O se alii Waikato e faiaoga toe galue i mataupu tau komipiuta i totonu o Hong Kong, Tiki Hunia 27 tausaga le matua, na fanaina e se tagata faatupu faalavelave a o ia taumafai e laveaiina si ona toalua, Nickie Hunia, ina ua fao faamalosi e lenei faomea le telefoni feaveai mai ia te ia, na avatu i le falemai ma maliu ai lava i ona manuaga.
O lenei faalavelave na tupu i le afiafi o le Aso Lua, 7 Iulai 2009 a o malolo i laua i le faapaologa o le fale talimalo i St Andrews, Kingston i le atunuu o Jamaica lea o loo tafafao ai ina ua faatoa maea mai le toe faafouina o le la tautoga alofa faaleulugalii a o iai i Las Vegas. E toalua ni aualii Jamaica na faanatinati atu i le pito o loo malolo ai, o le tasi alii na ia sei faamalosi le telefoni feaveai mai lima o lona toalua, na taumafai Hunia e tauivi ma lenei tagata faomea ma iu ina faaaoga se laau malosi ma fana ai le alii nei, a o taumafai si ona toalua e saili se fesoasoani. O lenei ulugalii talavou sa aotauina i le Iunivesite o Waikato, ma faauuina ai Tiki i lona faailoga o mataupu tau pisinisi i le 2006. A o lei tuuvaa atu i Hong Kong sa faiaoga le tamaitai i Ueligitone ma o ni tagatanuu tausaafia i totonu o Hong Kong. Na taua e le alii o Wesley Faamanu Feausi, lea o loo faimalologa mai lona aiga i Hemilitone, o Tiki la te taaalo lakapi faatasi i le Valley Rugby Club i Hong Kong, latou te fesootai foi i galuega faafaiaoga, o se alii tino maualuga, a o lona loto e ese le maualalo toe loto alofa i soo se tasi.
Ua malaga atu i Jamaica ni alii leoleo mai Niu Sila e fesoasoani i le suesuega, ma ua faaalia mai o lenei lava vaipanoa o Kingston lea na tupu ai le faalavelave, e tolu ni kegi (gangster) o loo fai ma fili o leoleo Jamaica ona o i latou lava nei o loo faatauga i ola o tagata, ua faaigoaina foi lea siomaga o le Golden Triangle. Ua malaga atu sui o le aiga aemaise nai matua tagi mai ala o le alii o Tiki Hunia i Jamaica mo le aumaia o lona tino maliu ma o loo fesoasoani malosi i ai le matagaluega o mataupu faavaomalo a Niu Sila. E momoe lava ma manu ae sau mala e atiae.
