Tama ma le fanau

Tama ma le fanau

“Ua uma ona faaulu la‘u tagi i leoleo faasaga ile pulega ole falemai tele ole Tupua Tamasese Meaole i Motootua, ona sa lē tatau lava ona maliliu lo‘u toalua ma si o‘u afafine.”

Faatoa tasi le vaiaso talu ona uma ona teu le tina ia Saili Nipa ma lana pepe teine ile aiga o lona toalua i Vaimoso. Ae ole talanoa a lona toalua ia Iosua, e pei lava ose ata faasolo i lona mafaufau le afiafi ole Aso Toonai na alu ai e ave lona toalua ile falemai.

“O a‘u sa ou moe, ae tuua mai lana Bingo ile afiafi ole Aso Toonai sau lava fagufagu a‘u mate o loa e ave ia ile falemai, ma faapena ai lava ona ou alu atu ile Dyna ale matou aiga e sosoo matou fale ma ave ai Saili.”

“Ile falemai sa ou fesoasoani e solo ma faamamā le vai mai ona vae,” ma le lē iloa e Iosua o lana toe solosolo lava lea ma milimili faapelepele isi ona toalua.

 “Sa alu i totonu ole isi potu ae sau fai mai ua uma ona faapā ele vaega lona vai, ma sa ou vaai atu ua susū ile vai ma oi lava ile tiga o lona manava.”

“Pe tusa ole 12 ile vaveao, ae leai lava ni foliga o anoanoa ese fomai le tigaina o Saili. E tiga ona oi ile tiga ole manava, ae viga mai lava ia te au e vaai le tupe oi le ato e totogi ai le pili o tamaiti aoga.”

“Sa iai lo ma faamoemoe, e fanau ai lava ma manuia ile po ole Aso Toonai, tea i tua ile Aso Sa, ae ma usu ile Aso Gafua e totogi pili ole ma fanau aoga.”

Oni faamoemoega faivavale ua lē taunuu, peitai ile talanoa a Iosua, sa leai se manatu e oo ise tulaga faapea, auā foi e malosi lava le tamaitai i ana failele.

Ole lona ono ai lea ole la fanau, ole a tolu ai teine tolu tama pe ana manuia.

Ole taimi nei oloo nonofo uma lava ia Iosua lana fanau, vaganā ai le isi tamaitai laitiiti ua avatu i Savaii ele tina o Saili.

“E mafai lava ona ou tausia uma la‘u fanau. Oloo soifua pea lo‘u tina e fesoasoani. E feololo foi lo‘u totogi e tausi ai ma faaaooga uma latou. E maua lava le $200 tala ile vaiaso, oloo faasoasoa.”

O lo‘u toalua lava sa faamoemoe iai le ma aiga, faapena foi ona vae mo‘emo‘e i mea e manao iai lo‘u tina. A oo foi ina fai mea a lo‘u aiga, e nate iloa lelei lona tulaga ma oso tatau ile faiga o feau.” Na toe foi le talanoa a Iosua ile falemai, ina ua toe pisi atu fomai e faate‘i ma ta pamu le fatu o Saili ae ua tuai lava pe tusa ole tolu ile fā ile vaveao, talu mai le afiafi lea na pa ai le vai.

E alu atu i totonu ina ua valaau ane lona tei sai ile potu faatiga ma Saili ae oloo ta salo ele tamaitai fomai i ona lima foliga o lona toalua ma faapea, “e vaai ia lele ua fai faamoimoi lava ana mea…”

Ae ole taimi lena ile faamatalaga a Iosua e vaai atu ua ū nifo o Saili ma ua utia ai lona laulaufaiva.

Ma oso atu loa ia taumafai e tiga le fofoga o lona toalua ile seleulu, ma tago ane ai le tamaitai fomai e fesoasoani. Ae ua vaai atu lava ia ua uma le ola o lona toalua.

Ae ua tafiti lava le pepe ile manava ma talosaga atu loa ile fomai na iai pe mafai ona taoto lona toalua e faaola mai le pepe.

Peitai ile tala a Iosua, sa fai atu le fomai e lē mafai ona faia lena tulaga ona a tupu se faalavelave e lavea ai latou. Ma sa tu ai lava ma le faanoanoa ae ua fai ifo foi ma le tafiti ole pepe ile manava, ma uma atu ai lava.

O lana tala, sa faatonu ele falemai le falemaliu i tua e ave iai lona toalua ile vaveao lava lea ole Aso Sa.

Peitai ole aoauli ole Aso Sa, ae tutū atu leoleo ile latou fale i Vaimoso, e talanoa atu ile toe aveesea mai lea o Saili mai lea falemaliu, ae avane ile falemaliu ole Tupua Tamasese Meaole i Motootua lava.

Ma sa faapena ai lava ona fai, mo le faataliina lea ose fomai faapitoa e faia se suesuega faaletulafono, ile mafuaaga ole maliu. Ole taimi na faataunuu ai lea fuafuaga ile silia ma le vaiaso talu ona taoto Saili ile aisa ale falemai, na faatoa mafai ai foi ona tuu eseese ma lana pepe.

Ole tamaitai o Saili ole lona ono ole fanau e to‘a 13 a Laupue Poutasi Fui Tativa ma le tina ia Pulemau Poutasi o Samauga. Peitai na vaetamaina ele tausoga o lona tina, le tamaitai o Tailela ma lona aiga.

E maliu nei ua 37 le matua o lona soifua, ma oloo soifua mai pea lona alii ia Iosua ma o la alo e toalima.

Comments

comments