E momoe ma manū ae sau mala e atiae. Ua fesasaa‘i faalou le magā foi mafaufauga ma lagona ona o le lē mautonu i ni mea e ono tutupu mai peitai e avea lava lea o se fafagu ina ia mataala pea ma sauni i soo se taimi.
E pei o nisi o fuaitau tāua sa faamamafaina i upu faamalosi sa apoapoai ai le Susuga ia Pr Samuelu Afamasaga i le sauniga faaleaiga, sa siitia mai le Afioga Paia a le Atua, “E sili lou iai i le fale o iai le faanoanoa, na i lo le fale o iai le fiafia. E sili le aso e oti ai nai lo le aso na fanau mai ai.
O lou oti o lou manuia lea a o lou ola ua ia Keriso lea. Amuia e faanoanoa auā e faamafanafanaina i latou. E le o le oti o le iuga lea o lenei soifuaga.”
O se faalavelave matautia sa faanenefu ai masalosaloga o le tinā ia Rasela Savaiinaea (faletua o Tuulemaga) ma nai o la alo ona o se tala faamomoiloto na faateia ai i latou. O le Aso Toonai, aso 13 o Fepuari na alu ai se taelega a Tuulemaga Savaiinaea ma nisi o ana uo.
A o faia le latou papakiu, sa agai atu o ia e faamalu peitai na umi se taimi e le o vaaia o ia a o le taimi lea ai o taumanuō mo se fesoasoani peitai ua siliga se laveai.
E le o mautinoa lelei pe iai se vaega e ono vivili ai se tasi i lea vaega na ta‘ele ai le susuga ia Tuulemaga, ua mafua ai ona maliu o ia.
Na faanatinati atu ma aami loa i latou e patino i ai lea matāfaioi, ae ua fai lava sina tuai ua uma lava lona soifua.
O ni molimau foi e ono lagona ai le agaga alofa, tusa pe e te lei mafuta muamua ia Tuulemaga, e le mafaitaulia le faamomoiloto o molimau a nai ona alo e uiga i la latou mafutaga mafana ma si o latou tamā aemaise o le toatele o e na molimauina ona toe sauniga ua pei o se ie folasia i malae e le tau faaailoaina lea tulaga i uiga tauagafau ma le alofagia o lea tuagane.
O le alii o Tuu e mālie tele nai ona uiga auā sa soifua mai o ia i le aso 2 o Tesema 1965, ae o ana amio e pei lava o se tama talavou. E faaioga o ia e lana fanau o le RASTA auā e fiafia tele i musika faaonapo nei aemaise o si ona foga uumi migimigi.
E alofagia o ia e soo se tagata e pei ona silafia e le toatele o alala ma papaaao i Brisbane. E agamalu tele, loto maualalo, ma tausaafia e tagata.
O lana taleni o le ta piano ma si ana kitara o si ana uo mamae lea. E fiafia e voli ae matuai mafanafana ma latalata tele le latou mafutaga ma si ona faletua ma le fanau e toalua tamaitai, Sabrina ma Katarina ma le alii e toatasi o William.
O le po o le Aso Tofi (18/2/2010) sa faataunuuina ai ona sauniga faaleaiga i le Ekalesia Aso Fitu o le toe Afio mai i Logan City.
O se molimau tāua sa saunoa i ai se tasi o uso o Tuulemaga o se faafeagaiga AOG i Ueligitone i le matuai misia o le mafutaga ma si ona uso ma le faagalogata lava o nai ona uiga. Na lauina e se tasi o ona tuafafine e malaga mai Ueligitone ni tusi sa auina mai i nai ona matua i Solosolo ua le mafai ona paau mai ona o gasegase.
O upu o nei tusi na matuai vaaia ai le laufofoga maligi o le aofia i ni faamatalaga a mātua, le tinā ia Gautolu Katalina ma si ona tamā ia Paulo Savaiinaea Leota.
O le talaaga o le soifuaga o Tuulemaga sa aoaoina i le Malisi i Mulivai sosoo ane ai ma Vaimauga Jr High Sch, ona faigaluega lea i le Fletcher ae tuua ai Samoa mo Niu Sila i le tausaga e 1986.
O le tausaga e 1988 na faaipoipo atu ai isi ana manamea le faletua ia Rasela Taeao. E toaono ona tuafafine ae toafitu ona uso ma e na o ia lava o le fanau ua toesea e ala i le maliu ma le oti.
O se tasi o molimau pito sili ona taua sa ta’ua e se tasi o ana uo ia Iupeli Sua o ia o se tasi e toa sefululima i ai tagata ua faamanuiaina i le agalelei o Tuulemaga e ala i lona faatalosagaina lea o ni avanoa faigaluega i lana galuega, o le ala lea na le mafai ai ona gugu le alii o Iupeli ona ua lima tausaga o manuia si ona aiga ona o le galuega sa sueina e Tuu mo ia aemaise nisi o ana uo.
O upu faalaeiau o le afiafi sa faafiafiaina le aofia i le puupuu ma suamalie sa tapenaina e Pr Sam Afamasaga ua fetuai lelei ma le vela o le fala.
O le matagofie o pesega mālie a le autalavou a Logan City ma fanau a le aiga ma nisi sa fai lea ma faamafanafanaga i-aiga-na lua faanoanoa.
Sa saunoa mamalu le susuga i le faafeagaiga ia Pr Sam Afamasaga, o le maliu o Tuulemaga atonu e iai nisi ua latou faamasinoina poo fea o tu i ai Tuu, a o lona talitonu e sili pe a taatia lea tulaga ae tuu atu i le Faamasinosili i le lagi ua na o Ia le Faamasino Sili e toatasi.
Ua malolo atu nei o ia i le palapala e moe ai e faatali ai le aso e afio mai ai le Alii Faaola o Iesu.
O le aufaigaluega Paia a le Atua sa taitaia le sauniga i le taeao o le Aso Faraile, o le Susuga ia Pr Ieti Ah Sue, Susuga ia Pr Sam Afamasaga, Susuga i le Faafeagaiga ia Aitui Fanene, Susuga i le Faafegaiga ia Tusitina Faiumu Ioane, ma le Faafeagaiga ia Andrew Feaveai. Na faaiuina i se taumafataga tele ina ua maea ai ona toe sauniga i lona fanua maliu i Beenleigh i le Aso Faraile na sei mavae atu nei.
