Ua toe vaaia foliga matagofie ma le aulelei o le Maketi i Salelologa i Savaii talu mai le faaleagaina ai o le tele o meatotino i le vevesi na alia’e mai i le va o tupulaga o le afioaga o Salelologa ma Salelavalu talu ai nei.
Ae o le sauniga mo le tatalaina ai o auala faata e ono a le Malo i le motu tele i Salafai i le vaiaso na tea nei, na afea ai i le saunoaga a le taitai o le atunuu le Afioga i le Alii Palemia le tatau lea ona faaaoga ma le tatau le Maketi lenei i Salelologa. Saunoa manino Tuilaepa Sailele Malielegaoi, o le auga tonu lena ua faata ai e le Malo auala galue nei, e le o le faia ai o ni miliga taavale, uila vili vae ma nisi vaega ae na faia faapitoa e faimalaga ai taavale i uta i maumaga ina ia lelei le atina’eina o faatoaga, tuamaota ma laoa ma la’u i le maketi fua o faatoaga e faatau ai mo le maua ai lea o se seleni e tausi ai le aiga i le lumanai.
Ma o le faapogai foi lena na fausia ai e le Malo lenei maketi tele i Salelologa peitai o se vaaiga ma le faanoanoa ua vaaia nei i le tele o oloa a papalagi o loo faatau ai e o tatou tagata, faaopopo iai ma le tele o laulau piliaki ua tumutumu ai le au fai mamaso ma faaali ai o latou maso ae leai se aoga mo ni faatoaga, faapea le tele o tupulaga talavou ua na’o le faavevesi ma faia ai uiga le taupulea ma faaleaga ai meatotino a le Malo, ae ua le alu sa’o le malosi e galueaina ai faatoaga e tausi ai aiga. Fai mai Tuilaepa, ua fiu e taamilo solo i le Maketi e fia faatau sana aufa’i ae leai se mea o maua i le Maketi. Ua folafola nei e le Alii Palemia le faatu ai o se ofisa o leoleo i le fogafale i luga o lenei Maketi ina ia mata’itu ai amioga nei a le tupulaga ma ia faaaoga ai lea vaega o le Maketi. O le lu’itau a Tuilaepa ua tuuina atu nei i le pule mamalu o le afioaga o Salelologa ma Salelavalu ina ia tagatagai lelei i le filifiliaina o tofi pulenuu, ia ave le tofi pulenuu i se matai e toaga e galue mo le manuia lautele o le afioaga ae aua le avea i se matai e na’o le tafao ma le maua ai se nofo filemu o le afioaga.
Taua e Tuilaepa i lea lava lauga, o le a fai ma malaga mai se Minisita o le Kapeneta e mata’itu poloketi nei a le Malo poo faaaoga tatau e aofia ai ma auala galue e pei ona faata nei, ma afai ae le faaaoga ma le tatau nei atina’e a le Malo, o le a fesiligia foi le toe faia ai o nisi poloketi a le Malo i nei afioaga i le lumanai. E pei ona silafia o le mataupu e pei ona alia’e mai i tupulaga o le afioaga o Salelologa ma Salelavalu lea na faaleagaina ai le Maketi i Salelologa, o loo faagasolo pea iai suesuega a leoleo i le taimi nei faatasi ai ma le lagolago malosi a pulega o nei afioaga e lua.
O se tasi foi lenei o faafitauli na afea talu ai i le saunoaga a le Alii Palemia i le talanoaga masani ma le aufaasalalau, i le tutusa ai lea o le faasalaga e tuuina atu i nei afioaga o Salelologa ma Salelavalu ma le faasalaga foi na tuuina atu i le afioaga o Luatuanuu e tusa ai ma le taimi na o latou poloka ai le auala a le Malo.
Taua e le Alii Palemia, e pau le eseesega, o afioaga o Salelologa ma Salelavalu na vave lava ona o latou toe fesoasoani ane i le Matagaluega o Leoleo i le taimi o suesuega e ala lea i le toe momoli ane o tupulaga talavou na o latou faatupu ai lea vevesi.
E iai le talitonuga o le tatou nusipepa ua toe amata ona faaaoga ai le tele o vaega o le Maketi i Salelologa na faaleagaina mai i lea vevesi, e ui na toe faaleleia lava e nai tagata a latou meatotino na faaleagaina, a’o faatali ai suesuega a Leoleo ma se faaiuga a le faamasinoga pe tatau ona toe totogi uma tupe na toe faaalu i vaega na faaleagaina.
