Ole Aso Toonai 13 o Setema ole tausaga ua mavae 2015 ile afiafi po, poo le itula e fitu sa alu ai le tamā matua 62 tausaga ole soifua e faatau solo ile au faipoloka ile maketi i Fugalei ana atigi taga. O lana masani lava lea e pei ona faaalia i faamaumauga a leoleo na faaleo ele faamasinoga ina ua aumai lana faaiuga ile faasalaga falepuipui ua amata tuli nei ole susuga a Tavita Tanielu 31 tausaga le matua.
Na afe le faatauga atigi taga ale tamā matua ile poloka ale toalua o Tavita. Fai mai leoleo na tatala ai le ie ole toeaina a‘o iai le fafine ma nisi o lona aiga ma le la tama teine. Na ita le fafine ile gaioiga lea ma ia valaau ai ile toeaina e alu ise isi mea e sulu ai lona ie, ae na tali atu le toeaina e tapugi le gutu ina ne‘i alu atu tu‘i, ma ia lafo ai se upu masoā mamafa ile fafine le toalua o Tavita. Na faaalia foi e leoleo sa ‘onā pe faasua‘avā le toeaina ile afiafi lea.
Na fetaui le faatauga atigi taga ale toeaina ma Tavita ua alu atu ile maketi ile afiafi lava lea. Na fai iai le toeaina pe faatau ni ana atigi taga ma sa o ane loa ile poloka ma faatonu e Tavita lona toalua e avane se tupe faatau ai ni atigi taga. Peitai na ta‘u loa ele fafine le gaioiga na faia e le toeaina lea na tatala ai lona ie a‘o iai ma le la tama teine ma isi tagata o lona aiga.
Na toatamai tele Tavita ina ua faamatala atu lea gaioiga ma e lei toe faatali ae ia poina malosi loa le alafau taumatau ole tamā matua. Na palasi i lalo le toeaina ma sasa le ulu i luga ole fola sima ole maketi. Na vaai atu Tavita o mea masei mea ona ia nanati lea ma avane ni pakete vai ma taumafai e asu atu i foliga ole toeaina e tau faate‘i ai i luga, peitai na faaalia e leoleo na fiu e fai lea gaioiga ae oloo matapogia lava lē na aafia ile faaoolima.
Na faavave atu loa Tavita ma se isi tagata ile maketi ma ave ile taavale le toeaina ma agai loa ile falemai i Motootua. Na taofia ai ile po lea ole Aso Toonai ae ole Aso Tofi ole vaiaso na sosoo ai ua lē manuia lava taumafaiga a fomai ma faapea ona maliu ai le tamā matua.
Ole lipoti ale falemai na ta‘ua ai ole palasi ole toeaina i luga ole fola sima ole maketi na afaina ai ise manu‘a i lona ao ma ta‘e ai le ipu o lona ulu. Ole mafuaaga lea ole lē mafai ona toe te‘i mai ina ua matapogia ma ole pogai foi lea ole uma o lona soifua.
Ina ua aumai le faasalaga ale afioga ile faamasino o Vui Clarence Nelson na amata le faasalaga ile lima tausaga ae na toesea le lua tausaga ona o itu lelei e pei ole ioe o Tavita ile moliaga, lelei o lana amio i lona nuu, ekalesia ma lona aiga ma ose tagata foi e tauivi mo le atinae o lona toalua ma lana fanau.
Na totoe ai le 3 tausaga ma avea loa ma faasalaga mo ia ile falepuipui. Peitai na sii ane le aao o Tavita mo se avanoa ma tuu iai ele faamasino.
Ole taimi lea na ia tutulu ai ma faailoa ile faamasinoga e toe tuu atu se avanoa mo ia ona e alofa tele isi ana fanau aemaise o ia ole faalagolagomaga ole aiga i mea uma.
Na faailoa iai ele faamasino e lē na‘o ia ua tuu atu se manaoga faapea, peitai e lē mafai ona toe suia le faasalaga ona ole tagata ua uma le soifua ile gaioiga ma le solitulafono sa ia faia. E saunoa atu le faamasino ae sa molimauina lava le nanau ane o Tavita mo se suiga ole faaiuga peitai e lei iai lava se isi avanoa.
