E lei faigofie ona fai le faaiuga a le komiti sa nafa ma le faamasinoina ma le iloiloina o togalaau aina e tele sa tauva mo le tauvaga tele a Niu Sila mo le tausaga nei 2010.
O se polokalame sa matuā iloga lona tulai mai, auā sa tele ni luitau ma ni vaega aogā sa maua ma fua mai ai. E ui lava la ina sa faafaigata le filifilia o se tasi o le atunuu na iai le manumalo mo lenei tausaga, peitai sa maua lava lē na tusi lima i ai le komiti sa feagai ma le tauvaga.
E moni lava a lulu ma loimata e selesele mai ma le fiafia.
O le onosai i le malulu, ma le galue malosi, atoa ai ma le lē faalogologo tiga, e taunuu i se taunuuga manuia. O le NZ Gardening Award o se taui ua sauni nei e faaee i tau‘au o se tasi o tama Samoa, ina ua iu i ai le filifiliga a le komiti ma avea ai lana faatoaga ma siamupini o le 2010.
O le susuga ia Joe Iosefo o le aai o Otara, ua faailoa faalauaitele lona manumalo i se tasi o tauvaga o togalaau aina sa tuufaatasia e se vaega o Niu Sila.
O le faailoga o le togalaau aina silisili lona vaaia ma le tausia lelei, atoa ai ma le tele, ola ma lauusiusi na mafai ai ona faamanuiaina lea tamalii Samoa i le faailoga muamua poo le sili foi.
O lea faaiuga sa faia ina ua mae‘a ona asiasia ma vailiiliina vaega ma mea taitasi sa faatulagaina ma fuafuaina e le komiiti e faatatau i ai le tauvaga.
O le tauvaga sa fofoa ae ma amataina e le pulega faaitumalo a Manukau, ma faasolo ane ai lava seia amanaia ma vaaia loa e le faalapotopotoga tele a le atunuu. O fualaau aina, ma fualaau taumafa mata i le tele o ituaiga eseese sa unaia ma faamalosia e totoina i faatoaga, ma sauni ai e ulufale i totonu o le tauvaga.
O le oo ane o lea tala lelei ma se tala fiafia na faateia ai le tamā e pei ona ta‘ua, talu ai sa mamao lava i lona finagalo se tulaga faapea o le a oo i ai lana taumafaiga.
O le tama ia Joe e tusa ai ma lana molimau, e fiafia tele e galue ma gaioi, o le isi lea vaega o lona soifuaga e lei mafai lava ona aveesea talu ona taunuu i Niu Sila mai tausaga e tele.
O lona lava lea natura sa soifua a‘e ma ia i totonu o lona aiga, ma lona nuu a o lei malaga ese ma aumau i Niu Sila e oo mai i lenei vaitaimi. E tele ni itu tāua ma le aogā sa ta‘ua e Joe, na mafua ai ona faamalosia pea lona loto e auai ma avea o se tasi o le faamoemoe.
O le manumalo ai o Joe i lenei tauvaga ua ia maua ai se faailoga o ni mea e faaaogā mo ana faatoaga i se aofaiga e $1000 tala lo latou tau aofai.
Toe tasi la le isi tauvaga lea o loo tulituli atu nei e Joe, e na te ono maua ai le aofaiga o le pepa tala oloa e $5000, e mafai ona tala ai oloa i mea lava tau faatoaga mai le kamupani tele a le Mitre 10.
Ta‘ua e Joe, e lē o le tupe o loo ia tauva i ai, ae o le fia faalautele o lana fesoasoani i lona komiuniti, ma ua ia sauni foi e tufatufa atu nisi o mea mai lona faailoga, e pei o fatu laau ma mea faapena, i nai isi aiga tuaoi ina ia tofusia ma atili unaia ai pea le fia totoina o le laueleele.
O le afuafua mai o lenei tauvaga, talu ai o se polokalame sa amataina mai e le pulega faaitumalo a Manukau. O se polokalame na ta‘ua e Joe, sa agai ma faatatau mo tupulaga talavou e leai ni galuega, i le faamoemoe ina ia taofia mai ai i le soona feoai solo ma amata ai ona mafaufau i uiga leaga ma tuinanau leaga o le soifuaga.
O le autū lea sa mafua ai ona fofoa le faamoemoe, ma sa molimauina e le tamā, le telē o le aogā o lea polokalame mo tupulaga.
O tausaga ua tuanai talu ona amata mai e oo mai lava i le taimi nei, ua vaaia ai se suiga i fanau talavou. O le toatele lava ua fiafia e galulue ma faaaogā le polokalame ma ua atinae ai lava aiga.
E lē gata i le tulaga o le maua fua ai o taumafa e ala i fua o faaeleeleaga, ae ua tele foi o latou taimi e faaalu ai i le totoina ma le galueaina o tuafale, ma ua lē mafai ai ona o ese ma aiga e pei ona masani ai.
Sa molimauina e le Samoa Times aiga o le toatele o talavou sa iai, ma o loo iai pea i lea polokalame. Sa asia foi o latou aiga ma tuamaota, ma sa vaaia ai le faamaoni ma le moni o le faamatalaga sa tuuina mai. E tetele faatoaga o togalaau aina e pei o kapisi, pi, kaloti, kukama, tamato ma le anoanoai o isi fualaau aina. E lē gata i lea, ae o loo totoina lava foi ma le talo ma fa‘i, ma ua atagia ai le faatāuaina e talavou o le sini ma le faamopemoe o le polokalame.
O le taimi nei e pei ona sa molimaina i le vaiaso talu ai, ua toe amataina galuega a le pulega faaitumalo a Manukau, mo le toe suotosinaina o le laueleele ma le palapala e sauni ai mo le totoina o fualaaua aina o le tau mafanafana ua oo mai.
