Maliu i manu‘a mai se agaese

 Faaalia e le Sooupu o le matagaluega leoleo le afioga Taupa‘u Maotaoalii Kaioneta Kitiona, o se tamai naifi na aafia ai le alii talavou o loo taofia lē faailoaina o lona suafa. E lua aso o taofia ile falemai ae na maliu ile aso na sosoo ai
Faaalia e le Sooupu o le matagaluega leoleo le afioga Taupa‘u Maotaoalii Kaioneta Kitiona, o se tamai naifi na aafia ai le alii talavou o loo taofia lē faailoaina o lona suafa. E lua aso o taofia ile falemai ae na maliu ile aso na sosoo ai

O tupulaga laiti ile va o le 18 ile 20 ma ona tupu tausaga le matutua ua teu nei i vaimata o alii ma tamaitai leoleo ia latou suesuega o loo faia ile mafuaaga o le maliu o se alii talavou 20 tausaga le matua.

O le aso 30 o Me 2016 tusa lea o le Aso Gafua a o lumanai le Tutoatasi i le Aso Lulu, aso muamua o Iuni 2016, na lipoti ane ai i leoleo e le falemai i Motootua le maliu o lea talavou ma le faamatalaga o se vevesi na tupu i se vaega o le taulaga ile po o le Aso Toonai, 28 o Me na aafia ai lē ua maliu i ni manu‘a mai se agaese.

E lei lipotia i leoleo le faalavelave ile po na tupu ai ma e lē o iloa e le Sooupu le afioga Taupa‘u Maotaoalii Kaioneta Kitiona pe aisea, ae ina ua maliu le taulealea na faatoa logo ai e le falemai leoleo.

O le tauvaga siva faaleagaga o le Youth Alive o loo ogatotonu i faamatalaga, e lei faamaonia na mafua ai le vevesi i nisi o tupulaga o ni pitonuu ile taulaga.

Ua faapea mai le Sooupu o leoleo, e leai se sootaga o le tauvaga siva ma le vevesi, ae o se feeseeseaiga lava na mafua mai i ni tauga upu a talavou na aafia ile vevesi.

E faatoa iloa tonu le ‘au o le paipa ile faamatalaga a le Sooupu o leoleo, ma molimau ua oo mai pe a mae‘a suesuega a leoleo ma oo le mataupu ile faamasinoga, ona o lea ua molia se alii talavou 19 tausaga i le moliaga matuia o le faaoo o le maliu i se tasi ma le loto i ai.

O le vevesi lea o loo iai ni masalosaloga e fesootai ma se isi foi vevesi a ni tupulaga lava ile taulaga, ma ua lē gata i vevesi nei ae ua aliali mai foi ni lipoti o ni talavou na latou fao ni meatotino a ni tagata sa mapu atu i tua o le fale o le Malo ile eleele i se po o se aso o le amataga o lenei masina.

Na ave meaai a nei tagata ma isi meatotino e pei o telefoni feaveai. Ua alu ai nei le asiasiga a leoleo i taimi uma ile ao ma le po i nofoaga eseese o le taulaga e siaki pe moni ua iai ni kegi a tupulaga ua faamautu solo ile taulaga pe a oo ile po.

Peitai na saunoa le Sooupu o leoleo e moni e iai kegi e pei ona ta‘ua i sona finagalo na lipotia e nisi auala o faasalalauga, ae e foliga o ni tupulaga laiti e fetaui ile taulaga ona faatino ai lea o ia amioga solitulafono.

O le tuualalo lea a leoleo ua ave ile lautele o le atunuu, ia mataala ma vaavaai lelei i ni mea e tutupu ma lipoti atu loa pe o nisi o tupulaga nei o loo vaaia ile taulaga tele o Apia. Ua faaalia e nisi sa fesiligia ua ese nei aso, ua tele suiga ua molimauina i mea ua tutupu, ma o se vaaiga o tu ma aga faafafo ua sosolo mai ma ulufia ai mafaufau o fanau talavou.