E tele ma anoanoai mafua’aga e tatau ai ona nofo silafia ma aoaoina pe o le iai foi o se malamalama’aga lautele i aiā faaletulafono, o soo se tagata sitiseni poo se tagatānuu Niu Sila – pe ua nofomau pe o loo tālia foi se faaiuga mo se talosaga nofomau.
O le tautua a le Mangere Community Law Centre, ua silia ma le 23 tausaga o faatinoina la latou polokalame ua ta‘ua o le ‘Law in a Nutshell’. E valu vaiaso le umi e faatautaia ai nei polokalame tau aoaoga, ma e faatolu i le tausaga ona faatautaia.
E toatele nisi o tamalii o loo galulue faaloia faapea foi ma isi matagaluega o le Malo, o loo avea ma faiaoga o lenei polokalame tau aoaoga, e pei o le susuga ia Pani Chamberlain, ua loa tausaga o tautua mo le atunuu e ala i le Matagaluega o alii ma tamaitai Leoleo a o lei avea ma alii loia.
Ua tuufaatasia i lenei faatautaiga se otootoga o mataupu eseese tau tulafono, e aogā mo le malamalamaga lautele o soo se tagatānuu. O mataupu e pei o aiā tatau i tulaga tau galuega (Employment Law), faiga o se uili (Making a Will) aiā faaletulafono mo ē o loo alala i fale mau totogi (Tenancy Law) aiā faaletulafono mo le tupulaga (Youth Justice) aiā faaletulafono i le va feagai ai ma malu o le Malo (Police Powers) tulafono tau femalaga‘iga (Immigration Laws) ma le tele o isi mataupu aogā mo le silafia lautele o nai o tatou tagata.
O le Aso Lulu, 6 Aukuso, o le a amataina ai le isi foi polokalame faapea e valu vaiaso lona umi, ma e lē tele foi ni avanoa o loo faapea ona tuuina mai mo ē o loo fia resitala suafa ina ia auai atu i lenei polokalame.
E mafai ona manino atili nisi o tulaga o loo fia silafia pe a fesootai le susuga ia Pani Chamberlain poo le Mangere Community Law Centre i le telefoni 2754310.
