O le sini ma le faamoemoe maualuga na tatai i ai lagona ma agaga o tagata lolotu poo tagata galulue i totonu o Ekalesia PIC i Aukilani, “Ia Tatou Tutu Faatasi.” O se anavatau na faamalosia ai tagata uma ina ia maua le loto e tasi, agaga e tasi ma le tino e tasi e galulue ai mo le galuega a le Atua i soo se fata faitaulaga ua galulue ai.
O le Aso Gafua 18 o Aperila na amata ai le semina a faifeau ma o latou faletua i le malumalu o le susuga i le toeaina ia Elder Setefano Leiite i Tamaki PIC i Glen Innes. O lea polokalame sa auai mai ai le toatele o susuga o faafeagaiga ma o latou faletua i Ekalesia PIC palagi o loo galulue ai faatasi ai ma faafeagaiga mai Ueligitone ma o latou faletua.
Na faamae‘a lea semina i le Aso Lulu ona tatala aloaia lea o le fono tele i le Aso Tofi i le sauniga lotu lea sa taitaia e le toeaina ia Rev Pelu Tuai o le taitaifono o le Ekalesia aoao i le lua tausaga ua
mavae mai le 2014 seia oo mai le 2016.
Ma o le aso foi lea sa faauuina ai ma le taitaifono fou lea ua suitulaga i ai le susuga le toeaina ia Rev Maafala Koko o loo tausia le galuega PIC i Newton ma ia faaauauina ai loa ona tauave le taitaiina o le fono. E tailua tausaga ma usuia fono Samoa a le PIC ma filifili ai foi ma le isi laulau fou ma le taitaifono fou.
Na mae‘a le tatalaina aloaia o le fono i lea aso, ona sosoo ai lea ma le sauniga faapitoa a tina faatasi ai ma le latou fonotaga, ma sa filifilia ai foi ma le latou laulau a fono fou lea ua tulai mai ai le faletua ia Funaki Tuai i le taitaifono, Fualole Lealiifano Levalevale (Failautusi) Seleisa Aveau (Teutupe). Na faamae‘a le polokalame o le Aso Tofi i le mafutaga a tupulaga talavou sa faia lava i le malumalu PIC Tamaki.
O le Aso Faraile na faagasolo ai loa mataupu o le fono auā le faaleleia lava ma le agai i luma o le galuega a le Atua i totonu o Ekalesia taitasi, ma faaiu ai i faafiafiaga faasamoa mai matagaluega e fā sa auai.
O le Matagaluega Aukilani i Sasae o loo aofia ai Tamaki ma Panmure sa latou tatalaina faafiafiaga o le po i le latou pese Samoa ma le mauluulu, ona sosoo ai lea ma le Matagaluega Aukilani i Matu e aofia ai Newton ma North Shore i le latou mauluulu ma le taualuga.
O le Matagaluega Aukilani i Sisifo e iai Avondale, Ranui ma Glen Eden sa faafiafia e ala i le latou mauluulu a tina ma le faataupati a tupulaga talavou, ae faaiu ai i le Matagaluega Aukilani i Saute i le latou mauluulu ma le taualuga. O le tele lava o fatuga suifefiloi o le afiafi sa auga lava i le autu o le fono, “Ia Tatou Tutu Faatasi”. Ma sa maitauina ai le taulamua o susuga i faafeagaiga ma o latou faletua i le taitaiina o polokalame a matagaluega, ma o se fiafiaga tele mo tupulaga talavou ma tagata lolotu ona o le militino faatasi o mātua faaleagaga ma fanau faaleagaga.
Na toe faaauauina le fonotaga i le taeao o le Aso Toonai lea sa taitaiina e tupulaga talavou ma filifilia ai le isi laulau fono fou e tauaveina tiute o le Ekalesia i le isi lua tausaga, ma ua see atu ai nei le susuga le faafeagaiga ia Rev Karima Faiai i le tofi failautusi aoao, lea sa seei mai ai Rev Ionatana Pouli Lefale i le lua tausaga ua mavae. O le aoao ia Tavai Meni (sui failautusi aoao), tiakono ia Toilolo Auina mai Glen Eden ua toe tumau i le tofi teutupe, a o Talaoalii Samoa Naseri ua see atu nei i le sui teutupe. O le susuga ia Rev Apa Lealiifano Levalevale mai le PIC i Glen Eden ua tofia nei e avea ma taitaifono faaagaga mo le isi lua tausaga o lumanai.
O nei tofiga uma o loo tatala le avanoa i tagata lautele i totonu o Ekalesia PIC e aofia ai aoao ma tiakono ina ia auai i lea faiga filifiliga.
