‘O se mea ina lelei ma le matagofie o uso ae nonofo faatasi, ae aua foi ne‘i tuua le mafuta faatasi o le fanau a le Atua.’ O le sini autu lea o le mafutaga a le Ekalesia o le Samoa Christian Universal Church e pei ona iai le mafutaga a autalavou o Ekalesia e tolu lea sa mafuta faatasi i le malumalu o le Ekalesia Samoa Christian Universal Church i Manurewa i le taeao o le Aso Sa 1 o Me.
O se mafutaga na feiloai ma le loto fiafia ma le agaga faafetai auā o lea ua maua le avanoa e toe mafuta faatasi ai tagata mai aulotu taitasi. O le tuufaatasiga muamua lea o lenei tausaga mo autalavou, ma o se polokalame ua faaautu mo talavou ina ia aoaoina ai pea le olaga faakerisiano ma le iloa e le talavou, e tele lona sao mo le galuega a le Atua.
O le sini autu na tatai i ai lagona o le Aso Sa, “Savavali e Tala‘i le Finagalo o Keriso”, ma o se autu na iloa ai le matautia o tapenaga na saili i ai autalavou taitasi a o loma lenei polokalame.
E tolu autalavou a le Samoa Christian Universal Church sa auai, faapea ekalesia e lua a le Holy Trinity Church lea o loo taitai ai le susuga i le faafeagaiga ia Simone Schmidt ma le faletua ia Pa‘u.
O le susuga le faafeagaiga ia Pelenato Taupau o le failautusi o le matagaluega i Aukilani na taitaiina le sauniga ae o le susuga i le faafeagaiga ia Ifoliu Sanele na vaganaina le upu faauuina a le Atua.
Na faamae‘a le sauniga ona taualuga lea i polokalame faaevagelia a autalavou taitasi, lea sa mataina ai sauniuniga a autalavou. E ese foi lagona ma foliga vaaia o le galue o le agaga o le Atua a o pepese ma alalaga lana fanau i totonu o le malumalu.
O faaevagelia ma pesega mai autalavou taitasi na momoli mai ai nisi o feau tāua o le Aso Sa ma sa taulai uma lava i le autu o le aso. Na taualuga polokalame i le tala matagofie sa faatinoina e le autalavou a le Reachout Youth mai Manurewa, lea sa taitai mai e le afioga ia Malagamalii Alefosio Nonumalo. Na faaautu lea tala i le tauvaga laau ma lona tāua o loo sau i totonu o le Tusi Paia, ma sa molimauina ai le faamanuiaina o loto o tagata sa auai i lenei polokalame e oo lava i susuga i faafeagaiga ma o latou faletua.
Sa faafaigata ona momotu lea mafutaga i lea aso ona ua tino e tasi tagata uma i le Alii. Ma saunoa ai loa le taitai o le Samoa Christian Universal Church le susuga i le faafeagaiga ia Seugalii Uu Silafau Vani Laulala, e faamae‘a le sauniga ma faafetai ai le mamalu o ekalesia sa auai.
O le afioga ia Malagamalii Alefosio sa fai ma fofoga o le aso e faafetaia le mamalu o faafeagaiga ma o latou faletua, faatasi ai ma ni meaalofa e talimasineia ai le galulue i le galuega a le Atua.
