Malaga tapena mo le Faatali mai a Aoga Tulagalua

E iloga le tamaitiiti ua matuā lava tapena ma sauniuni lelei mo le agai atu i le laasaga lona lua o le olaga aoaoina, e faaalia i ana gaioiga, o lona agavaa, o le lototele aemaise o foliga vaaia i le faataunuuina o galuega faatino i totonu o le aoga amata ma sauni ai loa e malaga atu i le aoga tulagalua.

A o lei toe amatalia aoga o le kuata lona tolu o lenei tausaga, na manatu le pulega a le aoga amata a Kids Count i Takanini, le susuga i le tamaitai puleaoga, Sayonara Faamausili, e tatau ona faia se sauniga faapitoa ma valaaulia uma ai fanau a
le aoga ua uma ona faamanatuina le ta‘i 5 tausaga ma ua i totonu foi o aoga tulagalua mai i le masina o Ianuari seia oo mai i le faaiuga o le masina o Iuni, ma faia ai loa se mafutaga matagofie ma faauuina aloaia ai fanau nei.

E le gata i lea o se fuafuaga lelei ma le talafeagai ona o le fia faaauauina pea o le sootaga a mātua, o aiga aemaise lava o tamaiti nei ma le aoga amata.

O le faamoemoe maualuga lava o le fia faamautuina ma fia faamautinoa e ala i le faasoa mai a mātua, o loo lelei atoatoa tapenaga i gaioiga faatino ma galuega faaauau mo le ausiaina o tofa manino ma tofa mamao a le aoga auā lava le faaoloaina o fanau mo le laasaga lona lua lea, o le agai atu i totonu o aoga tulagalua.

E 22 le fuainumera o tamaiti ua atoa lelei lava o latou ta‘ilima tausaga ma o ese atu loa na valaaulia mo lea faamoemoe tāua, ma na tali mai ma faauuina ai tamaiti e 14, ma o se mafutaga matagofie auā o ni feiloaiga fiafia ma ni mafutaga toe faamanatu i le faasoa a fanau lava latou, e tusa ma a latou masaniga sa fai i totonu o le Aoga Amata.

O se mitamitaga sili foi i faiaoga ma le taitai, ona ua mafai ona faamaonia le lelei o le faatinoga ma le faataunuuina o tofa manino ma tofa mamao a le aoga mo le faasauni atu o fanau i aoga tulagalua, e tusa ma le sagisagi fiafia o mātua ma aiga i le faasoa mai e ala i ausiaga ua oo i ai nai o latou alo ma fanau i totonu o aoga tulagalua.

Ia o le viiga lea e faateleina ma faatumauina pea i le Atua, auā o le atamai ma le agavaa lelei lea o loo faaoloaina ai susuga i faiaoga mo le faatinoina ma le faalauteleina o le poto mo fanau ina ia sologa manuia ma iu lelei le faagasologa o le olaga aoaoina ina ia maua le fiafia ma le manuia i le lumanai mo ia lava, aemaise o aiga, nuu, atunuu, ekalesia ma mātua.

Fanau o loo aoaoina i le Aoga Amata Kids Count i Takanini

Nisi o fanau ua faauuina mai le Aoga Amata Kids Count i Takanini ma ua sauni nei e ulufale atu i aoga tulagalua