O le RUN 2014 e faauiga, Rise Up Now. O le sini lea o le mafutaga a le Ekalesia a le Faith City Church na faia i le vaiaso ua tuanai. O le faamoemoe ia tapena tupulaga talavou mo le valaau a le Atua mo le lumanai. Pe fai ma faifeau, poo ā lava nisi tiute, ae ia saunia latou e faafeiloai tiute ma faiva o le a tofia ai e le Atua i le lumanai.
O le finagalo o Ps Opeta, o talavou aoaoina lelei, e fai ma tiakono lelei, faasolo ina fai ma failauga lelei. E le taumate foi e fai ma tamā ma tina lelei. A oo foi i se tofi faifeau, latou te tauave lea natura lelei ua aoaoina ai. E manuia foi mea latou te fai, poo le tausi aiga poo le galuega a le Atua.
Ua tolu tausaga o faia lenei mafutaga ae ua faatupulaia le lolofi ane o ekalesia eseese e tufi taufao manuia faasoa, aemaise ina ia fesoasoani ia latou autalavou ona ua faigata le tele o tupulaga lolotu.
O failauga faapitoa o Pastor David Katina ma lona faletua ia Debbie Katina e galulue i LA Amerika, o uo a Pastor Opeta ma Faalupea Tautalafua, ua iai se faiga faapaaga ia galulue vavalalata e fausia le tino o Keriso.
Na masii mai se autalavou mai le laumua o Canberra e auai i lea koneferenisi. O se alii faifeau ma lona faletua, Ps Andrew Adidi o Cairns sa malaga mai foi e fia auai, ma ua tautino e toe omai ma nisi o lana autalavou i le tausaga fou ona ua faamaonia le lelei tapena o le RUN Conference.
Sa lē ofi le hall sa faia ai, ma iu ina ta‘i ane masini faaleotele leo i fafo i le pakaga o taavale ina ia faalogologo ai ē sa lē maua ni nofoa. Sa iai foi se TV sa faasalalauina ai le polokalame i totonu o le isi hall, sa matuā lē ofi foi ona o le toatele o tuppulaga sa auai.
Sa saunia faapitoa e le Ekalesia ni polokalame mo fanau iti a o faagasolo lenei koneferenisi, ma maua ai se filemu i mātua ae alo ane i tapuaiga sa fai.
Ua sauni nei le Ekalesia e tapena lana RUN Conference mo le tausaga fou, lea ua saili se isi falesa poo se hall telē ona ua tele ekalesia ua faailoa ane lo latou auai. O le mitamita i taitai o le Faith City, o avanoa e auauna ai mo le tino o Keriso ma atinae ai a tupulaga mo a taeao. O le alii o Murray ma le faletua ia Savali Iuomalo o taitaifono ia o le komiti o tapenaga mo le koneferenisi.
