Ua vaaia le lagolagoina e nisi foi o failauga aemaise o nisi e fia fefaasoaai e ala i le gagana Samoa.
O le polokalame ua igoa o le “Se ua malietoa ua malo tau” lea o loo faatautaia e le tofa ia Tafa Pati Fuaolefau Tafa lea e faia i Aso Gafua taitasi.
O se faafaletui a matai e talatalanoa ai i le aganuu aemaise o le tele o vaega o le gagana faamatai. O loo auai foi le tofa ia Logo Silao Lemana, o se tamā foi ua lausilafia e le toatele, o loo mafai foi ona faasoa atu lana ato fevailiai auā o le tele a o popo e sua ai se lolo.
O le tofa ia Tafa Fuaolefau Pati Tafa mai Mulifanua o loo fai ma taiulu o lea foi faalapotopotoga. Na molimau le tulafale e le o iai se agaga e fia faailoa se atamai, peitai o le faasoa atu lava o sina vaega mo nisi o matai ae faasilisili mo tupulaga lalovaoa a le atunuu o alala ma papaaao i Brisbane.
E leai se totogi e faia fua ae mo i latou uma i Brisbane e fia talatalanoa ma fia manino i lenei mafutaga, e lelei ona valaau atu Tafa Fuaolefau i le numera: 0449 054 641 poo le 0477 043 994.
