I le suafa o Keriso lo tatou Alii Faaola, ou te faatalofa atu ai i le paia ma le mamalu o Samoa i soo se tulimanu o le kelope o mafai ona maua ai lenei tusitusiga.
Malo le soifua maua ma le lagi e mama. E manatu maualuga o loo manuia le tapuaiga a nai o tatou matua matutua, o nai matua tausi o loo faia pea le faiva o le tapuaia o feau ma galuega a le fanau. Faapea le mamalu i le aufaigaluega a le Atua i soo se ekalesia Kerisiano o loo latou siitia ai le suafa o Keriso le Faaola. Faafeiloai atu foi i le loaloa o si o tatou atunuu i ona tulaga faalupeina.
Malo lava le onosai ma le faamalolosi. Alo mai o le a faaauau le tatou suesueina o le Tusi o Faaaliga. I le mataupu e lua o loo tatou iai, o loo tatou matamata ai i Ekalesia e fitu ma feau na tuuina i ai e le Keriso e ala i le Faaaliga. O le ekalesia lona lua o le ekalesia lea ia Semurana.
O le tusi i Semurana (2:8-11)
“Ia e tusi foi i le agelu a le ekalesia i Semurana. O mea nei ua fai mai ai le muamua ma le mulimuli, o le na oti a ua ola mai. Ua ou iloa au galuega ma lou puapuaga, ma lou mativa a ua e tamaoaiga ma le upu faifai a e ua fai mai o Iutaia i latou ae e leai lava, a o le sunako o Satani i latou.
Aua lava e te fefe i mea o le a e tiga ai. Faauta o le a tuuina atu ni o outou e le tiapolo i le fale puipui ina ia tofotofoina ai outou e po agafulu foi e puapuagatia ai outou. Ia e faamaoni seia oo i le oti ona ou avatu ai lea ia te oe o le pale o le ola. O le ua iai taliga, ina faalogo maia ia i le mea ua fetalai mai ai le Agaga i ekalesia. O le manumalo e le afaina lava o ia i le oti faalua.
O loo amata le tusi ia Semurana e ala i le faailoa atu o Keriso, o le na puapuaga ma oo ina maliu peitai na toe tu mai o ia. O se faamafanafanaga lea mo le ekalesia i Semurana ona o i latou foi o le a oo i ai puapuaga e pei ona oo ia Keriso. Peitai na manumalo Keriso i le oti e pei ona tuuina atu ai lenei feau faamalosiau ia Semurana. E ese le taua o le avea o Keriso ma faataitaiga ia i tatou i taimi e tiga ai, aua tatou te iloa e le po pea se nuu, e le tumau pea faigata, o le olioli e tupu i le taeao, e oso pea le la.
Peitai o le finagalo foi o le Atua ina ia tatou tiga mo Keriso (Filipi 1:29)
O le ekalesia lenei e mafai ona faaigoaina faapea o le ekalesia puapuagatia. E le gata o galuega mamafa ma faafitauli, ae o loo aafia foi i latou i le mativa. Fai mai le siufofoga o Keriso, “Ua ou iloa”. E leai se mea faigata e le silafia e le Atua. E ui o le faigata o loo feagai ma le ekalesia e lei mafai lea ona tuu ai lo latou alofa i le Atua e pei o le Ekalesia i Efeso. O Efeso e maua mea ma lelei le tamaoaiga o tagata. Ona galo ai lea o le Atua. O Semurana o loo tumau pea i le Atua e ui ina le tagolima.
O loo silafia e le Atua le mativa aua e oo lava i le Alo o le Atua o le ona le lagi ma le lalolagi uma lava na ia iloa le le tagolima. Fai mai le mau a Keriso “E fai lua o alope, e oo foi i manu o le lagi e fai o latou ofaga, ae o le Atalii o le Tagata e leai se mea e taoto ai lona ao pe leai se mea e moe ai (Mataio 8:20).
E faapena le galuega a le Atua, e iai taimi e faigata ai ma le tagolima ai. E iai taimi e tiga ai mo Keriso. E iai taimi e tuuina uma ai mea tatou te maua mo le Atua ma lona finagalo. Peitai o le upu lava a Keriso, ‘E le maumau so outou taui”.
O Semurana ua avea o se ekalesia ua faifai i ai tagata. O le tiapolo lava lea e pei ona fetalai ai Keriso. A o iai Keriso i le laueleele, sa faapea foi ona faifai i ai tagata ma faatiga ia te ia ma lamalama ia te ia e pei o le au Faresaio ma le au Tusiupu. O i latou na sa feteenai ma Keriso ma faailoa atu i ai e Keriso ona o le Tiapolo, o lo latou tama o loo taofia i latou mai le iloa o le Upu o loo ia fetalai ai (Ioane 8:43-44).
Ua tuuina atu e Keriso i lenei ekalesia le faamalosiau ina ia tumau. E moni lava e pei ona tusi Paulo i Efeso, o le taua e le o faia faasaga i tagata ae o le tiapolo lava ma ana au o agaga leaga (Efeso 6).
E taua le onosai ma ia olioli i taimi o tiga e pei ona apoapoai ai Peteru i le ekalesia (1 Peteru 4:12-13).
Sa faapea foi ona tusi Paulo i le ekalesia i Roma ma tuuina atu foi i ai le feau e tasi ina ia onosai i mea tiga, aua le ‘faatusaina o tiga i ona po nei ma le manuia o le Atua o le a faaali mai mo i tatou’ (Roma 8:18).
Ae o Keriso na ia fetalai “Amuia outou pe a latou upu leaga ma faasaua ia te outou ma latou tuuina pepelo outou i mea leaga uma ona o au. Ia outou olioli ma fiafia lava aua o i le lagi lo outou taui e tele” (Mataio 5:11-12).
Ua folafola foi e le Atua ia Semurana le pale o le ola pe afai e faamaoni ma tumau seia oo i le oti.
O le pale o le ola e le o le faaolataga poo le ola e faavavau. O le ekalesia i Semurana o tagata faatuatua i latou. Peitai o loo folafola e le Atua le taui mo i latou. O taui o loo taua e le Tusi Paia e faamatalaina o Pale.
O Pale i ia ona po sa faaaogaina e faaeaea ai se tagata lauiloa aemaise o tagata manumalo i tausinioga ma taaloga. E masani ona faaaoga pale laulaau. O le lagi o loo ua iai pale ua saunia mo le au Kerisiano faatuatua i le Atua.
O le pale o le ola e foaiina atu lea ia i latou ua sauaina ona o le tala lelei (Iakopo 1:12). O loo iai foi isi pale ua saunia e le Atua e pei o le pale e le pala mo i latou e taunuu i le taunuuga, e le tamoe ma le faaletonu (I Korinito 9:25). O le isi pale ua faaigoaina o le pale o le olioli, lea o loo faapea mai ai Paulo i le ekalesia i Tesalonia e mitamita ai (1 Tesalonia 2:19). O le pale mo i latou e manumaloina agaga.
O le pale mo i latou o loo molimauina le afioga a le Atua. O se tasi pale o loo taua o le pale o le amiotonu (2 Timoteo 4:8). O le pale o loo faananau i ai Paulo e pei ona tusi ai ia Timoteo. O le pale lea mo i latou e naunau i le toe afio mai o Keriso. Atoa ai ma le pale mulimuli o le pale pupula.(1 Peteru 5:4) O le pale lea ua teuina faapitoa mo i latou o loo leoleoina le lafu mamoe, i latou o loo fafagaina le fanau a le Atua i le Upu. I se isi faaupuga, o le pale lenei mo faifeau ma i latou o loo aoaoina le afioga a le Atua.
O le a le taua o lo tatou iloa o nei pale? E taua lea i le tausinioga o loo fai nei aua e leai se tasi e tu faamauga, e leai foi se tasi e le lagona le faavaivai ma le tiga. Ae a tatou iloa o loo iai le taui mo i tatou, ona fesoasoani lea i le faamalosi ma le onosai i taimi o puapuaga. Soo se tagata taalo lava, e fetaiai ma le tiga o toleniga ma tapenaga. Peitai o le vaai i luma i le taimi e faapaleina ai ma taina le vii o lona atunuu o le a avea lea ma faasiliga malosi i le faigata.
O le feau a le Atua ia Semurana faapea i tatou uma. Onosai. Tumau. Faamalosi o loo iai lou taui!
