E ui e lei auai mai le au malosi mai le afioaga o Lalomalava i Savaii i le taamilosaga o le taitoafitu lea a Aukilani Samoa i le tausaga talu ai, peitai o lea ua toe masii mai le fala siigata i le mamalu o le pulega a le au, o tamalii ma failauga aemaise le mamalu i tama taaalo mo le finauina o le manumalo i le taamilosaga o lenei tausaga e pei ona sa o latou tauaveina ai foi le ipu i le tausaga e 2003 ma le 2006. Saunoa le faiaoga o le au, Loli Satuu Tiatia, e toa 13 le aumalaga ua taunuu mai i fanua i le taimi nei a o talitali le isi toatolu e taunuu mai i le vaiaso nei. O le taumafai o le au o loo lagolagoina malosi e le fale kalapu a le Evaeva mai le motu tele i Salafai ma na faaalia e Loli o le latou au o tamafanau lava a le afioaga o loo taumafaia ma e le pei o au a isi afioaga o loo tele ina faaaoga ai pe aami ane foi tamaiti taaalo lelei i au a le atunuu e fesoasoani ai. O loo aumau nei le au a Lalolamalava i Magele ma o loo tapenapena malie pea mo le faamoemoe i le Aso Toonai o lumanai nei.
O le isi au na masii mai o le afioaga lea o Vailele. E lei maua se faatalanoaga ma le afioga Faoasau Aunese o loo avea ma taitai o le au i le taimi nei, ae peitai sa faataunuuina se faamoemoe taua o le au i le faaiuga o le vaiaso na tea nei i le kalapu lakapi i Otahuhu, lea sa faia ai sa latou tausala ma mafuta ai foi ma feiloai ma aiga uo ma e masani faatoa toe fevaaiai mai se taimi umi. O le au a Vailele e pei ona faaalia e le taitai malaga i luga o le Radio Samoa, o loo auai ai foi lava tama taaalo o le afioaga lava latou ma nisi o alii taaalo i le Manu Samoa ma le fitu a le atunuu ma ua tele foi le tomai i le taaloga. O le Aso Toonai nei le taitoafitu lea a Aukilani Samoa e tausinio ai au e lua e finauina se tasi o le a sola ma le ipu o le siamupini a le Aukilani Samoa i lenei tausaga. O le au malosi lenei a le afioaga o Vailele, o loo siamupini nei i le taamilosaga o le taitoafitu a le Malisi i Samoa, faapea foi ona siamupini i le taitoafitu a Savaii.
