E toasefuluono alii ma tamaitai, ae sefulufitu i le alii kapeteni le auvaa o le vaa o le Gaualofa o loo fai ma sui o Samoa, i se faigamalaga umi e taamilo i le lalolagi e pei ona fuafuaina.
O le auvaa o le Gaualofa, e toasefulufā i latou mai Samoa, ma e nofomau foi i le atunuu, e aofia ai ma le alii papalagi o le loo kapeteniina le vaa. E toatolu sa filifilia mai Niu Sila, ma e nonofo mau foi i Niu Sila lava.
E toatolu tamaitai, ae toasefulufā alii o le auvaa, e pei ona ofoina o latou taimi ma aso mo le auai atu i lenei faigamalaga umi i luga o le sami.
E tausaga ma masina e tolu le umi ua faatulagaina mo le malaga taamilo, ma le faamoemoe e faamae‘a ma tini le malaga i le Atu Solomona i le tausaga fou 2012.
O le aoauli o le Aso Faraile na tea nei, aso 15 o Aperila, na tuua ai e le Gaualofa le uafu i Aukilani Niu Sila, mo le amataina o le vae lona lua o le folauga, ma lona faamoemoe.
O se lagona fiafia, ina ua feiloai atu ma faamavae ia i latou i luga o le vaa, peitai o se isi foi itu sa lagona le faanoanoa ona o le vaai atu ma faatofa atu ia i latou, ona o le umi o le malaga, ma e leiloa foi e se tasi pe tua ma ni ā le faigamalaga ma le folauga.
O se talanoaga ma le susuga i le alii kapeteni, Marc Gondard, sa fesiligia ai, pe ua lava tapena ma saunia lelei tulaga uma, e manaomia, atoa ai ma le saogalemu i luga o le sami, o le auvaa. Aemaise ai foi o le itu i le tausiga o le tino, poo mea taumafa.
Saunoa le alii kapeteni, e leai se popolega i vaega uma e pei ona ta‘ua. Ua lava saunia lelei taumafa, o meafaigaluega mo le puipuia o le saogalemu, atoa ai ma isi lava manaoga manaomia e le auvaa, ma alo o le atunuu.
O Marc Gondard, o loo avea ma kapeteni, o se alii mai Farani, ma ua leva ona nofo ma aumau i Samoa. O ia o se tasi o alii e fiafia tele e galue i luga o vaa, ma folau i le sami.
O lana galuega sa feagai ai a o i Samoa, o se alii fauvaa, toe fesoasoani i le tele o galuega toe faalelei i uafu.
O le ala foi lea sa filifilia ai ma tofia e na te kapeteniina le Gaualofa mo le folauga lea ua amataina.
O ona agavaa ma lona silafia i le tele o ogasami e lē gata i le Pasefika, a o isi vaega o le lalolagi, ua fesoasoani tele mo le faafoeina o le vaa ma le auvaa o le Gaualofa.
Suafa o alii ma tamaitai o le auvaa a le Gaualofa
Alii Kapeteni, Marc Gondard, Alex Taulelei (NZ), Bruce Filoifaga Maauga (NZ), Robbie William (NZ), Kalolo Stephnie (Samoa), Faapau Feliuai (Samoa), Koleni Apulu (Samoa), Siaosi Asofolau (Samoa), Teleni Aiolupotea Smith (Samoa), Fialelei Afoa (Samoa), Senio Masalo Falevai (Samoa), Akenese Luluga (Samoa), Fealofani Brunn (Samoa), Faaleaga Sauvao Ioane (Samoa), Malua Sione (Samoa), Brynne Jullian Eaton Auvaa (Samoa), Lolesio Patolo (Samoa).
Ona o le utiuti o le taimi, i se feiloaiga ona ua oo i le taimi sa faatulagaina e tuua ai le uafu i Aukilani, sa lē mafai ai ona maua alii ma tamaitai ma o latou alalafaga i Samoa. O se faamatalaga faanatinati, sa taaofai ai le auvaa ma afioaga e pei ona ta‘ua.
E toatolu sui o le auvaa mai Faleasiu i Upolu, e toatolu foi mai le afioaga o Saasaai i Savaii. E toatasi le alii mai Samatau o John Misky Sefo, toatasi mai Satapuala, toatasi mai Vaitoomuli Palauli.
O le tamaitai o Akenese Luluga sa faamaonia e mai Leauvaa, Faleasiu, ma Apia. O le isi foi tamaitai o Brynne Jullian Eaton Auvaa e mai i Tulaele ma Vailoa i Faleata. O le afioaga i Siumu ma Moataa ma Vailima e taitoatasi foi o latou sui.
Faasologa o le folauga poo le faafanua o le malaga
O le malaga sa faamoemoe e tuua Aukilani i le Aso Lulu o le vaiaso talu ai, peitai ona o suiga o le tau ma ona uiga faaletonu sa toe tolopo ai, ma faataunuuina le malaga ese i le afiafi o le Aso Faraile. E lima vaa o loo malaga faatasi mai Aukilani ma le faamoemoe o le a fesootai atu mo isi vaa e lua o loo faatali mai i le Atu Kuki, ma faaauau ai loa le malaga mo Hawaii.
A taunuu i Hawaii, ona sosoo ai lea ma le agai atu i Amerika, ona faasolo ane ai lava lea i atunuu i le itu i Sisifo. O le toe agai mai i le itulagi o le Pasefika, ma o le a afea ai le tele o atunuu o le Pasefika ma faaiu ai i Solomona i le masina o Iulai o le tausaga fou 2012.
O loo iai le faamoemoe e tatau ona taunuu le folauga i Solomona i le vaiaso tonu o le a faia ai le faaaliga tele o tu ma aga a atunuu o le Pasefika (Pacifica Festival) i Solomona lava.
O Samoa o loo iai lava le latou vaa, ma o loo faafoeina lava e tagata Samoa, le Gaualofa.
E faapena foi Maori, peitai o nisi o vaa e fitu i ai vaa o le folauga, o loo fefiloi ma e tofu lava uma atunuu e pei o Samoa, Tonga, Solomona Vanuatu, Tahiti, Fiti, Atu Kuki ma Maori, ma o latou sui e iai.
O le a telē se aogā ma se sao o lenei folauga, mo le saga faalauiloaina pea o atunuu o le Pasefika i le lautele ma le itu o le lalolagi.
O le faamoemoe autū e pei ona taulai i ai lea faamoemoe, o le toe faamanatu pea ma saga faamaonia i le lalolagi atoa, o tagata Pasefika o tagata folau o le sami ma le vasaloloa. Sa amata mai i aso anamua, ma e oo mai lava i aso nei, o loo tumau pea ia agavaa ma tomai i tagata Pasefika ma atunuu e pei ona ta‘ua.
O le malaga o loo o faatasi uma lava vaa e fitu, ma e lē o tuuaunoa ai foi le iai pea o se tasi o vaa tele, o loo mulimulitai ai pea i le folauga, e faaleoleo ina ne‘i iai ni tulaga faigata e lamatia, ma avea ma faafitauli o le faigamalaga.
O vaa e fitu e pei ona ta‘ua, o ni alia sa fafauina lava ma gaosia i Niu Sila, i lalo o le vaaiga a tagata Maori ma sui mai atunuu taitasi, atoa ai ma le lagolago a le OKEANOS, o loo faatupeina ma sa tuufaatasia lea poloketi tele.
O vaa uma foi poo alia e fitu, o loo iai foi ma ni afi faaleoleo e faaaogāina ai le vevela o le la, peitai e faato‘ā faaaogāina ia afi i taimi e agai ai i totonu pe faaofi i uafu ma atunuu ua faamoemoe e afea.
O le faiga malaga atoa lava o le a tele ina faaaogāina pea lā o vaa, auā o le isi lea autū ma le pogai sa fau agai i ai vaa uma, ina ia faaaogāina pea le matagi ma le savili mo ana folauga.
Ua mae‘a foi ona faia talanoaga ma le susuga i le alii kapeteni o le Gaualofa, le susuga ia Marc Gondard, faapea ai alo ma fanau a le atunuu poo le auvaa, ina ia fesootai mai pea i le Radio Samoa ma le Samoa Times mo le faalauiloaina ma le fofogaina o le atunuu i Niu Sila ma Samoa, aemaise ai o le lalolagi atoa, i le tulaga o le faagasologa o le malaga aemaise atunuu o le a taunuu i ai i lea taimi ma lea taimi seia oo lava ina toe foi mai ma taunuu le faamoemoe e pei ona fuafuaina.
