Malaga Asiasi mai EFKS Utah Amerika

E tusa ma le lua vaiaso le umi na malaga asiasi mai ai le aulotu a le EFKS mai Utah i Amerika (USA) i se latou malaga faasaili tupe, lea na talimalo ai le susuga i le toeaina o le pulega a Waitakere i le itu i Sisifo o Aukilani, le susuga ia Laki Slade ma lona faletua ia Terri Slade aemaise le paia ma le mamalu maualuga o le aulotu tele i Te-Atatu.
Na taua e le susuga i le faafeagaiga ia Laki le latou feiloaiga ma le susuga i le faafeagaiga o Saitumua Tapalealii ma lona faletua ia Rosa i le la malaga asiasi i Utah i Amerika i le tausaga talu ai, sa maua ai se latou feiloaiga ma mafuta ai ma le susuga i le faafeagaiga ma lona faletua i Utah ma faamautu ai lava lea faigauo ma le fesootaiga seia oo ai lava ina ua faamautuina ai le fia malaga asiasi mai o le aulotu a Utah mo sa latou sailiga seleni mai i Aotearoa nei.
Na malie lava i le faalogo saunoaga a le taitai o le sauniga, le susuga ia Saitumua Tapalealii i le sauniga lotu mulimuli i le Aso Sa, na ia saunoa ai i le mafana o le mafutaga na osia ma ua faataunuuina mai lava i le aso na taunuu ai le faigamalaga seia oo mai i le toe aso o le latou mafutaga i totonu o le Aulotu i Te-Atatu.
O le auga lava o le faamoemoe na malaga mai ai le susuga i le faafeagaiga ma le faletua aemaise le mamalu tele i tupu ma ee, o sa‘oao ma tamaitai, le aumaga aemaise lava foi o nai alo ma fanau, o le fia saili manuia mai i Aotearoa nei i sina seleni mo le tapenaina ma le toe fia faaleleia atili o lo latou malumalu tapuai lea na sa faaleagaina e le afi.
Na amataina faafiafiaga a le aulotu mai Utah i le hall a le susuga i le toeaina o le Pulega Manukau i Sasae i Papakura, faasolo atu ai le hall a le susuga i le faafeagaiga o Petaia Lokeni i Magele, ona faia foi lea i le hall a le PIC i Niutone i Aukilani tutotonu ae na faaiu ai loa i le toe faafiafiaga na faia i le hall lava a le toeaina o le pulega Waitakere i Te-Atatu lava i le itu i Sisifo o Aukilani.
Na maitauina le toatele ma le lolofi atu o le tatou atunuu e maimoaina ma molimauina foi faafiafiaga mananaia ma le matagofie na saunia lelei mai e le autalavou ma le aulotu aua le silasila ma le maimoa a le paia ma le mamalu o le tatou atunuu i Aotearoa nei. Sa vaaia foi ma le agaga faafetai tele le loto alolofa o nai o tatou tagata e ala i le aao foa ma le agalelei faaaliali o si o tatou atunuu e ala i le taupati atu ma faatino le alofa i le foai i tupe e pei ona sa faatalosagaina ai le mamalu o Samoa e ala ia latou faasilasilaga na faatalauula atu ai i le paia ma le mamalu o si o tatou atunuu.
E lei manofonofo foi le tele o tauaiga o le susuga i le faafeagaiga ma lona faletua aemaise le lautele i aiga uma o i latou na malaga mai.
Sa faaalia lava le loto faafetai tele ma le agaga faamaualalo o le susuga i le faafeagaiga, le susuga ia Saitumua ma lona faletua aemaise le aulotu atoa mai Utah i Amerika, ona o se tupe tele ua latou tauaaoina nei ma lo latou talitonuga, o le a fai lea ma taulaga mu i luma o le Atua ona o le alofa tulai, le aaofoai ma le agalelei le faatuaoia o le tatou atunuu i e na latou foaia lenei tupe tele ua latou taulimaina.
I le sauniga i le Aso Sa na matua faaalia ai le loto faafetai ma le agaga faagaeetia o le susuga i le faafeagaiga, le susuga ia Saitumua na momoli ane ai lana faafetai tele ma loimata i le susuga i le toeaina ia Laki ma lona faletua, le paia ma le mamalu maualuga i le aulotu i Te-Atatu ona o le latou mafutaga mafanafana aemaise o mea e tele ua foaia ma le agalelei le faatuaoia o le mamalu o le aulotu ma o latou tauaiga uma. Ua sauni nei le faigamalga e toe taliu atu i le afiafi o le Aso Sa.