Aua le tuua le mafuta faatasi o le fanau a le Atua, auā o se avanoa lelei e faasoa ai manatu ma lagona auā le lelei ma le agai i luma o le galuega a le Atua.
Ua faavaeina nei se mafutaga a alo o susuga i faafeagaiga mai soo se Ekalesia i totonu o Niu Sila nei, e faasoa ma mafuta faatasi ai e faamalosia ai foi la latou pito laau e lagolago ai i galuega a o latou mātua o loo tausia tovine a le Atua.
O lenei mafutaga na afuafua mai a o faagasolo le mafutaga faaletausaga a faafeagaiga ma o latou faletua i tausaga uma ua faaigoina o le “Samoa Pastors & Leaders International Network.”
I se tasi o fonotaga na a‘e ai se tofa i nisi o faafeagaiga na auai, e tāua foi ona iai se mafutaga faapea e mafuta ai alo ma fanau e faamalosia ai foi i latou mai luitau o le galuega.
O le tele o taimi i galuega faafaifeau e amo uma le mamafa e alo ma fanau a faifeau, ma e tele foi le avanoa e faasinosino lima ai tagata i alo ma fanau a faafeagaiga, ae galo ia i latou o fanau a faifeau o tagata ola foi e pei lava o latou fanau. O le tele foi o manatu o tagata o alo o susuga i faafeagaiga e tatau ona atoatoa pe leai foi se faaletonu, ae o le vaai foi o le tele o tagata, o alo ma fanau a faifeau ua sili ona lē lelei ma faaletonu a latou amio pe a faatusa i fanau a le aulotu poo le lautele o le ekalesia.
O lenei mafutaga e lei leva ona faatuina, ma o loo vaavaalua lava ma le mafutaga a faifeau ma o latou faletua i tausaga uma. O tausaga taitasi e feaveai solo le mafutaga i atunuu, e pei o Ausetalia, Amerika ma Samoa, ae o le tausaga nei o le a talimalo ai Niu Sila nei, ma o le Ekalesia o le Life Church i Manurewa o le a feagai ma le taliga malo i lenei fonotaga a faifeau ma o latou faletua, ma o le a faagasolo ai ma le fonotaga a alo ma fanau a susuga i faafeagaiga uma.
Faaalia e le susuga i le faafeagaiga ia Pastor Peter Leota o le aao tusitusi o le mafutaga a faafeagaiga i totonu o Magele e faapea, ua molimauina le maualuga tele o le fuainumera o i latou ua faailoa lo latou fia auai mai i lenei tausaga, ua lē gata i faifeau ae silisili ai le mafutaga a alo ma fanau.
O le po o le Aso Faraile ua mavae, 21 o Aukuso sa faataunuuina ai se koneseti a nei alo ma fanau i le malumalu o le Ekalesia o le Livingstone Evangelism Ministry i Magele. Sa maitauina ai le lagolago a mātua ma aiga i lea po aemaise o susuga i faafeagaiga ma o latou faletua sa faatumulia ai le malumalu.
O le susuga ia Maa Sagala sa fai ma fofoga o le po, ma o se afiafi matagofie i pesepesega, aitema ma molimau faauuina na saunia e nisi o alo ma fanau talavou sa fai lea ma faamalosiau i aiga ma mātua sa auai, ae lē gata i lea o le mālie o uiga tausaafia o Maa ma lona siufofoga tagitagi sa lagona uma ai e tagata le fiafia ma le naunau i polokalame o le afiafi.
Na mae‘a le polokalame ona faaauau lea o le mafutaga i le ipu ti na saunia e susuga i faafeagaiga ma o latou faletua. O le faamoemoe o lenei koneseti o le fia tuufaatasia lea o se seleni auā le taliga malo mo le mafutaga a le Pastor’s Kids (PK) o lumanai nei.
O loo iai lo latou faamoemoe e fia faia ni a latou mafutaga e pei o tafaoga, taaloga ma isi itu e pei lava o tu ma aga e masani ai tatou i taligamalo, a o faagasolo le mafutaga mo le vaiaso atoa i le masina o Setema.
O nisi lava o alo o faafeagaiga o loo faatautaia ma tuufaatasia lenei mafutaga, ae na faailoa e Andrew Leota ma Miriama Aloalii, o i laua ua faauluulu i ai lenei mafutaga, e maofa le agaga ona sa na o sina taimi itiiti lava na tapena ai lenei faamoemoe ae maeu le tali mai o aiga, uo ma ē masani i le faamoemoe o le mafutaga.
O se mea foi e sili ona faafiafiaina ai, ona sa maitauina le toatele o alo ma fanau a faifeau i totonu o Niu Sila nei ua talisapaia lenei mafutaga, ua avea ma nofoaga e mafuta ma faasoa ai o latou lagona, ia ma maua ai foi se faasiligamalosi i le olaga tautua i le galuega fai a latou mātua.
O lenei mafutaga e tatala le avanoa i soo se faafeagaiga mai soo se Ekalesia e auai, aemaise foi o a latou alo ma fanau e fia mafuta faatasi ai.
E leai ni pa puipui o lenei mafutaga, na o le Suafa lava o Iesu Keriso ua avea ma auala e fesootai ai, ma soloia ai i lalo pa puipui ua lē mafai ai ona mafuta faatasi le aiga o le Atua.
