Ua tea nei i tua ma le falemai i Middlemore le isi alo o le tina ia Fono lea e 5 tausaga, ae o loo taofia pea le isi ona alo matua e 8 tausaga lea sa maua mai i se ma‘i a o iai ma le tina i Samoa i le latou malaga.
Na taua e le tina na malaga i Samoa ona o se faalavelave i le maliu o si ona uncle ma ua fiafia ai foi ua maua lea avanoa e asiasi ai i aiga, ae pagā lea ua avea ma mea ua maua ai si ana fanau i se ma‘i a o iai i le atunuu.
E lua vaiaso na iai le tina i Samoa ma si ana fanau e toatolu ae toe sauni le malaga o le a foi mai ae vaaia ai loa foliga o lana fanau ua amata ona mama‘i. Sa lē talitonuina e le tina ia Fono e maua lana fanau i ni ma‘i, ona sa ia tapenaina vai e mili ai o latou tino aemaise o fualaau e puipui mai ai i ma‘i, ona e mafaufau atu o Samoa o se atunuu e vevela toe maua gofie tamaiti i le tino mageso pe a lē lelei ona togafiti.
Ae na ta‘ua lava e le tina o le mae‘a ai o le faalavelave na alu ai loa le taelega a lana fanau ma le isi ona uncle ae ona maitauina ai loa ua amata ona maua lana fanau matutua i le fiva. O le Aso Lulu na sosoo ai o le aso lea ua tapena ai le latou malaga o le a toe foi mai i le Aso Tofi, na vaaia ai loa ua matuā faateteleina uiga o le ma‘i ma sa ia lē mautinoa poo le ā lea ituaiga ma‘i, ona e mūmū faasolo atoa ni vaega o le tino toe putaputa, a tuitui foi e sau ai le vai.
O le po o le Aso Tofi na toe taliu mai ai i fanua le malaga, ma sa taunuu mai i le malaevaalele i Aukilani o loo faatali atu le Ambulance e ave sa‘o ai lana fanau i le falemai mo togafitiga.
Na saili fofo foi le tina i nisi o le atunuu e fofo ai i lea ituaiga ma‘i, ma ia iloa ai i nisi o fomai Samoa o le mūmū asuafi. O loo taofia pea le alii o Winsbhil i le falemai i Middlemore a o lona uso laitiiti lea ua tea i tua. Ua fautuaina foi e le tina le atunuu ia aua ne‘i faatamala i le tapenaina o vai e puipuia mai ai fanau i ma‘i aemaise o le tuulafoai pe a o malaga i se mea.
