“Ou te iloa o le tusi lea na ave i le Palemia ua mafua ai ona faamalolo ma‘ua ma le pule o Tafaigata”…Komesina o leoleo
E faataalise atu le FK poo le faaiuga a le kapeneta na faia i le Aso Lulu na tea nei i le Komesina ma le Komesina lagolago o loo pulea le falepuipui i Tafaigata, na logo ai le faamalolo uma o laua i se tulaga lē tumau, ae se‘i faia suesuega a le komisi suesue i mataupu e faasino i le falepuipui i Tafaigata, ua silafia e le Komesina le mafuaaga.
“Ia o lea ua malolo i le fale ma faakali le suesuega a le komisi”. O le finagalo le o le afioga Lilomaiava Su’emalo Fou Taioalo ina ua fesootai atu i ai i le afiafi o le Aso Tofi 22 o Aukuso 2013, le aso lea na faatoa ave i ai le faaiuga a le kapeneta lea na faia i le Aso Lulu 21 o Aukuso 2013.
“Ou te iloa o le tusi lea na ave i le Palemia ua mafua ai ona faamalolo ma‘ua ma le pule o Tafaigata”.
O le tusi lea sa tuuina atu e se tamaitai leoleo o le falepuipui na faamalolo pe tuli ona o se moliaga o le solia o aiaiga o tulafono i le faatinoga o ona tiute. Peitai o loo faaalia i le tusi a lea tamaitai lona tetee malosi i le faaiuga ua faamalolo ai o ia ma le galuega.
O se tasi o lomiga a le tatou nusipepa o le Samoa Times, sa otooto atu ai ni vaega o lea tusi e faasino i tuua‘iga o pulega lē lelei ma faiga lē amiotonu o loo pulea ai le falepuipui i Tafaigata. Ua aofia i ia gasu o faletonu amioga faaulugalii a nisi o tamaitai pagota e aofia ai ma se tamaitai leoleo o le falepuipui.
O nisi o ia tuua‘iga o le faaaogā o nisi o pagota i ni faiga faaalatua i galuega a leoleo, atoa ai ma tuua‘iga o ni tamaitai sa pagota na aafia i ni faiga faaulugalii ma le pule o le toese.
E anoano ai faaletonu o loo ta‘ua i le tusi na muamua ave i le Komesina o leoleo ma le manatu o le tamaitai sa galue faaleoleo o le falepuipui o le a aumai i ai se finagalo o le komesina, peitai sa fiu e faatali, ae na o le tali na avatu e le komesina na faaalia ai, o le a faia se suesuega i ai.
O le mafuaaga lea na tuuina atu ai loa e lea tamaitai se kopi o lana tusi i le taitai o le Malo le afioga i le Palemia, lea sa ta‘ua ai le tuuina atu e le Palemia i le ofisa o le Loia sili e silasila i ai mo se fautuaga.
O le pepa o faamatalaga mai le ofisa o le Kapeneta na faaalia ai, e 4 masina o loo faamalolo lē tumau ai le Komesina ma le Pule o le falepuipui, ae se‘i faatino le suesuega a le komisi suesue e taitai ai le ofisa o le Komesina o Sulufaiga, le Ombudsman office. Faaalia e le Komesina ua faamalolo lē tumau, e faatoa mae‘a le fā masina lea i le aso 22 o Tesema 2013. O loo faamalolo uma i laua ae maua lava faamanuiaga tau totogi.
