Malamalama i le Tusi Lona Lua a Peteru

Ia mua ia mea i Matautu Sa, i le viiga o lo tatou Atua. Ae faamalo atu le soifua maua ma le lagi e mama i le paia o Samoa i ona tulaga faalupe.
Faafetai i le agalelei o le Atua ua toe maua ai lenei fesootaiga e ala i tusitusiga ma le tautua a lenei nusipepa, ua mafai ai ona molioo atu lenei tusitusiga ua faaigoaina o le Malamalama i le Tusi Paia.
E iai le talitonuga e le mamao se va o le tusi muamua ma le tusi lona lua lenei a Peteru. Na tusia lenei tusi i le Vaitausaga o le 66-68 AD. O i latou o loo tusi i ai Peteru o Kerisiano o loo faatapeapeina i le Atu Metitirane. O i latou lava ia na tusi i ai le tusi muamua (3:1).
O le toe tusi lenei a le aposetolo ae lei oti faamaturo i lalo o le pulega a Nero, le tupu saua e pei ona faasatauroina a o pito i lalo lona ulu i le 67-68 AD.
O le autu o lenei tusi o le lapataiga ma le auganiga a le aposetolo ina ia tumau i le faatuatuaga, ona ua malosi talaiga fou o nisi o faatuatuaga ma talitonuga e ese mai le talitonuga Kerisiano.
Ua avea lea ma faatosina i nisi o Kerisiano. Ua tusi atu Peteru ina ia mausali le faatuatua, e ala lea i le matua le faaleagaga ae aua nei faapaie (1:8).
O lenei tusi o loo atagia ai atugaluga o le aposetolo, ona ua iloa ua lata ona aso ae o lenei ua aafia le ekalesia i le mau faafitauli (1:13-15; 2:1-3).
O loo faamamafa foi e Peteru le loto onosai i le galuega ma faatalitali atu i le toe faaali mai o Keriso (3:1-14).
O nisi o fuaiupu e taua i totonu o lenei tusi o le 1:3 – “Ua foaiina mai ia te i tatou e lona mana (o le Atua) o mea uma e oo ai i le ola ma le amio Atua, i lo tatou iloa lelei o le na valaau mai ia i tatou i lona mamalu ma lona lelei silisili.”
Faapea ma le 1:20-21; 3:8-11.
Sei o tatou vaevaeina nisi o mataupu autu o loo talanoa mai ai le aposetolo.
O le Faamatuaina o le Kerisiano (1:3-21)
E ese le taua o le matua o le ola faaleagaga e pei ona aoaoina e le Tusi Paia. Ua foaiina mai e le Atua o mea uma lava mo le lelei ma le tupu olaola o le ola faaleagaga o le Kerisiano. Peitai afai e le mafai e le Kerisiano ona faaaogaina ma ola ai i nei mea ua foaiina mai e le Atua, o le a faapea lava ona tumau pea o ia i le agasala ma tuinanau o le lalolagi ma le alualu i luma mo le Atua (4).
O a nei mea ua foaiina mai e le Atua? Silasila i le mataupu 1:3: “Ua foaiina mai ia te i tatou e lona mana Atua o mea uma e oo ai i le ola ma le amio Atua, …”
O mea e oo ai i le ola ma le amio Atua. Silasila i le fuaiupu e 5-7. O mea nei e taua i le faatupuina o le faatuatua poo le faamatuaina o le ola faaelagaga ina ia foliga ia Keriso.
O le mea e sili ona taua o le faatuatua lea i le Atua e ala ia Keriso Iesu o le na maliu mo le togiolaina o agasala. O le faatuatua lenei e maua ai le ola e faavavau. Efeso 2:8: “Aua o le faatuatua ua faaolaina ai outou i le faatuatua e le mai ia te outou foi lea a o le mea foaifuaina mai e le Atua.”
O le faatuatua lenei i le Atua i lona alofa tunoa e maua ai le ola e faavavau. E le ona o ni mea lelei ua tatou faia poo ni galuega o le faatuatua, ae o le alofa tunoa tutasi lava o le Atua.
O lea la ua tatou maua le ola e faavavau e ala i le faatuatua, ona tatou taumafai loa lea e galueina lo tatou faaolataga (Filipi 2:12). O le faatuatua e tatau loa ona faapipii i ai ni mea e faatupuina ai.
Fai mai Peteru e tatau ona faapipii ma faaopoopoloa i ai le amio lelei.
E tatau ona faaopoopo i le faatuatua le amio lelei. O auala e faigofie ai lava ona iloa e tagata le moni o le faatuatua o galuega alofa ma uiga lelei e te faaali lea i isi tagata. Ona o lou faatuatua, ia faia loa ma faatinoina uiga lelei poo amio lelei.
A o faia nei amio lelei ae ia taumafai loa e faaopoopo i ai ma le iloa, poo le aoaoina. Aisea e taua ai le ola aoaoina i le faatuatua o le tagata? O le tali, ina ia mafai ona malamalama ma ia mafai ona tali atu pe aoao atu. E toatele ia o tagata Kerisiano e pasese le paie ma le faatamala i le faaupuga faapea, “E faalagolago lava i le Agaga o le Atua.” Ou te ioe ma talitonuina lena lagona peitai ua aumaia e le Atua ia te oe ma au le mafaufau e faaaogaina. Na lapatai Paulo ia Timoteo i le faasaga e faitau le Tusi Paia. Ia suesue.
Ou te talitonu e faaaogaina e le Atua le tagata e saili ia te ia e ala i ana afioga, ae a faatamala e le faauuina e le Atua se tagata paie.
O tatou o loo laugaina ma aoaoina le upu a le Atua, e ese le taua o lenei tulaga. Aua le faatamala, aua le faapaie, a ia suesue ma sailiili ina ia maua le iloa i le Upu.
O le isi vaega o loo taua e Peteru e faaopoopo lava i le faatuatua, o le loto mama. O se tasi o faaliliuga o le Tusi Paia o loo faaliliuina ai le loto mama, o le amio pulea.
O nisi ua faatuatua ua iloa foi le upu ona avea lea ma ala ua faafefeteina ai ma manatu ua na o ia lava e iloa le Upu ma ua avea ma mea ua eleelea ai le loto i isi. Ia pe ua avea foi le iloa tele o le upu ma ala ua le iloa ai pulea le loto ae ua faasausili ma mimita.
Fai mai Paulo ia Korinito, ‘o le poto e faafefeteina.’ E aoga le poto peitai ia maua le amio pulea e mafai ai ona faautauta i le faaaogaina o le iloa.
O se tasi o vaega taua e faaopoopo i le faatuatua, o le onosai. Ua e maitauina se tagata Kerisiano poo se tagata e talanoa i le Atua ae leai lava ma se fua o le onosai o iloa ai. O nei ituaiga o tagata e fulufululele. E maitaita aemaise o le iloa teu le va i taimi e sola ai le onosai.
O se tasi nei o itu e iloa ai le matua faaleagaga o le tagata, o le taimi e vevesi ai ae o loo toa pea.
E le lagona ni faamatalaga faasausili ae na ona ataata lava ma folo lemu i totonu le tiga o mea o tutupu. O Keriso le faataitaiga sili o le tagata onosai. E lei lagona sona leo e ui na mamafa tu tiga na oo ia te ia.
O le loto mama le tasi vaega taua i le ola faaleagaga o le tagata. O loo aoao Keriso o i latou e loto mama latou te iloa atu le Atua. O le loto mama poo le taumafai e ola faapaiaina o se tasi lea o vaega taua e iloa ai le alofa i le Atua ma usitai ia te ia. 1 Peteru 1:15-16: “Ia paia outou aua o au nei e paia lava au.” O le ola faapaiaina poo le ola mama e tali latalata ai le tagata i le uiga o le Atua aua e leai se agasala lava e tasi i le Atua.
O a ni mea o loo e soifua eleelea ai i luma o le Atua? 1 Ioane 1:9: “Afai tatou te tautau a tatou agasala e faamaoni o ia ma le amiotonu e faamagalo ai a tatou agasala.”
E faigofie lava ona tatou ola faamamaina e ala lea i le tautau o a tatou agasala i le Atua i aso uma. Ae le gata i lea o le taumafai e ola i le Upu a le Atua aua o le upu e faamamaina ai i tatou.
E foliga mai le aoaoga a le Aposetolo o Peteru, o loo palu se keke. O mea nei e tatau ona aofia i totonu o le paluga ina ia lelei ma matagofie le keke pe a vela. Masalo e faapena le taua o le atoataoa ma sao mea o loo fauina ai lo ta ola faaleagaga, ina ia matua ma ia foliga ia Keriso.
O le vaega mulimuli e lua e taua tele, o le fealofani ma le alofa. O nisi ua taumafai e tausi mea o loo taua i luga, peitai e faatuatuanai lava i le vaega lenei o le fealofani. O le fealofani o loo taua o le fealofani o le au uso poo tagata o le ekalesia. O le taumafai lea e aua le faatupuina le masei i va o uso aua o se mea e matua inosia lava e le Atua. O le fealofani, o le saili lea o auala e faatupuina ai le alofa ma le filemu i totonu o le Au Uso tusa lava poo le a le feeseeseai o manatu ma lagona i se mataupu.
O le alofa o le vaega mulimuli o loo taua, e lautua uma ai mea e pei ona aoao Paulo i Korinito.
Talosia ia fesoasoani atu le Agaga o le Atua ia te oe e faatupuina nei mea ma faaopoopoina nei vaega taua i lou soifua i lenei vaiaso, ina ia atili ai ona ta foliga ia Keriso ma matua faaleagaga ia te ia.
Ia manuia le vaiaso i le alofa o Keriso
Lui Ponifasio
Pastors