Malele Ao o le Malo, e tāua le temokarasi i galuega faapalemene

O galuega fai ma tiute tauave o Palemene e faavae ana pulega i le faatemokarasi e matua tele. O le tiute tauave lea e maua ai le toamalie le filemu ae faavae uma i ni pulega e manino ma malamalama auā o le autu ma le fatu lea o pulega lelei poo le good governance.
O le Malelega a lana afioga i le Ao o le Malo, Tui Atua Tupua Tamasese Efi, na tatala ai le fono lona 45 a Fofoga Fetalai o le Pasefika faapea failautusi o fono aoao faapalemene ma sui o faipule o le Pasefika na manino ai le faatāua o le autu o pulega lelei e faavae i faiga faatemokarasi.

O le ‘ava o le feiloaiga na saunia e le aufaigaluega a le Matagaluega o le Fono Aoao Faitulafono i Mulinuu na molimauina e sui auai o le fonotaga ona e fou foi i le latou silasila a tatou tu ma aganuu pe a taunuu ni Malo aemaise o sui mamalu o Palemene o isi Malo ma atunuu.

Na faasolo le agatonu o le feiloaiga ma taumamafa uma sui o atunuu ae na moto le agatonu ma taualuga le faaaloalo maualuga i le taute o le afioga i le Ao o le Malo, a o molimau e sui mamalu o le tatou Malo e pei o le afioga i le Palemia, le Fofoga Fetalai ma faipule o le tatou Palemene.

O le saunoaga a le Fofoga Fetalai, susuga Laauli Leuatea Polataivao, ina ua mae‘a le fono mulimuli a Fofoga Fetalai o le Pasefika i le lua tausaga ua mavae, e lei tau sailia se lagolago a Samoa mo lona fia talimalo ona sa fulisia uma atunuu e usu mai i Samoa le fono o le tausaga nei.

O le finagalo o Laauli i tusitala, o lea fulisia o le lagolago e faia mai i le atunuu le isi fono ona o le fia sailiili lava pe aisea e filemu ai pulegamalo a Samoa, ona e vevesi lava faigamalo a isi atunuu o le Pasefika ae toamalie lava lo tatou atunuu.
O se tala ave lelei lea e pei ona faaalia e le Fofoga Fetalai. O le faagasologa o le fonotaga i le vaiaso ua mavae sa laga ai e nisi o usugafono le laasia e Samoa o se sitepu i luga atu o faiga faapalemene, o le iai o ni nofoa ua faapitoa mo sui faipule tamaitai.

E lagolago i ai nisi atunuu ae o nisi Malo o loo latou teena, ae o nisi foi atunuu o loo faatalatalanoa ma fetuutuunai le tofa ma le faautautaga pe o se faiga ua tatau ma talafeagai ma pulegamalo faatemokarasi atoa ai ma le faatāuaina o aiā tatau.

O le mataupu lenei sa lē faigofie ona talia e le Palemene o Samoa, ae ua taunuu lava ina ioeina e le fono aoao, ma o le palota tele o le tausaga e 2016 o le a faatino ai le filifilia o faipule tamaitai e toalima e faavae i teuteuga ua faaofi i le Faavae o le atunuu.Ua tauaao e le afioga i le Ao Mamalu o le Malo, Tui Atua Tupua Tamasese Efi, lana ‘ava taute i le agatonu na faafeiloai ai sui faipule ma Fofoga Fetalai ma failautusi o Palemene o le Pasefika