Talofa lava Samoa le atunuu pele. E iai le talitonuga o loo maualuga pea le agalelei o le tatou Atua i lo outou soifua.
Alo maia, o le faaauauina lenei o le tatou Malamalama i le Tusi Paia, o se fesoasoani poo se aotelega ina ia maua ai se ata ma se malamalaga o le Afioga a le Atua.
Faafetai ia i latou o loo faailoa o latou finagalo e uiga i lenei tusitusiga aemaise foi o fesili. E pei lava ona ou avatu i le amataga o le talanoaina o le tusi o Faaaliga, e tele auala e faamatalaina ai lenei tusi ma ese foi talitonuga ma taofi o Ekalesia i mataupu silisili o loo i totonu o lenei tusi.
O loo taumafai lava e faamatalaina lenei tusi i se auala faafaigofie ma gagana o aso uma ina ia malamalama aua e tele upu faa-Peretania, ma upu faatelosia poo le faafiolotia e leai ni o latou upu faa-Samoa e faamatalaina.
E lelei le talanoa pea i le faifeau o le tou ekalesia e fesoasoani atu i le faapupulaina atili o lenei tusi ma lona feau taua o loo iai aua le faatuputeleina o le ola faaleagaga ma le alofa i le Atua, atoa ai ma le fiafia i lona faaali mai.
O nisi ua na ona manatu e faatauaina pe faateleina le iloa i le faaliliuina o le tusi o Faaaliga, peitai a le ola e tusa ma le finagalo o le Atua e ala i le faaaogaina o aoaoga, ona leai lea o se aoga e iloa ai, ae le ola ai.
E mafua ona taua lenei tulaga ona o nisi ua naunau e avea le Tusi o Faaaliga e fai ma faafinauga ma faailoa ai le poto faapea o ia e malamalama i le Tusi. Ou te talitonu e le o le finagalo lea o le Atua. E le o le agaga foi lena o lenei tusitusiga.
O se faataitaiga e tuuina atu ona o loo manatu nisi o le afio mai o Keriso e muamua ae lei amataina le fitu tausaga o puapuaga. O nisi e manatu e afio mai Keriso i le ogatotonu o le fitu tausaga o puapuaga ae lei oo i le puapuaga tele.
E mafai e le tele o mau ona lagolagoina uma vaega nei e lua. E ui o loo iai le vaega o loo faaautu i ai le manatu o le tusitala, ae iai le lagona e faapea o le tagata e naunau i lona faaali mai, o le tagata e naunau i le aso o le Alii, o le tagata o loo ola mo Keriso e leai se popole i lea tulaga pe afio mai Keriso i le amataga o puapuaga poo le amataga o puapuaga tele, poo le afio mai nanei e le o se mea e afaina tele lea aua o loo e naunau e fia mafuta i le Alii ae le o le naunau e faamautuina e moni o ia i le taimi tonu e afio mai ai Keriso I lona talitonuga.
Ae ui i lea e pule Sitafune i le la o lona vaa atoa ai ma lona finagalo ae o le lagona vaivai o le tusitala ina ia avea lenei tusitusiga ma auala e maua ai sina malamalamaga, ma atili ai ona faaosofia lou alofa i le Atua ma lou naunau ia avea Keriso ma lou Alii ma lou Faaola.
I le mataupu e valu e amataina lea i le tatalaina o le Faamaufaailoga lona fitu. O le faamaufaailoga lona fitu e amata ai le faailoaina mai o Pu e fitu ua sauni agelu e iliina.
Manatua foi o Faamaufaailoga e lima muamua na faataunuuina i le tolu ma le afa tausaga muamua o Puapuaga. O le Faamaufailoga lona 6 e amata ai le taimi o Puapuaga Tele. O le amataina la o Pu e fitu o le taimi lea ua matua afaina tele le lalolagi i le tele o mala ma faigata.
Ina ua tatala le faamaufailoga lona fitu na matua lologo le lagi ma sao mea uma ua leai se pisa poo se pao mo le afa itula. Ina ua iliina e le agelu le Pu Muamua na faapea ona faaleagaina uma le tasi vae tolu o laau, o vao iti lauolaola uma o le lalolagi (8:7)
Ua ili le Pu Lona Lua ona vaaia lea o se mea e foliga o se maugamu tele ua lafoina i le sami. Ona liu toto ai lea o le tasi vae tolu o vaega o le sami.
A mafai ona e taumafai e faataamilo ane i le mafaufau mea nei o loo tutupu i le mataupu e valu, ona e silafia lea le matuia ma le matautia tele. Afai e foliga mai o se mauga tele o loo ua pau ifo mai le lagi, o lona uiga o le taimi e fetaiai ai le vevela ma le malulu o le sami o le a iai se mea matautia e tupu. E le gata i le ono tutupu ai ni galulolo i le malosi tele o le pau o lenei mauga afi i le sami ae o vaa foi o le a faatamaia atoa ai ma meaola o le sami.
O le Pu Lona Tolu, na pau mai le lagi se fetu tele ma faaleagaina uma ai vaitafe ma puna o vai. O le igoa o lenei fetu o Oona. Ona oona ai lea o lona tolu o vaega o vai ua oti ai foi tagata e toatele ina ua faaoonaina.
E faasolosolo lava ina matua faaleagaina le lalolagi atoa. Ina ua ili le Pu Lona Fa, sa faapea ona faatamaiaina uma ai malamalama o le lagi. Ua afaina le tolu o vaega o le la, tolu o vaega o le masina, ma le tolu o vaega o fetu.
Ona oo mai lea o le pouliuli i le lalolagi. Atonu o se taimi sili lea ona oo ai le matau ma le fefe i le lalolagi. O le pouliuli o se mea lea e fefefe ai le toatele. E feololo pe a tutupu faalavelave a o malamalama, ae a tupu i le pogisa, e le mailoa poo fea e oso i ai ae o fea o loo sau ai le mea e ono lamatia ai le soifua. O se isi tulaga matautia ua iai nei le lalolagi, ua na o le sefuluono nei itula o le aso ua iai.
O Pu mulimuli e tolu o totoe ae lei iliina, na iloa e Ioane se aeto ua lele i le taulotoaiga o le lagi ma alaga faapea ‘Aue, aue, aue i e o nonofo i le lalolagi ona o isi iligapu a agelu e toatolu o le a ilia mai. (8:13)
Manatua o loo tatou iai nei i le loloto o sauaga ma faigata ma puapuaga i le lalolagi. O isi mala ia o le a sosoo mai, e leai se tagata e fia ola i le taimi e iliina ai le pu lona lima.
O le taimi lava e iliina ai le Pu Lona Lima o le taimi lea na pau ifo ai le fetu mai le lagi. O lenei fetu e talitonu o Satani lea, e pei ona molimau Luka e faapea, ‘ua vaaia foi Satani ua pau mai le lagi’ (Luka 10:18).
Na tuuina atu i ai ia Satani le ki o le to e le gata, ona ia tatalaina ai lea o le to o loo iai uma agaga leaga o temoni ma agelu na tulia mai le lagi sa faapea ona faafalepuipuia ai. (2 Peteru 2:4; Iuta 1:6)
Ona alu ae ai lea o le asu atoa ai ma se akerise ua iai le malosi e pei o akarava o le vao. Ua latou uina tagata ae le fasioti ia i latou. Latou te faataugaina tagata o loo totoe mo le lima masina i le ona o le u a le se akerise ua faamatalaina e pei ni solofanua o le taua.
O le taimi foi lea ua le mafai ona toe oti se tagata. E fiu le tagata e saili auala e fasioti ai ia te ia ae sola ai le oti.
Afai e te ono soifua i lea vaitau o le matua faigata tele mo oe, aemaise pe afai o loo iai sau fanauiti. Le faigata o le vaai atu i le fanau ua faataugaina e nei agaga leaga ma seoli e foliga i se se akerise, mata i tagata, tino i solofanua, ae tui e pei o le akarava. Ou te ofo ae faamaaa pea lou finagalo i le Atua.
O i latou ua taua o e faatuatua poo i latou na talia Keriso (Ioane 1:12) ua uma ona siitia i latou e Keriso ae lei oo mai puapuaga nei.
E leai se isi auala tatou te saogalemu ai ua na o Keriso.
O ia o le Ala i le lagi. O ia tatou te malu ai ma tatou sao ai. O le mautinoa o lou saogalemu mai nei puapuaga o le mautinoa lea ua avea oe ma atalii poo afafine o le Atua.
O le taimi o loo oi tagata le faatuatua i le lalolagi ona o faiga a Satani atoa ma puapuaga mai le lagi, ae o le taimi lena o loo alalaga fiafia le au Kerisiano i le lagi ma faia le talisuaga ma le Tamai Mamoe.
Salamo nei i au agasala, talia Keriso e fai ma ou faaola manu o maua lou avanoa ma solomuli nei mai le leaga ma le olaga tuai ae ola mo Keriso.
Soifua
Lui Ponifasio
