Samoa sa fai ma fofoga o le po, ae o le susuga i le faafeagaiga ia Rev Naketoa Talangi mai le EFKS Onehunga sa taitaia le sauniga lotu e tomua i ai le polokalame.
O se vaaiga sili ona tāua i lea po o le laufofoga fiafia o tagata uma ma le oloa luuluu o tama taaalo mai vaega eseese i aso taitasi sa taaalo ai. O faailoga tupe ma ipu sa tauaaoina i lea afiafi sa tapenaina e le ‘au a le Aute Samoa auā o latou sa nafa ma le taligamalo i lenei tausaga, faatasi ai ma le lagolago malosi a le susuga ia Shiu Sing ma le faletaavale o le Hendeson Cars, Wood Mart Ltd ma le faleaiga o le My Samoa.
Na matagofie polokalame o le po ina ua toe alaga le ausiva o le Tatau Dance Group e faafiafia le auvalaaulia faapea le autalavou o le Mother of Devine Mercy mai Avondale.
Ua toe lagona foi siufofoga o le Aute Samoa mai Aukilani i le Ipu o le siamupini o lenei tausaga, tulaga lua le Brothers & Sisters mai Samoa, tolu le Vaiotausala mai Samoa.
Na mae‘a le tufaga faailoga ona autasi lea o ‘au uma e fai le Peresetene o le Vaiotausala ma sui o ‘au taitasi e faaleoina se faafetai mo le Aute Samoa e tusa ai ma le tapenaga o taaloga i lenei tausaga, ma ua iai foi lona talitonuga o le a feiloai i laufanua o Samoa i le tausaga fou o le a talimalo ai le Vaiotausala, ma faaiu ai le po i le siva a peresetene ma kapeteni o ‘au taitasi.
