Malaga taamilo Robert Louis Primary i Aotearoa

Aumalaga mai Samoa a le aoga Robert Louis Primary School
Aumalaga mai Samoa a le aoga Robert Louis Primary School

O loo faaauau pea le anavatau a le aoga tulagalua a le Robert Louis mai Samoa i tausaga taitasi, o le alu lea o malaga a le Vasega 7 i atunuu i fafo faatasi ai ma Amerika Samoa ma Samoa e faamatamata fanau i le tāua o aoga ma a latou aoaoga faapea mataaga i totonu o Samoa ma lona tāua. O le manulauti e tulimatai pea ia tele ni vaega tāua e aoaoina mai e fanau mai aoga faatasi ai ma le faailoa lea o aoga a Samoa ma lana aganuu ma le amio a tamaiti i aoga i fafo.

O le tele o tausaga e eseese lava fanau e malaga i lea polokalame, auā e oo atu i lea tausaga ua sui foi tamaiti ua aoaoina i le Vasega 7. O le Aso Toonai ua mavae 2 o Aperila na taunuu ai i laufanua o Aukilani le aumalaga toatele a lea aoga, lea e 33 fanau o loo auai, 15 faiaoga o loo aofia ai le tamaitai pule, Fiaapia Devoe ma nisi o susuga i alii ma tamaitai faiaoga, faatasi ai ma mātua e to‘a 15 o loo agai mai e lagolago le faamoemoe a le fanau.

O loo faamautu ma nonofo faatasi le aumalaga i le Whaiora Marae i Otara ma faagasolo ai le latou polokalame.

O le taeao o le Aso Gafua, 4 Aperila na asia ai e le aoga a Robert Louis le aoga tulagalua a le Clendon Park School i Manurewa e felosipi ai ma fanau aoga ma faiaoga ma aoaoina mai ai le faatinoina o aoga a le fanau auā foi se isi vaaiga fou e fesoasoani i polokalame a le Robert Louis Primary School.

Ma o se vaaiga ese sa tumutumu ai lea taeao ina ua aofia uma le aoga ma mātua Samoa o loo aooga o latou alo i Clendon Park School faapea ma faiaoga faatasi ai ma le aumalaga mai Samoa.

Feiloaiga a fanau aoga mai Samoa ma tamaiti aoga a Clendon Park School
Feiloaiga a fanau aoga mai Samoa ma tamaiti aoga a Clendon Park School

Na amata le polokalame i le tu ma le aga a tangata whenua ma faasolo ai loa faafiafiaga a lea aoga, ma sosoo ai ma le malutaeao na saunia e mātua Samoa. Na maua le avanoa e asia ai e fanau ma faiaoga ma mātua totonu o potu aoga e matamata a o faatino aoga a le fanau. Na faaiu le polokalame o le aso i faafiafiaga a le aoga mai Samoa lea sa faatinoina a o maimoa ma le maofa fanau aoga a le Clendon Park School.

O le tausaga e 2012 na malaga ai le aoga lenei a Clendon Park i Samoa lea sa talimalo ai Robert Louis i totonu o lona laumua, ma sa amata i le ‘ava o le feiloaiga sa faatinoina e le fanau, a o lea ua malaga mai i lenei tausaga ua faafeiloai i latou i tu ma aga a tangata whenua a Maoli.

O le tāua o lenei malaga mai Samoa ua mafai ai ona feiloai faiaoga ma nisi o faiaoga sa galulue muamua i Robert Louis a o lea ua faiaoga i totonu o Clendon Park School, ae lē gata i lea o se avanoa lelei ua mafai ai ona nonofo faatasi ma mafuta faatasi fanau aoga ma faiaoga mai Samoa auā e seāseā maua lea avanoa.

O le Aso Lua, 5 Aperila o le a asia ai e le malaga le Auckland Zoo, faapea le Kelly Tarlton’s Sea Life Aquarium mo tafaoga a le fanau, ae o le taeao o le Aso Lulu o le a malaga ai loa i Ueligitone e faaauau ai le polokalame, ma api ai i le Maraeora Marae i Porirua, Aso Tofi o le a asia ai le aoga tulagalua a Te Kura Primary School faatasi ai ma le Iunivesite i Victoria.

O le Aso Sa o le a toe taliu mai ai i Aukilani ma ta‘ape ai i aiga auā tafaoga a le fanau ma sauni ai loa le toe taliu i Samoa. E lua vaiaso o loo malaga taamilo ai le Robert Louis Primary School i le faatinoina o le latou polokalame i Niu Sila nei.