Ole maliliu ose ulugalii aemaise ai ole faafeagaiga ma lona faletua ma fai faatasi lo la falelauaisga, “ose mea uigaese tele.”
Ina ua maliu le faafeagaiga ia Sefulu ile Aso Toonai na tonu i lona aiga e fai ona toe sauniga ile Aso Faraile ole vaiaso na sosoo ai.
Ua amata ona teteu ma faamamā le fasi fanua kuata eka i Falelauniu ole aiga e taoto ai le faafeagaiga. Sa pisi ona tauaiga, faapea lona faletua le tina ia Litia male fanau ma aiganalua e tapenapena mole aso ua taupoina.
Ole fasi fanua lea na taoto ile va o aiga e lua i Falelauniu na vaaia le mamā faafuasei ile vaiaso talu ai, eli ai le tuugamau mole faifeau, ma faatu ai le faleie e faamalumalu ai le faiga ole galuega mai le vevela tele ole la.
“Sa sau lava le faletua ile tele o taimi a‘o tapena le fanua, e oo lava ile Aso Lulu na maliu ai o sau lava ile matou galuega,” ole faamatalaga ale uso o Sefulu oloo faamatua iai le galuega o tapenaga ole fanua, le tofa ia Faleao Tauveve, “ole taimi mulimuli lava na ma talanoa ai ma Litia ole afiafi ole Aso Lulu.”
Molimau Faleao, na sosolo mai lava le taavale omai uma i fafo tagata nai totonu ole taavale, matou talanoa ma faifaimea ai lava ile matou galuega oloo fai. Pe tusa ole tolu itula faatoa alu ese atu le taavale, ae oute lē iloa o la sa saofai mai ai lava le faletua i totonu ole taavale i lea taimi atoa.”
Na faatoa iloa atu e Faleao le faletua ile taavale ina ua liliu ole a toe foi. Ma sa ia savali atu loa iai, e faamalo ma fesili iai, pe iai se mea e manao ai, ona sa tilotilo mai lava ile fanua oti”.
Faamatala e Faleao ole afiafi lava lea ole Aso Lulu na o ai le faletua ma lona alo e ave ile falemai, ina ua manao ane e ave ia ile falemai.
“O iina na faamavae ai isi ana tama teine lea a‘o agai atu ile falemai ma maliu ai lava ile maota gasegase i Motootua.”
“Sa galulue mulimuli ai nei le faifeau male faletua ile ekalesia Metotisi i Lotofaga i Lefaga ma malolo ane ai i Alafua ina ua gasegase le faifeau” ole faamatalaga lea a Faleao.
Ua malilie aiganalua, ina ia tuu mai lo la aso ile vaiaso lenei e fai faatasi ai lo la sauniga. Ole saunoaga a Faleao, “O le polokalame ua iai mole taimi nei, e aumai i tua ile Aso Gafua ma tofafa ai i lo la aiga, ona faatoa teu lea ile Aso Lua.
E taunuu atu le tusitala ile fanua o faia ai le galuega ole tuugamau i Falelauniu, ma molimauina le toe tatala i tua ole tuugamau, ina ia fetaui lelei mole faafeagaiga ma lona faletua.
Na saunoa Faleao, “Ole fanua maliu na fau e na ole faifeau, ae o lea ua toe sosoo faalautele mo laua uma.”
Na faamatala ele alo tama ole faafeagaiga, e suafa matai foi ia Faleao, o lona tamā e maliu nei faatoa faalima ona tala lana penisiona, ua 65 ai nei tausaga o lona soifua. Ae o lona tina ua 59. Oni faalogona uigaese le mea na oo iai ile taimi na maua ai le tala ua maliu foi le faletua. Ile talanoa a Faleao Tauveve, na faigata ona talitonuina lea mea ua tupu, peitai e moni.
I sailiga ale tusitala na maua ai, e lē ole taimi muamua lea ua tupu ai se mea uigaese faapea ole maliliu ose ulugalii ma teu faatasi.
Ile afioaga o Pago Pago i Amerika Samoa na maliu muamua foi le tamā ole aiga, va i nai aso, ae maliu le tina ma teu faatasi ai lava.
E maliliu nei le faafeagaiga ia Sefulu ma lona faletua ia Litia, o faamalolo gasegase mai le Ekalesia Metotisi sa galulue ai i tausaga e tele.
