O le vaiaso na tea nei na faatoa masii atu ai autaaalo a Samoa mo taaloga a le Pasefika i Papua Niu Kini, ae e lē o malaga uma i le taimi e tasi. O le isi ‘afa e faatoa o atu i le vaiaso lenei ae ua na o autaaalo o loo tausinio muamua ua vave ona malaga.
O le Aso Toonai na tea nei na faia ai le sauniga e tatala aloaia ai taaloga a le Pasefika, ma o ‘au na muamua i Port Moresby o le aulakapi pa‘i ma le ‘au basketball faapea le ausiisii uamea mamafa. O i latou ia o loo taaalo i le vaiaso lenei. Ua agai atu i le amataga o le vaiaso le isi ‘au o le a taaalo i le ogatotonu o le vaiaso lenei.
O le po o le Aso Sa na agai ai le au taitoafitu a le Manu Samoa mo taaloga i lea atunuu ae o loo faagasolo atu lava isi ‘au. O le mafuaaga o le auai faapea e pei ona ta‘ua e le taitai malaga le Chef de Mission, ia Aualiitia Fouina Milford, ona o le vaavaai lava i le seleni e mafai ona ave ai lenei ‘au.
E to‘a 210 e taaalo ma o le tulaga o iai e tatau ona $6,000 tala e alu i pasese lava ia o le malaga ma le toe foi mai ma o le taumafai ina ia laitiiti le taimi e agai atu ai, taaalo ma toe foi mai o le taugofie foi lena o le ave o le autaaalo a Samoa i ia taumafaiga.
O le isi la ‘afa o le autaaalo na savavali i le tatala aloaia o ia taaloga ae o le isi ‘afa o le a savavali i le faaiuga o taaloga auā e uma loa tausinioga toe foi sa‘o mai autaaalo i le atunuu.
O se vaaiga foi lea i le toatele o ‘au a isi foi atunuu o le Pasefika ae e mautinoa o le tau faasoasoa lava o le tupe e alu i autaaalo le mafuaaga o le toaitiiti o ‘au na savavali i le tatalaga o lea faamoemoe.
Faaalia e sui faasalalau a le TVONE ia e i Papua Niu Kini, o se atunuu e taugata foi taumafa ma isi oloa ma e taugata foi fesootaiga tau internet o loo maua ai.
O le taimi lenei ua maua le pine auro e tasi a Samoa mai ia Neville Ioane i le siisii uamea mamafa ae o le vaiaso lenei e tatau ona mae‘a ai ia tausinioga i lea foi taaloga.
O loo faaauau taaloga a le lakapi pa‘i ona na o Papua Niu Kini na malolo ai le ‘au a tama ae o le ‘au a teine ua uma a latou taumafaiga i le malolo ai i ‘au e lua e na o Kiripati na manumalo ai.
I le taaloga o le basketball ua malolo foi le ‘au a alii a Samoa i le ‘au a Tahiti ma le ‘au a Guam o lona uiga ua mae‘a foi a latou taumafaiga mo se pine auro i lea taaloga.
