Mafutaga fiafia a nisi sui o Fa‘ala

Feiloai i loimata ole fiafia nisi o toa ua amataina le mafutaga a Fa'ala i Kuiniselani, e eseese ekalesia ae tasi loto.Ata Laulu Site Ah See
Feiloai i loimata ole fiafia nisi o toa ua amataina le mafutaga a Fa’ala i Kuiniselani, e eseese ekalesia ae tasi loto.Ata Laulu Site Ah See

E lei manatu faapito nisi o alo ma tamafanau o Fa‘ala i Palauli o i Kuiniselani mai isi Ekalesia poo fea e aga mai ai le tusi na aumai mai Samoa auā na faafofoga lava o le manaoga mai le ekalesia EFKS mo le maota o le faafeagaiga ma le faletua.

Na taupati atu lava se‘i faafofoga ma se‘i maua le ‘au o le paipa, ma na ta‘ua e nisi o le fia togimaa lava ma le fia soosoo tau‘au auā e moni lava upu masani, “E ā oe nei a o a‘u   taeao.” E eseese uma sui sa auai, e tofu lava le tagata ma lana ekalesia o loo galue punouai ai i se ‘ai auā le galuega a le Atua, ae ona o le osi aiga lava ma le manatu i le nuu na soifua ma ola a‘e ai. O le aso 2 Aperila na uluai tāloina ai le fonotaga a le alalafaga o Fa‘ala Palauli, e afua lea ona o le tusi na taunuu mai Samoa mai le susuga i le faafeagaiga o le EFKS o Fa‘ala, Rev Uilipifosi Konelio Teo, ona ua manaomia se fesoasoani mo le maota o le galuega ma se pa e lio ai le maota o le Atua.

Sa taloina lenei fonotaga i alo ma tamafanau, faapea lupe faalele o le talalelei, paolo ma gafa o le alalafaga o loo aumau i Brisbane, ma o le po foi lea na faatuina ai loa ma le mafutaga ua faaigoaina o le “Fa‘ala Village in Brisbane Australia”, lea ua autasi ai e avea Laulu Site Ah See ma taitaifono, Tui Vaimoso e avea ma Sui Taitaifono, Fusi Aiolupotea o le Failautusi, Papalii Faleolo o le Teuoloa, ma le tamaitai o Brenda Mauigoa e avea ma lagolago i tulaga tau le faamaopopoina o fuafuaga fai a le alalafaga o Fa‘ala i Brisbane.

Ua faapafala lenei faamoemoe o se mataupu tauave mo le 2 vaiaso, e alu le sui ia ma mafaufau i se auala vave mo le faamoemoe ia vave maua se seleni e pei ona faatagisia mai e le EFKS i Fa‘ala Palauli.

O le aso 23 o Apreila o le a toe fono ai le mafutaga e faamautuina vaega uma o le faamoemoe o lenei sailiga seleni ua lē faapitoa na o sui o le EFKS ae ua galulue uma ai alo ma tamafanau o le alalafaga mo lea faamoemoe.

O loo talo atu ai foi le Taitaifono ma le laulauafono faapea le mafutaga a Fa‘ala Palauli i Brisbane Ausetalia, i soo se alo ma tamafanau, paolo, ni gafa o Fa‘ala Palauli o loo alala ma papaaao i Brisbane nei, o se avanoa lelei lenei e afifio ma maliu mai ai ina ia mafuta faatasi pe a talafeagai.

O ou uso, tuagane, mātua ma fanau nei e eseese uma tupuaga ma ekalesia ae tasi i tatou uma ia Keriso o so tatou sao foi lea i lea itu o le galuega a le Atua isi o tatou nuu i Samoa.

O le Isaraelu moni lava e susu‘e lona faamalama ma tepa a‘e i le nuu na soifua ai. Pe itiiti pe tele ae ia avea lea o se avanoa tatou te mafuta ai e pei ona tatou soifua a‘e i si o tatou nuu pele o Fa‘ala. Faamoemoe i le mana o le Agaga paia o le a manuia ai taumafaiga e tali atu i le faatalauula mai.