Ou te faafeiloai atu i le agaga faaaloalo i le paia ma le mamalu o si o tatou atunuu Samoa.
E iai le talitonuga o loo manuia mea uma i lona alofa ma lona faatasi mai. E ui e iai taimi e fesouaina ai le soifua ona o tulaga i mea e tutupu, ae laualuga lava le faamoemoe o le Atua o lo tatou fesoasoani, o ia tatou te malu ai.
O faalavelave ma mea tiga e feagai ma tatou o mea ia e le alofia. Peitai ua folafola le Atua mo i tatou e leai se mea e taofia ai lona alofa mo oe ma au.
E le mafai e le oti poo agelu, o mea i nei onapo ia poo se isi lava mea ona faateaeseina oe ma au i le alofa tunoa o lo tatou Atua. O le malosi lena ma le loloto o lona alofa le faatuaoia mo i tatou.
O le tala i mea o le a tutupu e pei ona tatou iloiloina i le Tusi o Faaaliga, e atagia ai lava le alofa o le Atua. E mafai ona tatou fesili faapea, Aisea ua mafua ai le tele o nei mea uma?
Aisea e tau ai taua ma le tiapolo ma ana au poo temoni? Aisea e toe afio mai ai Keriso e aveina lana ekalesia? Aisea ua oo mai ai mala atoa ma le toasa o le Atua ia Satani…..?
O le tali, e mafua nei mea uma ona o le le mapu o le alofa o le Atua i le laveaiina o oe ma au mai le tiapolo. O le alofa o le Atua ina ia o tatou maua le ola e faavavau.
I le mataupu e sefulufitu o le Tusi o Faaaliga o loo faamatalaina ai le manufeai e fitu ona ulu. Manatua foi o nei ata poo nei faamatalaga e faavaloaga. E pei o se tupua o loo tau faamatalaina. O nisi o taimi e uiga sautualasi nisi o ata o loo faamatalaina ai mea o le a tutupu e pei ona tatou iloa i le vaiaso ua tea, o le faaaogaina o le upu talitane e faatusa i le tulaga o le o ese o tagata o le Atua mai ia te ia ae avaga atu i atua ese.
I le fuaiupu e sefululua o loo faamatalaina ai nifo e sefulu na iloa, o tupu ia e toasefulu ua le oo ina maua o latou malo ae maua e i latou le pule pei o tupu e tasi le itu aso faatasi ma le manufeai.
I le taimi e pulea ai e le anetikeriso le lalolagi, o le a iai ma isi tupu e sefulu o le a pule i lalo o lana pulega. O le tala a le agelu e le o iai i le taimi nei i latou, ae o le a avea i latou mo sina vaitaimi puupuu. E toatele i latou o loo masalomia o le faalapotopotoga soofaatasi a atunuu Europa poo le European Union, o loo faatatau i ai le fuaiupu lenei. Ia o le tali, tailo e leai se tasi na te iloaina pe valoia vagana ua oo i le taimi e tulai mai ai ona faatoa manino lea.
Pau le tulaga tatou te mautinoa, o le a pulea e le anetikeriso nei tupu i le lalolagi. O tupu nei o loo vaaia e Ioane i le Faaaliga na faapea foi ona valoia e Tanielu i le mataupu e 7.
Faafofoga i le mau a Tanielu: Mulimuli ane na ou iloa ai lea i le faaaliga i le po faauta mai, o lona fa o manufeai ua matautia ma ua maaa, ua matua malosi lava ua iai foi nifo uamea tetele, ua ia aina ma lamupalaina, a o mea ua totoe ua na soli i ona vae. E ese lava ia manufeai uma na muamua ia te ia, sa iai foi nifo e sefulu i lona ulu.
Na ou manatunatu i nifo, faauta o le tasi nifo itiiti ua tupu i le va o ia nifo, ona fa‘iesea lea i ona luma o nifo e tolu sa uluai tutu, faauta foi, ua i lenei nifo o mata e pei o mata o le tagata, atoa ma le gutu ua tautalatala i upu faasausili. O le faamalamalamaina o lenei faaaliga o loo faamatalaina lava lea i le fuaiupu e 24 ma le 25 e faapea: O ona nifo foi e sefulu o lenei malo, o tupu e sefulu ia, o le a tutu mai; e mulimuli ane foi ia te i latou ona tu mai o le tasi, e ese o ia i e na muamua, e faatoilaloina e ia o tupu e toatolu. Na te faia upu i lē Silisili ese ma faaumatia le au paia a lē Silisili ese, e manatu o ia e faaliliu i tausaga ma tulafono; e tuuina atu foi i latou i lana pule seia mavae le tausaga ma tausaga ma le vaeluagalemu o le tausaga (a tuufaatasia ma faamalamalamaina e 3 ma le afa tausaga).
O le a tuuina uma atu le lagolago a tupu nei e sefulu i le anetikeriso i le taimi o lana nofoaiga. O tupu nei e toatolu o le a faatoilaloina pe suia foi i totonu o le taimi o lana nofoaiga.
O tupu nei o le a faasagatau i le Alii o Iesu Keriso. ‘Latou te tau le taua ma le Tamai Mamoe ae manumalo le Tamai Mamoe ia te i latou, aua o le Alii ia o alii, o le Tupu foi ia o tupu.
O le taua o loo ta‘ua i lenei fuaiupu e pei ona tatou talanoaina muamua, o le taua lea e faaigoaina o Amaketo, lea o le a tauina e Keriso i le taimi e toe afio mai ai o ia i le lalolagi e pei ona taua i le mataupu e 19.
O le vaega taua e tatau ona manatua e le tupu lea vaega seia maea ona ona liligiina mai le ipu lona ono a le agelu, lea e amata ona tuufaatasia ai o nuu uma e faasagatau i le Keriso.
O se taua e mafai ona faamatalaina e faapea, e tau ae ua iloa le iuga e faiaina. O se taua e faiaina lona iuga, ae tau pea e faailoa ai le tetee tele o le anetikeriso i le Atua.
Ou te le iloa pe faapefea ona faamatalaina, ae o le vaai faalemafaufau i ai, o le a gasolo uma fitafita ma fuavaalele, o vaatau ma tane tau ma mea tau matautia a malo nei e sefulu atoa ai ma i latou uma e au i le anetikeriso, ma o le a agai atu lea i Palesitina i le nofoaga e tau ai le taua o Amaketo.
O le uiga lava lenei o le tiapolo mai lava i le amataga o le faasausili ma le fiatagata. O ia lea ua ulutinoina tupu ma malo ma faaseseina i latou ina ia faasagatau i le Atua.
O se lesona tatou te aoaoina mai i lenei mataupu, o le tulaga lea i le auala e galue ai le tiapolo ina ia faaseseina o tatou mafaufau ina ia aua nei mafai ona tatou alolofa i le Atua ae ia faasagatau ia te ia.
A oo ina pulea e le tiapolo le loto o le tagata, ua matua leai se auala e mafai ona mei i ai. Ae o le Atua ua ia tuuina mai le loto faitalia mo i tatou e tatou te filifili ai.
O nei tupu ua pei o ni masini e faatonutonu i se remote e le tiapolo.
Ia fesoasoani mai le Atua mo i tatou ina ia mafai ona maua le loto maualalo tatou te ola ai mo le Atua i lona alofa tunoa. Ae i le taimi e tasi, aua nei o tatou taaalo i lona alofa tunoa, aua e le ulagia le Atua, e le faaseseina o ia, ma e tonu ma sao lana lava faamasinoga.
Ia manuia lenei vaiaso
Soifua
