O foliga o se pasi la‘upasese e fealuai i le va o Apia ma Manono e iloa ai le matautia o le faalavelave na tupu i le Aso Tofi o le vaiaso talu ai ina ua oso i tua le pasi ma le alatele i se vaega o le auala mai le malae vaalele i Faleolo agai atu i le uafu i Mulifanua.
E tusa ai o ni molimau e lei faamaonia o loo ta‘ua e faapea e toafā nisi sa malaga i le pasi i le taimi na tupu ai le faalavelave. E toalua na ave i le falemai ae o le avetaavale ma se isi toatasi o le pasese ua na o ni manu‘a mitimiti.
E lē o iloa le mafuaaga o le faalavelave ae o le tala a ni molimau e iai le talitonuga sa moe le avepasi na mafua ai ona oso i tua ma le auala ma taavalevale ai loa ma u ai i lalo le fale o le pasi ae u i luga pa‘u seia oo ina mafuli ma faaleagaina ai le fale atoa o le pasi.
O le pasi na sau mai Manono e agai i Apia ae lavea ai loa. I se lipoti lata mai i se tasi nusipepa i Samoa, o loo ta‘ua ai, ua faasolosolo ina manuia manu‘a o le alii avepasi o loo iai i le falema‘i i Motootua, ae oo mai le taimi nei, e lei mafai lava ona faia ane sana faamatalaga ma‘oti i le au tusitala e pei ona taumafai atu i ai.
