Malamalama i le Tusi Muamua a Peteru (3)

Ia tumau pea le viiga ma le faaneetaga i lo tatou Tama i le lagi. Ia mamalu pea lona suafa e faavavau, faavavau lava.
Ou te toe faatalofa atu foi i le suafa o lo tatou Alii o Iesu Keriso. Malo le soifua laulelei ma le lagi e mama, aemaise lava i nai o tatou tama ma tina matutua, ua pulapula la goto le soifua. Malo le onosai i tiga o le tino matua. Ua afu la outou tautua, malo le filiga i mea lelei.
E faafeiloai atu foi ia i latou e lei leva ona faitau i lenei tusitusiga, masalo o lenei ua sili atu i le lua tausaga o tatou suesueina pea le Tusi Paia i lenei tusitusiga ua faaigoaina o le ‘Malamalama i le Tusi Paia’. E le o iai se atoatoa ia te au i afioga loloto a le Atua, ae tau o se vaivaiga e maua ai se fesoasoani ma se faamalosiau aua lo tatou ola faaleagaga aemaise le mafutaga ma le Atua ina ia vavalalata.
Ae alo maia o le vaega tolu lenei o le Tusi Muamua a Peteru e pei ona tatou talanoaina i vaiaso e lua ua tuanai.
O le toe tepa i le vaiaso na tea nei na tatou iloa ai nisi o aoaoga a Peteru.
Vaega Muamua o le faamalamalamaina o le faaolataga o tagata faatuatua (1:1-12)
O le Vaega Lua o le iloa o le tagata ua faaatuatua ia Keriso e ala lea i le taumafai ina ia ola faamamaina, poo le ola faapaiaina. Ia faapaiaina mo le Atua i mea uma (1:13-2:12).
O le Vaega Tolu e faailoa le moni o le ola faaleagaga poo le ola faatuatua, o le naunau lea i le Upu a le Atua (2:1-3).
Na pau mai le vaiaso na tea nei le tatou tusitusiga, I le Vaega Fa o loo taua e Peteru o le ‘faia lea o taulaga faaleagaga’ (2:4-10).
I se isi faaupuga o le faia lea o galuega lelei e ofoina atu o se taulaga i le Atua. O a mea lelei uma e tau i ai lou mafuafua ma lagona e lou loto e tatau ona faia, o mea ia e viia ai le Atua.
O le a sosoo atu e ala lea i le Vaega Lima. Fai mai le luitau a Peteru i ekalesia Kerisiano, o le vaega lona lima e iloa ai le tagata faatuatua ma le tagata moni lava ua fanaufouina o le tagata lea ua taumafai ina ia mamao mai tuinanau (2:11-12).
“Le au pele, ou te aioi atu ia te outou o tagata ese ma e aumau, ia mamao outou ma tuinanau o le tino, o mea ia e tau ma le agaga.”
O se tasi nei o vaega e mafua ai ona talitonuina le moni o le ola fanaufouina poo le moni o le ola faaleagaga o le tagata ua fai mai o ia o le Kerisiano. O le leai lea o se ola ta vavaeina. O le tuinanau o le tino poo mea e loto i ai le tino ae ua leai se puleaina e le loto ma le agaga o le tagata. Atonu o se isi upu e mafai ona faaaogaina o le ‘ola le pulea’ sei tulou.
Manatua foi o le tagata na faia e le Atua i le ‘tino, loto poo le mafaufau atoa ai ma le agaga. Fai mai Peteru o le tuinanau o le tino e faasagatau lea i le agaga.
Afai e malosi le tino nai lo le agaga, e vaaia foi lava i lea tagata uiga o le tino. O uiga o le tino poo mea e loto i ai le tino ina ia faamalieina. Ona tulai mai lea o le fesili, ‘O a mea e tuinanau i ai le tino?’
Ou te talitonu o le fesili lena e mafai e i tatou uma lava ona tali. Ae o nisi nei o vaega e tatau ona tatou malamalama atili i ai. O le uiga o le tuinanau o le faauigaina i se itu e le lelei. E iai mea e tatau mo le tino ae pulea atoa e le tino e aunoa ma le faaaoga o le malosi o le loto poo le mafaufau ma le agaga ona avea lea ma agasala.
O vaega faigofie lava. O le tino e naunau i le fia ai ina ia ola. Peitai o nisi ua sao ai le faaupuga e masani ai, ua le ‘ai ina ia ola ae ua ola e ai’. Tulou lava. O nisi ua le mafai ona taofiofia le taumafa ua silafia lava le mai i taumafa ma le ova ae ua le mafai lava le tuinanau o le laualo ma le fofoga. O nisi o le tapaa. Tiga lava ona silafia ua leai se tupe ae faaalu lava le tupe o totoe mo le tapaa. Ua pulea e fofoga ma mama o le tino le tino atoa ua tuinanau i le asu.
O nisi o le faitaaga ma feusuaiga i fafo atu o le faaipoipoga, sei tulou. Ua uma ona faataatia e le Atua i lana Tusi Paia o le faiaiga o se mea e paia ma ua atofaina mo le ulugalii (Eperu 13:4). Peitai o nisi ua le mafai le tuinanau o le tino ua alu faasolo atoa ai lava, ma oo lava ina totogi ai tupe. O nisi o tuinanau o le tino e aofia ai ata tifaga poo TV ua e silafia lava e le tatau ona matamata ai. O le ava malosi ua le mafai lava e le mafaufau ma le agaga ona pulea, ua pulea e le temoni o le ava lou tino atoa ua le sao ai au tala, o lou mafaufau, atoa ai ma lau savali.
Talosia e le o faateia oe i nei tulaga, ae avea o se luitau mo i tatou aua o le agasala. Ua lapatai mai le aposetolo o Ioane e faapea, ‘Aua nei o tatou alolofa i le lalolagi ia ma mea o loo iai aua o le a le ia i tatou le alofa o le Tama’ ona faamatala mai lea e Ioane o tuinanau o le lalolagi, ‘tuinanau o le tino, tuinanau o mata, ma le faalialia vale o lenei olaga’ (1 Ioane 2:15-17).
O le taua lena o le tupu faaleagaga o le tagata e ala i le toaga i le Afioga a le Atua, o le lotu, o tapuaiga, o le viiga, o le anapogi, o le tatalo, o le alofa atu, o le foai ma le tele o isi mea e faatupuina ai lo tatou ola faaleagaga.
O se tasi o vaega o loo taua e Peteru i lana tusi e iloa ai le tagata Kerisiano, o le ola usiusitai lea (2:13-3:12). O nisi ua avea le ola Kerisiano ma auala ua le iloa ai ona usitai i e e tatau ona usitai i ai. O nisi nei o vaega e tatau ona usitaia:
Usitai i le Malo (2:13-17)
O le tulafono a le Malo poo le tulafono o le laueleele e tatau ona usitaia. Sa ou talanoa talu ai nei i se tasi o alii leoleo, na ia taua ai e faapea, ‘O tagata lava o loo solomua ona faia solitulafono o tagata o loo o i le lotu aua o le tele o taimi e moomia ai le fesoasoani a le faifeau’.
E faigata tele e tagata ona talitonuina le mapo lotu o Samoa ae solomusa foi i tatou i le tele o vaega e soli ai le tulafono. Amata i nai tulafono laiti e iai le faia o le laisene ave taavale, aua le paka sese, aua le pepelo ina ia maua le penefiti. O nai mea laiti lava na e te fiu lava e toaga i le lotu e leai se aoga vagana ai ua e salamo i nai vaega faapena.
Usitai i Galuega (2:18-25)
E masani ona ou fai i le matou ekalesia, o le fale faigaluega o se nofoaga sili lea ona taua ua tuuina ai oe ma au e le Atua ina ia susulu ai lo ta malamalama, ma ia avea ai i tatou o masina i totonu o le kamupani. Ia avea oe o se tagata faigaluega e sili ona toaga, vave, faamaoni ma alu i le maila faasili e pei ona aoao ai Keriso, ae le na o le faigaluega lava mo le tupe.
O le a faagata mai i lenei vaega o le tatou suesuega i le Tusi Paia mo lenei vaiaso, ae ia fesoasoani mai le Atua ia i tatou ina ia tauave ma faatinoina mea tatou te talitonu i ai ma mea ua aoaoina ai i tatou. Aua afai tatou te faatinoina, o lona uiga ua tatou talitonuina. Ae le na o le gutu ma le upu ae leai se faatino.
Ia faamanuia le Atua ia te oe i lenei vaiaso. Ia tuuina atu e ia lona alofa tunoa e mafai ai ona maua le malosi, ina ia avea i tatou o tagata tau faaleagaga ina ia tetee atu uiga vaivai ma tuinanau o le tino, ae avea oe ma au o ni e e fiafia i ai le Atua, ma faataitaiga i e latou te le silafiaina o Ia.
Soifua
Pastor Lui Ponifasio