O alo uma ma tamafanau na tupuga mai i le Tina ia Elizabeth Sapeti Pritchard mai Laloaoa i Vaigaga, sa faia sa latou mafutaga tuufaatasi i le aoauli o le Aso Sa na tea nei.
O ē tupuga mai Vaigaga o loo auai uma mai ai sui o aiga mai Niu Sila ma isi setete o Ausetalia e aofia ai ma Samoa.
Sa auai mai nisi mai Uelegitone ma Aukilani, Samoa, Melepone, Sini ma Brisbane.
O le naunautaiga o lea mafutaga ina ia faamasani alo ma fanau auā e lē iloa le agai i luma o le olaga. Sa faia polokalame o le aso e ala i faafiafiaga, molimau a sui o aiga taitasi ma talatalanoa atili auā se lelei o isi augatupulaga o loo fai a‘e.
O le afioga ia Mua‘au Alefosia ma le faletua ia Sofia Pritchard o loo alala i Melepone o laua ia o loo faamatua i ai le vaaiga o le aiga.
Na amataina le mafutaga i le Aso Toonai ae na faamae‘aina i le Aso Gafua ma ta‘ape ai le filialii i nuu ma alalafaga.
O le tofa ia Lealaitagomoa Lealofi Lausei Pritchard sa fai ma fofoga o le aso.
