O loo sailia pea e leoleo i Sini le alii palagi o Christopher Chandler (22) na tuli e leoleo ia latou taavale a o ia sola ese i se taavale gaoi o le Audi lea na afe faafuasei i totonu o se pa apa a se aiga ma suati tamaiti laiti o loo tafafao i tuafale ma maliu ai le pepe na o le sefulufitu masina ia Tatiana Tauaifaga.
O se tala faanoanoa lenei i si nei aiga i le pitonuu o Constitution Hill i Sini lea na maliu ai lava Tatiana i lo latou aiga i Bessbrook Way, Constitution Way.
I molimau a tagata na iai i le taimi o le faalavelave na o latou vaaia i le ati o le taavale na ave e Chandler i le pa apa ma mulimuli atu ai ma taavale a leoleo i totonu ma afaina ai le pepe i se tasi o taavale a leoleo ma uma ai lava lona soifua.
Ae peitai na tia‘i le taavale e Christopher Chandler ma sola ese ai ae maua ai na o lana uo teine e leoleo lea ua loka ma saisaitia nei. O lenei tamaitai ia Katie Tuite e luasefululua foi lona soifua ma ua molia i moliaga e aofia ai le faatauina o fualaau faasāina. O loo sailia pea e leoleo lana paaga o loo solasola nei i tua.
O se taimi aupito faigata lenei mo mātua ia Helena ma Topaz Tauaifaga lea na tupu le faalavelave o loo fai se gasesega a si tina ae peitai o loo faamalu le tamā o le aiga. O Tatiana o se masaga ma o la latou tafaoga masani lava i tuafale lea e saogalemu ai ae peitai na osofaia le pa o loo puipui ai mai le auala ma afaina ai loa i taavale a leoleo na tuli mai ma lē ua sola.
Ua faailoa mai foi e leoleo o lenei alii o loo sailia e 175-185cm le umi ma e tino paee ma o se tagata e faatupu vevesi. E ui na faamagalo e tausoga o le pepe ia Tatiana leoleo na afaina ai le soifua o le manamea, ae na faailoa e le susuga Joseph Toleafoa (uncle) i luga o lana facebook lona toatamai, “Afai ou te maua oe, ou te fasiotia uma oe ma lou aiga lou ….”
Na saunoa le susuga Tulaga Toleafoa (uncle), “o se tamaitiiti e tumu i le fiafia ma e misia tele i ona uiga mataataata.” Matou te lē faitioina foi leoleo auā sa latou faia lo latou tiute.”
