E toatasi se tamā na maliu i le afā malosi na agi mo le sefululima minute i le Aso Tofi o le vaiaso talu ai i Sini ma faaleagaina ai le tusa ma le afe o fale ma maota o aiga ma pisinisi i le itula e lua i le aoauli.
O lenei tamā na tanumia lana taavale i luga o le Hume Highway agai atu i Emu Plains e tuaoi ma Penrith i Sini i Sisifo. Na afaina foi se tina e onosefulu tausaga i se isi laau palasi i luga o le alatele sa iai lana taavale ma faanatinati atu ai i le falemai i Westmead sa togafiti ai ma o loo faasolo manuia ona manu‘aga.
O pitonuu aupito afaina o loo aumau ai le mamalu o tagata Samoa e aofia ai Penrith, Moorebank, Mt Druitt ma Schofields lea sa silia ma le 500 valaau mo le Fesoasoani i le SES ae tusa ma le 1,600 galuega laveai a le fuimu ma falemai. O lea aso na amata i le vevela e tusa ma le 38*C le vevela agai atu i le 41*C le aasa o le la ae peitai e ta le 2pm ua amata agi malosi mai le savili ma mamafa to‘uto‘u mai le timu aemaise le timu‘aisa (hail) na fesoasoani i le gagauina o lala laau tetele ma afaina ai taavale feoai ma fale o aiga.
O uila ma faititili na afaina ai tele o meaafale ma taavale e oo lava i se tasi o falefaigaluega (warehouse) na solofa i le malosi o le matagi i lenei taimi puupuu.
Pe tusa ma le 80,000 galuega ma aiga na motusia le eletise ma uaea eletise ua palalasi i luga o fale ma lumafale na polokaina ma faasāina le ulufale atu ai o taavale.
E lua aso o taumafai le faaleleia o eletise i pitonuu Rooty Hill, Chipping Norton, Moorebank, Liverpool, Mount Druitt, Fairfield West, Canley Heights, Hammondville, Lurnea, St Clair, Hebersham, Carramar, Emu Plains, Prairiewood ma Llandilo. O le afā tamoe aupito malosi lenei talu mai le valu tausaga talu ai.
Ua silafia ai foi e aiga taitasi faapea le Council le matautia o laau tetele i lumafale, tuafale ma ua ao ona faagata e le Council isi laau faapaolo i tafaala e pei ona afaina ai le soifua o le tamā na aafia i le faalavelave.
