Faauta, o le fanau o le tofi lea mai le Alii, o e ua fanau mai, o le taui lea mai ia te ia. Salamo 127:3. Ua ou maea e tasiina le manatu o le faisalamo ma ou lagona ai le moni auā o le tatou aiga potopoto nei, o le taui lea o le tatou tina ia Sima Maui‘a ma o lona tofi lea mai le Alii.
E faatalofa atu i le paia ma le mamalu maualuga o le tatou aiga mai mauga tetele seia paia mauga iti. Ia nuunuu atu faatini o tausala sa ma faigata o le tatou aiga aua ua mae‘a ona totofi ulufulifanua e tusa ma le vaeluaina o le Suafa o le Atua i Tupu ma Tamaalii, ae tainane le fatuaiga tausi a faleupolu.
E le gata i lea, o le mamalu o le tatou aiga o loo lalovaoa i itu e fia o le kelope ua alaala ma papaaao ai. E avea foi lenei avanoa ou te faamanusina ai le toe ulutaia o le tatou gafa i le itupa i luga ma le itupa i lalo o Aleipata. Auā le afifio o Tuiatua Faanofonofo ia Tafua ma Fuataga. Afifio Alaalamalae, Le falefia o Alii ma Ma‘opu, Susu pule na taitai i Lalovi ma Malaefono, Susu le alii o leitu ma le tane o le itu ma le mamalu ia Saleaumua ma le Lautinalaulelei.
O loo mamalu le aitu o le aoa i le tatou faatasi ai ma le tamā ia Talavale Maalo ma le faletua ia Maopulu. Ua matua i ai le tuu ia laua, e fesili i ai le tofa ma le moe a le aiga. O le tatalo ina ia maua ni tausaga se tele tatou te mafuta ai pea i le alofa o le Matai i le lagi.
O se feiloaiga matagofie ma le fiafia ua mafuta ai alo ma fanau na tutupu mai i lenei tina. O lenei faatasiga sa faia lea i Willow Park Christian Camp at Eastern Beach, Auckland i le Aso Lulu 07 Ianuari – 11 Ianuari 2015. Sa momoli mea i matautusa ona o le alofa o le Atua i lenei mafutaga, o se taumafaiga sa fauao faupo a o lenei ua faataunuuina ma le manuia.
Tatala aloaia lenei mafuataga e se tasi o lupe faalele a lenei aiga Susuga Pastor Faaesea Upu Filoa, aemaise se tasi o fanau ua faauuina mai le Faith Bible College Tauranga – Jason Aumua.
Sa lauina ma faalauiloa ai le tusi na saunia mo le gafa o le aiga ina ia malamalama alo ma fanau aemaise le lautele o le aiga.
Sa faagasolo loa le polokalame mo aso e 5 i totonu o le Camp. Ese le manaia o le faatasiga sa faatautaia lava e alo talavou o lenei aiga, ae faufautua mātua ma e matutua ina ia sao ma uli le faamoemoe. Na faaavanoaina le po o le tupulaga (Youth Night) e faasoa ai le fanau i se faamanuiaga a le Atua i o latou olaga i le tausaga ua mavae.
Failauga (Guest Speaker) – Sima Shah, o se tasi o le fanau a lenei aiga sa a‘otauina i le aoga Bible College. Tele o polokalame sa tapenaina e le komiti i soo se taaloga eseese mo lea aso. O se vaaiga manaia i le fiafia uma o tagata matutua aemaise le fanau.
Ona sosoo ai lea ma le Fiafia Night sa tatala i le pese faafeiloai a Aukilani na fatuina e se tasi o le fanau (To‘atele Mamoe) faapitoa mo le tamā ia Talavale ma le tina ia Maopulu aemaise si o matou tina ia Sima Maui‘a ma lana fanau.
Faauma ma tapunia aloaia le Po Fiafia i le pese faatofa a Aukilani i ona aiga na malaga mai i le mafutaga faaleaiga, aemaise le tamā ia Talavale ma tina ia Maopulu ona o lo laua manatu i le faamaopoopoina o fanau ia ola fealofani ma mafuta o lenei mafutaga o le a toe faia i le tausaga 2018 i Samoa auā e lei auai uma mai le toatele o loo alala i itu e fia o le lalolagi.
Faamanuia le Atua i fanau a lenei tina o Sima Maui‘a, talosia i le alofa o le Atua ia tatou aulia atu le faamoemoe ua atofaina i le 3 tausaga o lumanai nei. O mea uma e amata e le Atua e faaiuina e le Atua, o lenei faamoemoe na ona tatou fuafua ae o le Atua na te faataunuuina. Ia mamao ni ao taulia ma ni laumea toli e savili i o tatou mātua ia Talavale Maalo ma Maopulu Aumua aemaise lo tatou aiga. Ia soifua ma ola pea le gafa o Sima Maui‘a i le alofa o le Alii.
