O se tamaitai ua tele tausaga o galue i faasalalauga ua faamānavaina e le Atua ana galuega i le 63 ai o tausaga o lona soifua.
O le tamaitai ia Letimu Faameia Sili Luuga Tuivasa Su‘a … o se tasi o tamaitai na faapea ona silafia uma e le atunuu i le suafa o Meia Su‘a. O se sui faasalalau mo le tele o tausaga i le alaleo poo le ofisa faasalalau a le Malo, le 2AP.
O le taimi lea e na o le pau lava lea o le leitio na tautuaina le atunuu i le itu tau i faasalalauga, ma o suafa lava nei na fesootai i ai le atunuu i le itu tau i faasalalauga o polokalame, o talafou ma isi auaunaga tau faasalalau.
O le tausaga e 1976 na amata ai lana auaunaga i le ofisa faasalalau a le Malo. O polokalame lava a tamaiti na tele ina faalogoina ai lona siufofoga aemaise foi i polokalame a tina ma tamaitai.
Na mulimuli ane agai Meia i le Matagaluega o Mataupu tau Tina ma Tamaitai, Atina‘e o Nuu ma Aga Fesootai ma na faapea ona feagai ma le tele o afioaga i lana galuega o le fesootaiga lea o le vaega o atinae o nuu.
O lona uiga o soo se mataupu e fia faalauiloa e ala i aoaoga ma fonotaga ma le vaega o le lotoifale a le Matagaluega, o Meia na fesootai muamua a o le’i faataunuuina ia feiloaiga.
Na faaalia e se tasi o ona alo ia Alex Su‘a, o se tina e malosi tele i aoaiga a le Tusi Paia, ma o ia lava e feagai ma le aoaoga ma le faatonuga o lo latou ola tuputupu a‘e.
E fiafia e fesoasoani i tagata ma e masani ona agai lava ia ma lana ukulele i ona taimi avanoa ma ave ni ana faatauga i le maota o tagata matutua i Mapuifagalele ma faafiafia ai. E lē gata i lea o le falemai tele i Motootua ma e tele ina faasā ona o le Leotele o ana pese e usu i gasegase i potu taofia. E agai foi i le falepuipui i Tafaigata e fai lana lava tala‘iga lea o le faafiafia ai.
Na faaipoipo atu Meia e pei ona valaau ai e le toatele o le atunuu, i lē sa avea ma faipule i tausaga ua mavae o Aleipata Itupa i Lalo, le afioga Su‘a Atonio ma e toaono o la alo ae to‘a 27 alo o ona alo.
Na toe foi lava Meia Su‘a i galuega faasalalau ina ua ia faalauiloa se tasi o tusitusiga a se misionare Amerika na faamatala le agai i Seoli a o taoto ai i le falemai o tau togafitia ma o se polokalame na faamatala atoa ai e Meia Su‘a faafagogo i luga o le Kingdom TV lenei tusi faitau.
O Aso Sa sa faagasolo ai lea polokalame ma o iina na faatoa vaaia ai e le toatele le tagata e ona le siufofoga ua tele tausaga o faafiafia e faalogologo ai i luga o le leitio a le Malo.
O le gasegase na faamamā ai lona toto lea ua maliu ai lava lenei tina, ma o le vaiaso lenei o ona toe sauniga. Tau ina faamaise atu le agaga faamafanafana o le Atua i le nofo a alo faavauvau, o aiga uma, uo ma ē masani i le faletua poo le tina ia Meia Su‘a.
