Mafutaga i NZ a suli o Lealiifano Tapale II o Auala i Savaii

Suli ma Feoi o le aiga Lealiifano Tapale i Auala
Suli ma Feoi o le aiga Lealiifano Tapale i Auala

O lupe sa va o eseese a ua fuifui faatasi, ae o se mea foi ina lelei ma le matagofie o uso ae nonofo faatasi. O le tagata ma lona faasinomaga o le tagata foi ma lona tupaga ma lona eleele, o le faamoemoe lea ma le sini autu o le Lotu Faamanatu o suli o Leaaliifano Tapale II o loo alala ma papa aao i Niu Sila, o le toe tuufaatasi o aiga ma fanau.

Auā ua tofu le tagata ma lona faasinomaga, ae e lē mafai lava ona faagaloina ma tuua le uluai taeao na asaina ai le vao filifili e mātua ua fai i lagi le folauga o le taumafai lea e faamautu ma faavae se aiga fiafia ma se aiga maopoopo.

O le taeao o le Aso Toonai 6 o Fepuari na tumutumu ai le malumalu o le PIC i Glen Eden i alo ma fanau sa tupuga mai i le tamā ia Lealiifano Tapale II e siitia faatasi le taulaga o le viiga ma le faafetai i le Atua ina ua aulia mai le Lotu Faamanatu a le aiga e pei ona faamanatuina i tausaga taitasi.

O le taitai o le sauniga o le susuga i le faafeagaiga ia Apa Lealiifano Le Valevale, o se tasi o lupe faalele a le aiga, ma o ia foi na saunoa i le upu faauuina a le Atua. Na faamanatu e le taitai i lona aiga le tāua o le toe foi i totonu o le aiga, auā e faalogo ai i tala tuu, ma vaavaai i tula toa sa latou asaina le gasu o le taeao, faatasi ai ma le tāua o le fealofani pe a maua le loto faamagalo ma le loto maualalo.

O le susuga i le aoao ia Tualevao Tuato na fofogaina le faitauina o le afioga Paia a le Atua faatasi ai ma le tatalo. O aitema na saunia e nisi o le fanau na avea lea ma feau momoli e faamalosia ai pea tupulaga lalovaoa o le aiga auā le agai i luma o fanau.

O se polokalame na maitauina ai le fiafia o tagata matutua seia oo i fanauiti auā o lea ua toe feiloai ai tagata uma auā e seāseā maua ni mafutaga faapenei i aso taitasi, aemaise lava i aiga sa malaga mai i Ueligitone.

Na sosoo ma le taumafataga e faaauau ai le mafutaga ma polokalame o le aso, ma tatala ai loa le filialii. O le tausaga fou ua lafo ai i tupulaga talavou i totonu o le aiga le faatinoina o le Lotu Faamanatu seia fafagu mai ai taleni ma mekokia fou o loo tuputupu a‘e ma fanau, aemaise ai o se vaaiga i se suiga fou, ae lē tuua ai pea le faufautua o mātua.

O le tamā ia Lealiifano Tapale ma le tina ia Tautala, e toafā o laua alo, e lua tama lua foi teine. Ae o le ulumatua o le fanau le alii o Lealiifano Tapale II o loo faaauauina lea lotu faamanatu i totonu o Niu Sila, ma ua vaaia ai le tupu ma ola o lea aiga.

O le susuga ia Faimalo Faauuga o loo avea ma taitaifono o lea mafutaga, o le failautusi o Tafao Kalolo Tamaese ma le teutupe o Sipusi Ainuu.

O amataga o tausaga taitasi ia Fepuari ua faatinoina ai lenei faamoemoe auā e fuafua i le taimi e mae‘a ai suega a le fanau, a o Samoa o loo tumau pea le faamanatuina o le Lotu ia Oketopa.