Malolo Vaitele Soi o Samoa i le Numera Tasi a Ausetalia

O le fusuaga tele o le Mahindra Super 8 Super Fight o le Aso Toonai na mavae atu nei i Aukilani i le aupaga o le cruiserweight ua manumalo ai Brad Pitt le numera tasi a Ausetalia i ‘ai ia Vaitele Soi o Samoa.

O le taamilosaga lenei o le Super 8 sa faapea ona tauva ai alii fusu iloga e toa 8 filifilia pito i luga mai Ausetalia, Niu Sila, o le Ghana o loo nofo nei i Fiti ma le sui o Samoa ia Vaitele Soi.
O le se‘igapepa mo le pa‘ū ma nofo na tulai mai ai Brad Pitt o Ausetalia e fetaui ma Joseph Kwadjo o Ghana / Fiti; Daniel Ammann o Austelia e fetaui ma Israel Adesanya o Niu Sila.

O Monty Filimaea o loo siamupini i Niu Sila e fetaui ma James Emersonv o Niu Sila, ma le paga mulimuli o Vaitele Soi le siamupini o Samoa e fetaui ma Lance Bryant o Niu Sila.
O le mae‘a o le taamilosaga muamua (quater finals) na manumalo mai ai Brad Pitt, Daniel Ammann, Monty Filimaea ma Vaitele Soi. I le semi finals na manumalo Brad Pitt i le la fusuaga ma Daniel Ammann, ae manumalo Vaitele Soi ia Monty Filimaea o loo faiaiga ai David Tua.

O le finals na fetaui ai loa Vaitele Soi o Samoa ma Brad Pitt o Ausetalia. Na lavea Brad Pitt i le taamilosaga muamua ia Vaitele Soi ma solasola ai loa i le taamilosaga lua ma le taamilosaga mulimuli. I le mae‘a ai o le fusuaga sa tuuina atu ai loa le seleni tupe e $50,000 ina ua auau faatasi faamasino e tuuina atu le manumalo ia Brad Pitt.
Faaalia e Teleiai Edwin Puni le faamalieina o le SKY Arena sa faia le fusuaga i le finau a Vaitele Soi ma ua iai nei le fuafuaga mo se isi fusuaga tele a Vaitele Soi i Niu Sila i le amataga o le 2015.

Fetalai Teleia, “E ui ina e lei manumalo Vaitele, ae ua tatala ai nei se faigapaaga ma le SKY Arena e lē gata o nisi o fusuaga tetele mo Vaitele ae o le faitotoa lea mo isi alo fusu o Samoa.”
O Vaitele Soi e mai afioaga o Taga i Savaii, Vaovai i Falealili ma Vailele lea e matai ai i le suafa Satiamaalii.

E lē gata o le tapuaiga a aiga ma Samoa sa auai i le fusuaga i lea po, ae sa faapea foi ona faatasi ai le Konesula o Samoa, afioga Faolotoi Reupena Pogi ma le afioga Lemalu Ray Ah Liki mai Samoa.
Faafetaia e Teleiai ma le pulega a Vaitele Soi le lagolago a le Malo o Samoa e auala mai i le TAB o loo fesoasoani i le toe lalagaina o fusuaga faapolofesa i Samoa faapea le JP Fitness o loo koleni ai Vaitele i Samoa.

E lē gata i lea a o le City Boxing Gym i Kingsland i tapenaga faaiu a Vaitele i Niu Sila faapea le ofisa soifua maloloina o le Health Star Pacific i le fesoasoani mo tapenaga a Vaitele.

Faafetaia foi e le pulega le tali mai o le TV a le Ekalesia EFKS sa mafai ai ona maimoa Samoa i le fusuaga i le po o le Aso Toonai.
Le alii o Vaitele Soi

Le Super 8 i le afiafi o taaloga

Vaitele Soi ma le Team Samoa i le po o le fusuaga