Ole Aso Toonai 3 Mati 2018 na maua ai se feiloaiga ale sui ole nusipepa ma le Aufaipese Faapitoa Katoliko ale Mafutaga ua faaigoaina ole ‘Feiloaimauso’ ile Aai o Sini (Sydney).
O lea feiloaiga na valaauina lea ele afioga ile Ta’ita’i ole Komiti Faafoe ole Aufaipese Faapitoa, le susuga ia Sitagata Atonio Tominiko ma le ofisa. E lei avanoa le Tama Pule ole Matagaluega, le afioga ia Patele Molesi (Maurice) Thompson ona o ona tuatuagia faaositaulaga, ae ole susuga lava ia Sitagata Atonio Tominiko na ia faamatalaina manino le agaga ma le auga o lenei ‘Malaga Sa’.
Saunoa Sitagata ma ia faamatalaina ai e faapea; “O lenei ‘Malaga Sa’, ose talosaga sa tuuina mai se tasi o Matagaluega (Palisi) ile aai o Bari i Italia, mo le Aufaipese Faapitoa (Special Choir) e malaga atu ai, latou te faatinoina le peseina o ‘Sauniga ole Aso Maliu’ ma le ‘Eseta’ ile tausaga nei. O lenei valaaulia na auala mai ile Tamaitai-Sa Samoa o Valentina Kasiano (alo ole susuga ile Tiakono ia Kasiano Leaupepe) oloo galue ai ile matagaluega i Bari i Italia.”
“E iai le faamoemoe a mae’a lea auaunaga, ona malaga atu lea ole ‘Aufaipese’ i Roma auā le feiloaiga ma le Tamā Paia ia Pope Faranisisi (Pope Francis) ile Aso Lulu 4 o Aperila i totonu ole Vatikana, le Laumua ole Ekalesia Katoliko i Roma. Ole a maua foi le avanoa e maimoaina ai ele ‘Aumalaga’ nisi o ‘Mataaga’ lauiloa i totonu ole aai tele ole Vatikana i Roma”.
Na saunoa foi Sitagata e faapea, “Ole ‘Aufaipese Faapitoa’ (Special Choir) ose tasi o faalapotopotoga i lalo ole ‘Mafutaga Samoa’ e ta’ua ole ‘Feiloaimauso’. Oloo faatino le auaunaga ole peseina lea o ‘Misasa Samoa’ ile itula e sefulutasi i taeao o Aso Sa taitasi ile Malumalu o Sagato Patelesio (St Patricks) i Revesby Heights. O lenei foi mafutaga Samoa, oloo ta’ita’ia lava lea ele Pule ole Matagaluega, le afioga Patele Molesi (Maurice) Thompson, ae lagolagosua iai le Afioga Patele Feleki Tautunu”.
“O lenei foi aumalaga, oloo faauluulu lava lea ile Tamā Pule ole Matagaluega, ae ole Ta’ita’i Malaga, o Sitagata Atonio Tominiko ma le Ta’ita’i Pese, ole Faipese foi lea, ole tamaitai o Sesilia Ita Kasiano. Ole faaauvaaina o lenei aumalaga poo le aufaipese, o tamalii, failauga, faletua ma tausi, tamaitai, alo ma fanau mai Matagaluega eseese mai Sydney, Parramatta ma Wollongong. Ole Aso Gafua 26 o Mati 2018, ole a tuua ai loa ele faigamalaga Ausetalia mo Italia. E tusa ma le lua vaiaso le umi ole toesea ai ole ‘Aufaipese Faapitoa’ mai le Atunuu nei o Ausetalia,” ole saunoaga lea ale susuga Sitagata Atonio Tominiko.
I lea foi feiloaiga na faailoa ane ai ele susuga Sitagata, le sauni atu ai o lenei ‘Aufaipese Faapitoa’ i sa latou faaaliga se’i silasila ma faafogafoga ai le mamalu o Samoa ae faapea foi le tapuaiga a Ekalesia Samoa Katoliko ile nofo a Matagaluga taitasi. I lea faamoemoe ua valaauina ai le mamalu lautele ole atunuu faapea foi le nofo a Faafeagaiga ma aulotu eseese e afifio atu e molimauina le tapenaga mo lea ‘Malaga Sa’. Ose avanoa foi lea e faatagisia ai le fesoasoani ma le aao foai ole atunuu e fesoasoani atili ai ile faigamalaga. Ole a faataunuuina lea Faaaliga ile Aso Toonai, 17 Mati 2018 i Hall ale Aoga a St Christopher i Panania, ile 10:00 ile taeao. Oloo faapea foi ona toe valaauina iai le nuispepa ole Samoa Times mo lea faamoemoe.
